【歐遊百幾日遊記】夏遊東南歐篇 (十四)希臘聖托里尼 SANTORINI 出海火山溫泉騎驢半日遊 (上)

【遊記】DAY 5 希臘聖托里尼 Santorini 出海火山溫泉騎驢半日遊 (上)


是日book左出海火山溫泉騎驢半日遊
之前提到,係我地黎到呢度,其求入間好顯眼既旅行社book既,
20歐一個人
包船、火山入場同溫泉 佢標榜既騎驢(五歐)就自費既

對於住Fira既我地,碼頭就方便啦,
一直向市集果邊既高處行,就會見到纜車站同行人路落去係底既碼頭

上到纜車站個位,會見到呢個白屋景 同Oia既style有D唔同,無咁grand

我地今次揀行路 其實由果個位落去都好高好斜下,行都要預30分鐘輕鬆行,

你睇下下面,海果度,就係了。

但好好景既,不過我覺得太斜同D路唔好行,重點係好多驢屎,所以都有時會幾臭,騎驢會好D。都可以搭纜車既!好似都係5-10歐。

首先會見到好多驢ready比人騎,

D主人係咁講five euro five euro!但竟然無人理佢地!
基於對歐洲人疑心會大d,即使覺得好抵好想試既我地見無人試都唔敢試,驚係tourist trap,想研究下伏唔伏先試,就跟人行過了,

不過都有同佢地影相 白驢

呢隻隻色勁特別!!

初頭行落都輕鬆,但轉極彎都未到,地又斜,又多屎,

好大舊 四圍都係,佢地一路行一路跌野咁跌D屎出黎又斜又要避地雷,都幾係野,就有點後悔無用其他方法

不過,起點已經離我地好遠了!後悔都黎唔切啦。

果兩條線就係纜車線,應該話吊車,好斜

繼續睇跌屎

途中仲見到一列列騎緊驢仔既鬼佬向上山方向路過,騎得好開心 ,就好想騎!!決定回程上山必騎 (本身都決定一定要試,只係睇幾時)!

(唔騎唔得啦咁斜點行

期間我地都見到有人從山頂騎驢落山,勁快地過左我地,好葡萄 !但無理由中途上驢,就得個睇字

好正的,每人驢一隻,佢地好傻,有時會無啦啦行好快,好刺激。我地見到有幾隻落山無啦啦跑,如果我坐上面實會嚇死 同埋佢地雖然係向住下面行,但係唔睇路的,基本上唔避人 會行到就黎撞到人都唔轉方向

呢隻就係向緊我行但無打算避開我,逼到我埋牆邊既驢

行左四個字至半個鐘,終於到了!見到地面都好多驢,回程要騎了!!

佢地完全係塞住條路無打算行過D 勁搞笑 完全唔驚人。

呢度就係碼頭,呢頭有D 士多呀手信店,好多艇係度,係唔同既團黎。

知道一陣要行山,當然買定兩支大水 (呢段路已經搞到我地飲曬成支大水 )。

Fira已經係好高既上面,估唔到我地碌左落黎 ,搵完上船位我地就等船到。

呢架就係我地既船,  全場最靚既大帆船。識坐一定坐上層室外睇風景吹海風啦 !竟然得我地同另一pair couple。正!

唔記得架船有無遲黎,只記得一上船好快就開船了!

見到碼頭勁多人

見到曬Fira有幾高,頭先條路有幾斜同長,

放大你睇:

其實我見到都有d覺得神奇,我地兩位廢柴竟然行左呢條路! (明明只係落山 ,已經講到好艱難好勁咁 正一垃圾仔

海啊,藍啊

都有D綠位

沿會經過D個形狀幾特別既巨石岸仔

好型啊 我鐘意怪石

之後就到溫泉了

呢個就係傳說中既溫泉了 當我地見到就黎埋岸,已經有點興奮想準備落船
點知 架船就停左 播歌 搭梯 有人跳落水 原來唔會泊岸既 就咁停係度比人跳落海遊過去黃色果度浸

而我呢D小學剩係學過自由式,游到一個池都無就就黎斷氣既人,就當然唔敢跳落去 於是…眼甘甘睇住成班鬼仔鬼妹鬼婆鬼佬鬼BB好正地係呢個海上Party度跳落去暢泳

男朋友其實識蛙式,提議話不如佢落去,我被佢帶住咁去 點知另一對外國情侶想做同樣既事,已經被staff阻止,因為要確保落水既都係GOOD SWIMMER 完美示範
於是我地兩個都無落水

其實真係好正,播曬歌,由帆船跳落海,再游去果邊浸溫泉
我人生第一次如此葡萄 今日終於見識到咩叫暢泳
佢地真係游得超暢快超輕鬆,好似係個海度生活開咁

連d小學雞都一野輕鬆跳落去再上返水, 果下我真係有種…我做左廿年人學識左D乜既感覺 係果一刻比我揀入到大學定識游水我實揀後者嗚哇
其實誇張左,但我地真係好葡萄

佢地好快就游左過去浸,究竟係咩感覺既!?!!
我地已經打曬泳衣底竟然不能大派用場

男朋友話,我地一陣一定要去多次泳池練水,暢泳補數!
都好

經過漫長既煎熬終於都叫返佢地上水,繼續開船
成班游完靚水既小學雞走曬上黎曬太陽 成副泳裝,好滿意剛才自己表現既一副模樣 我唔要見到佢地
講笑

上一站,葡萄;下一站,火山

睇黎到了 不過原來呢個岸唔係比我地既

呢度先係


「導遊」話,如果大家有需要,佢可以一齊行,講解下;如果大家都想自己自由行既,佢就留係船上面 當然無人敢叫佢帶

於是,出發

叫人唔好亂搞D石頭,應該係好似香港D地質公園唔比人拾石仔既原理啦
繼續上啊

下篇:【歐遊百幾日遊記】夏遊東南歐篇 (十五)希臘聖托里尼 SANTORINI 出海火山溫泉騎驢半日遊 (下)

歡迎 Like 我既Facebook Page 緊貼最新既遊記及攻略 : 芒果豆腐花遊記 

 

Advertisements

Leave a Reply

This site uses Akismet to reduce spam. Learn how your comment data is processed.