【歐遊百幾日遊記】荷蘭 AMSTERDAM 篇 (十)安妮之家 ANNE FRANK HOUSE

第五日 
安妮之家 (Anne Frank House) |  鬱金香園 (Keukenhof) | 人體博物館(Corpus)

另外有資訊篇講門票同注意中伏事項
【資訊分享】荷蘭 AMSTERDAM 篇 (四)安妮之家 (Anne Frank House) 鬱金香園 (Keukenhof) 人體博物館(Corpus)

路線方面
想去曬三個既,可以 Anne Frank -> Corpus -> Keukenhof
唔去Corpus就 Anne Frank -> Keukenhof
點解去左Anne Frank先,因為佢3:30 後就要排隊先入到場,
比我就會一早預約左場次一早去左先,再去遠D既Keukenhof
當然都可以去完Keukenhof後返黎慢慢排Anne Frank

Anne Frank House

其實我去Amsterdam前可以話無準備過,聽人講Anne Frank係要排隊,
所以我第一次去Ams無買定飛就直接去左果度,去到先知原來訂定就唔洗排
如果排,就係上圖咁,呢度未係隊尾,隊尾係鏡頭外,四倍人,flow得幾慢,要排個幾兩個鐘

由於我知道第二次同家姐黎一定會黎Anne Frank House,而呢日Amsterdam勁大風,係度吹風咁耐可能會凍瓜 男友話佢入唔入都無所謂,如果我想入,就陪我排,我唔想入既,佢都可以唔入,而我同家姐因為三個都睇過本書,所以就點都會去,所以我地呢次無去,諗住第二次同家姐黎先去,我一早買定飛,就得啦

而第二次,我成功買左當日三點鐘既場次 我地預計1點幾會到機場既ibis酒店放低野,有成個幾鐘鐘慢慢出黎Anne Frank House

點知

之前我提到入機場ibis, 係要係機場站搭shuttle。當日我地同成堆ibis既客係寫住ibis shuttle bus既牌下面等車等左半個鐘,都未見有車 其他酒店d shuttle都黎過了之後我地向左望,見到有架野係100米範圍外剛剛上完客,向呢邊駛,黎到呢度,佢車身竟然寫住ibis 頂,係咁遠唔聲唔聲上左客,車頭又無寫ibis,又無人提不過話唔定佢會再停低呢
但當呢邊堆客向司機揮手示意呢度仲有好多客(成十幾廿個),個司機見到後,竟然縮個膊頭fing曬手咁照駛走架車  架車未full,勁多空位

於是我地成班憤怒既乘客要等多半個鐘至9個字,一共個零鐘先上到shuttle 仲要今次架車爆到差d上唔到

等得耐本身都煩,最煩係,我地去 Anne Frank既時間又少左 最後,我地再等多次 shuttle出去,再搭到Anne Frank個站到果度,已經3點35分 我地book左3點

我諗住去同d staff講我地book左,可唔可以入。不過,Staff真係唔比 佢話,張飛用得,但要排隊

IBIS SHUTTLE

果日天氣仲惡劣過第一次,大風再加超大雨 條隊再長D。
有個staff話:其實呢今日天氣咁差,唔建議你地今日排,你聽日可以再黎架。
我:係咪聽日可以3點入場?
佢:唔係,我意思係,聽日會好天,你地可以排得舒服D
我心諗 就係天氣差其他野都做唔到先應該用黎排隊,好天我緊係去風車村影相唔黎排隊咁傻啦

於是,我死死氣地排,叫家姐們四圍遊覽下先,反正我黎過,佢地未黎過,
不過因為落大雨同佢地靠我帶,所以半個鐘後佢地都返返黎一齊排

排左個幾兩個鐘,終於到我地啦

如果唔知Anne Frank House咩黎 ,簡單講下,

Anne Frank 一家係二戰時期既猶太人,
Anne Frank13歲生日收到一本日記,於是佢開始寫日記,
內容好似寫信咁,將日記叫Kitty,每篇都以 Dear Kitty, 開首。
有一日,因為唔想被德軍捉去集中營,於是佢地一家都要搵個位藏身。
佢地同另一家猶太人一齊搬左去入位於Amsterdam既呢間屋既頂幾層藏身,
呢間”屋”本身下面係一間office黎,佢地整左個秘道(打開個書櫃)就通往到佢地住既範圍,
佢叫呢個範圍做 “Secret Annex”。
下面做野既人唔知上面一直有兩家人住係度,
兩年黎佢地都要好似消失左咁匿藏係入面,
拉曬黑窗廉唔可以望外面既世界,講野要細聲到確保下面無人聽到,
行路都要輕到無腳步聲,但佢地一直都有幾位外面既朋友幫佢地,比食物、書之類既娛樂佢地。
搬入呢度之後,Anne一直都有keep住寫日記,呢個都算係佢唯一既娛樂,入面記錄佢兩年幾黎既生活,佢對打杖消息既感受,佢既思緒等。佢係入面講過希望出返黎之後,佢既日記可以發行成書。

