【歐遊百幾日遊記】夏遊東南歐篇 (九)希臘雅典 極度推薦唔食唔得既美食!!Karamanlidika!!

DAY 2 希臘雅典 超級推薦 Karamanlidika,絕對不能錯過既希臘美食

今晚我地去食既係係市中心附近、
Trip advisor 上全雅典排名第三(果時,而家第七)既餐廳,
排得咁前絕對實至名歸
佢叫做 Karamanlidika – Τα Καραμανλίδικα του Φάνη
https://en.tripadvisor.com.hk/Restaurant_Review-g189400-d6852056-Reviews-Ta_Karamanlidika_tou_Fani-Athens_Attica.html

行到過去,首先佢入面都幾特別,有一part 好似超市咁,有曬D肉呀腸吊曬係度


Menu 英文版係頹頹的A4紙

第一樣,

呢個係一個薯仔沙律之類,有趣地,佢個味同平時既完全唔同,佢加左D香料同芥末醬,又甜甜地又鹹鹹地,初頭我頭幾啖覺得有少少奇怪,但之後越食越上癮

第二樣,我地叫 grilled eel ,燒饅魚,腦入面當然成個日本蒲燒饅魚果種樣,
點知,一黎

好清新既樣!!完全唔會估到咩味
食落,完全同日本果種唔同感覺,呢種係好清既感覺,但又唔係蒸魚feel,
佢係另一種燒法,個調味又係一流,甜甜地鹹鹹地咁,
完全load唔到兩種係同一動物黎,
我平時唔食魚既,呢個好正,感覺上唔會再有機會試到
希臘人既調味真係比到驚喜我

隔離枱亞洲樣既美國人,應該是ABC,因為完全唔識中文,
見到我地碟eel,都問我地,咩黎,
我地話係eel,佢地都幾驚訝咁


呢個係鐵鍋蕃茄蒸蛋D 朋友,全部名唔記得,聽落好頹?但食落又係痴線的,D調味真係完全無法想像地正 鹹+酸+甜味好和諧,好似仲有少少辣既粉,又熱辣辣,狂食狂食狂食,好重口味,但真係好正!!

話咁快就食曬三碟,分量唔算多,但真係超好味。我地覺得呢間太高質,唔叫多幾樣真係對自己唔住 於是再叫!其實真係好想翻J個饅魚,不過又覺得應該試多樣野。我地叫左沙甸魚 平時唔食魚既我(地),又叫魚了

呢個時候,waitress見我地食完三碟野,應該準備埋單,於是就上左default送既甜品。

一睇個樣就覺得好似我會鐘意食既野,睇黎係橙yogurt啦
一食, 好!Q!好!味!!
好味得黎,又完全唔似橙味,但諗極都唔知咩水果黎,桃?橙?真係唔知。

食完後,waitress收左碟野,我地就叫沙甸魚,今次呢個waitress應該唔知我地其實已經食左好多野,見我地剩係叫一碟沙甸魚好似覺得好奇怪咁
又唔知老子其實已經食左好多野 我地係度講笑話,佢一陣會唔會以為我地未食甜品,上多份

之後,要來了

又係清新既樣

今次佢又用另一種玩法,用檸汁調味
鹹鹹酸酸咁,又係比例啱啱好 超級上癮之作,
平時見魚就反胃既我,竟然將D沙甸魚一條一條咁掉曬入口
男朋友已經飽既時候,我竟然好開胃,狂食
一野清曬

搞笑野黎,頭先個waitress果然真係唔知我地已經食左甜品,
又上多碟甜品黎
咁既美食,本身已飽既bf都忍唔住一齊狂食

最後,我地埋單時問waitress,呢碟yogurt上面橙色既係咩黎,
佢竟然話,係carrot 色係似既,但個味 你話係芒果類我都信

希臘菜

黎到雅典,千其唔好錯過呢間餐廳!!

Advertisements

Leave a Reply

This site uses Akismet to reduce spam. Learn how your comment data is processed.