總括黎講,日記入面紀錄左二戰時期一個猶太女仔既世界。

不過不幸地,匿藏左兩年零一個月後,德軍都係發現左佢地(唔知係咪有人告發,無人知),拉曬佢地去集中營,最後Anne Frank一家只有佢爸爸生還。
佢出返黎後搵到Anne Frank既日記,睇完後亦如Anne所願,將佢地出版成書,就係我地而家睇到既The Diary of Anne Frank。

 網上圖片

而Anne Frank House就正正係當時Anne Frank住既Secret Annex,
而家佢已經改建成今日既博物館,屋既Structure仍然係度,有d當日佢地居住過既痕跡仍然存在,睇過本書再親歷其境,感覺好特別

  網上圖片

入去啦 首先,要經過一輪保安程序,相機唔用得

底果幾層,係好多Anne Frank 既沙龍照 再加好多日記入面既經典quotation,再加把女仔聲讀一次。
初頭,我同家姐們見到,都有D驚,驚在係咪成個館都係咁,咁既話同睇書有咩分別,點解我要排兩粒鐘淋雨 不過,好戲在後頭

入面會有D影片,播下生還既老豆,憶述當年既事,
又會搵返當時有幫佢地既人,訪問佢地對Anne Frank一家既印象,
甚至佢細個既朋友都有訪問,會睇到唔少書入面唔知既野
由於下幾層唔係佢地住既地方,所以未算精彩,但都唔錯。

之後,見到書櫃,即係Annex 既入口,就精彩了  網上圖片

路亦都開始窄 呢度好多斜梯,記住唔好著裙

實際上成個structure,而家我已經撈亂曬,不過我成個感覺係,
佢地間屋比我想像中大唔少 當時中學睇,以為好細間,好逼,
好似劏房咁 但我無諗過可以間到兩家人既屋,再間房,
而間左都仲係幾闊 唔知係咪因為無傢俬呢。

我之後買左張明信片,有間屋既structure

右上角果幾層就係果度,兩座樓中間果度,就係書櫃入口
本來我以為上面會有埋當時既傢俬,結果係無既,
入面有d立體模型好似樓盤果d咁,講解當時間屋入面有咩,傢俬放邊。
但點解現實無放返傢俬呢,入面有講,
話德軍黎到,就移除曬呢度既傢俬,剩返固定既結構,
例如洗手盆呀爐頭,所以去到廁所同廚房我地仲會見到,
但房呀果D就無,不過會見到有d貼紙呀海報仲貼係牆上面,
都係當時佢地(應該主要係Anne)貼既。

最深刻係牆上面有個位,係佢地以前度高既,
上面有鉛筆痕,mark左Anne同佢家姐唔同時期既高度。
嗚呀見到呢d生活既痕跡

而傢俬,唔重新跟返果時咁放黎作展覽用途,
係Anne Frank呀爸既意願,佢prefer 間屋好似吉既一樣。
屋入面每一個detail位,例如d海報呀鉛筆痕呀,都有英文解說,講下咩黎,睇得好舒服好明白成個環境

睇完各人間房,仲有Anne Frank成日提既閣樓,落返去,會有Anne Frank d diary既真跡

  網上圖片

我果時先知佢本日記是咁既樣 好cute
佢d字比我想像中靚(講緊左邊果d)  網上圖片

仲貼左佢細個d相係入面,又會見到佢會用唔同色既筆proofread 同mark自己d diary。
同埋佢寫左幾本見到真跡真係會打冷震

最後就係手信店,買左明信片之後就出去了
我地三個睇完後,都一致認為淋住雨咁等左個幾鐘,係值得既

劇透完畢

歡迎 Like 我既Facebook Page 緊貼最新既遊記及攻略 : 芒果豆腐花遊記 
Advertisements

Leave a Reply

This site uses Akismet to reduce spam. Learn how your comment data is processed.