【東歐四國攻略】歐遊預計每個城市逗留日數?計劃歐遊路線資訊大全及懶人包(一)

歐遊懶人包 – 中歐四國 / 東歐四國

相信由買機票一刻起,除左去邊頭之外,另一個問題會即時彈出黎既就係:去歐洲預幾多日好?而呢個問題去到plan路線果時仍然會比唔少煩惱你,完全唔知買幾時走既車票好;完全唔知book 幾多晚酒店好……而係我既旅行post入面或者係我幫人執行程時,去幾多日都係最熱門問題黎。於是,呢篇係想分享下以個人經驗黎睇(包括中伏體驗),一個城市可以留到幾多日 / 值得留幾耐。

我會分冬天、夏天講既,因為日照相差成五個鐘,係plan行程上完全係兩個唔同玩法黎。
另外,我都會講我咁樣預法做左D咩比大家參考下,等大家加加減減D時間咁,因為我有去既地方唔係個個都想去,我無去既地方亦有人有興趣去。

利申:
1 – 如非搭車,我多數係訓到10點先出發,下面都係以呢個鐘數出發計。
2 – 無去北歐、葡葡牙、最東東歐
參考:冬天 5 點幾開始天黑,夏天晚上 9-10 點天黑
定義:一日= full day,講緊中午前已經出現係個城市度,直至天黑,咁市際搭車就當前一晚/接住果朝發生既。

東歐四國篇

所謂東歐四國,係指歐洲近東邊(而我覺得似中歐多d)既四個熱門旅遊國家——捷克、奧地利、斯洛伐克同匈牙利。多數去得呢四國之一,都會連帶地一次過去曬呢四個國。當然,都有人會只揀一個黎深度遊啦,而以下講既懶人包,相信就對想一次過去曬呢四國既人比較有幫助。

map1.jpg

以下呢張圖,可以一次過睇到東歐四國最熱門旅遊城鎮既位置,等大家對個行程有初步了解先。唔洗急住研究佢地乜黎,講得懶人包,當然下面會介紹啦!

map2.jpg

呢度咁多地方,究竟有幾遠呢?要搭幾耐車呢、搭D乜?可以睇下下面呢張圖做個心理準備,但實際班次就要靠自己喇。放得係度既路線,基本上都係一程過、唔洗轉車既,除左Hallstatt > Vienna 同 Salzburg <-> Hallstatt。

map3bus2.jpg

所以玩得東歐四國,一定係不斷搬家遊走喇,起點、終站亦隨個人喜好決定,但從上圖你會見到佢地既路線並非一個圈,所以如果買到Open-Jaw開口機票,布拉格入,布達佩斯走,當然就最好啦。

但每地逗留時間又點預法呢?各地又有咩睇頭?而家初步了解下,再按個人喜好作篩選吧。

下面既地方名旁打*號地方=我無去,但我會咁預


  • 奧地利(童話小鎮、博物館、建築)

    map5austria.jpg
    奧地利其實幾大,靚既地方都有好多,最「必去」既地方相信係人稱最美小鎮既 Hallstatt啦。至於Vienna,就係個其實最悶(除非對音樂好有興趣)但偏偏大家都因為一場黎到不想錯過而安排既行程。其實佢仲有個可取之處,就係係度落腳黎即日來回鄰國既Bratislava啦。

    Salzburg同Innsbruck就係二級熱門地點,Salzburg對我黎講,重點就係去國王湖(人人盛讚!),而Innsbruck,就係個幾舒服既小鎮,想去南德都可以經呢兩度入既。

    下面會分別簡介下各地預留日數同行程。


    Hallstatt (點擊會Google search 圖)


    冬天建議日數 / 1日 / 
    夏天建議日數 / 0.5 日 – 2日 /

    相關遊記:
    【歐遊百幾日遊記】東歐四國篇(奧捷斯匈)(十)DAY 5 Hallstatt 哈修塔特 哈爾施塔特 白雪滿蓋的仙境——Hallstatt (上)| 冬遊Hallstatt 每一步都係一個Postcard景 + 提防難食高級餐廳

    todohallstatt.jpg
    呢個小鎮其實真係好細小,基本上就係一條街黎,冬天可以做既就係行盡個鎮、玩下雪、去呢個postcard位睇景,如果想滑雪既,再自行預加時間啦~當時我冬天係度留左兩日,大部分時間都係玩雪(擲雪球、堆雪人),過左悠閒既兩日。如果時間緊逼既,預留一日就夠了。但因為冬天好寧靜,係度Stay一晚都好好架:Hallstatt住宿攻略

    夏天如果純粹行下市鎮可以預0.5日,但因為夏天鹽礦冰洞、山上既Five fingers觀景台開返所以可以玩耐D,咁就可以加返1-1.5日。


    Salzburg


    冬天建議日數 / 2日 /
    夏天建議日數 / 2日 /

    相關遊記:
    【歐遊遊記 2018】獨遊瑞法德奧 童話小鎮仙境遊(二十)DAY 9 奧地利薩爾斯堡 Salzburg — Salzburg Card 景點行程 交通 遊記

    todosalzburg.jpg
    大家可以在Salzburg內用 1日市內漫遊同去Hallein 鹽礦 (冬天都開,詳情睇官網),然後預一整日去國王湖。你用Salzburg Card遊覽呢個市,會有好多野玩同參觀,我覺得好抵玩好充實~而國王湖 Königssee 其實係德國境內既湖泊,雖然都要花上數小時既交通往來,但從Salzburg去比從德國既Munich去方便架,黎到Salzburg,不如就去埋啦!每個去過既人都話佢係仙境,我上次去天氣一般,但都覺得風景優美,值得搭車去睇!
    (注:國王湖冬天係去唔到上湖,所以唔會見到上面個景)

    相關遊記:
    【歐遊遊記 2018】獨遊瑞法德奧 童話小鎮仙境遊(十九)Day 8 德國國王湖 Königssee — 遊記 攻略


    Innsbruck

    innsbruck-tirol-202mo.jpg

    (網上圖片:@Tiscover)

    冬天建議日數 / 1日 /
    夏天建議日數 / 1日 /
    有時間既,不妨黎市內漫遊一日,畢竟呢個睇到雪山山巒既歐洲廣場景都唔常見,Innsbruck仲有個特點係佢市內真係好多凸肚窗,我覺得幾深刻。

    相關遊記:
    【歐遊遊記 2018】獨遊瑞法德奧 童話小鎮仙境遊(二十五)DAY 10 奧地利 因斯布魯克 INNSBRUCK 苦中作樂遊記 集陰天大雨轉晴既一日

    呢度仲可以搭纜車上山上睇景添!不過如果行程緊逼既可以考慮放棄,因為佢位置都偏遠,以四國行程黎講都算唔順路。


    Vienna 維也納

    IMG_8777.jpg
    冬天建議日數 / 1.5日 /
    夏天建議日數 / 1 – 1.5日 /

    維也納呢個城市,老實講如果你唔係要黎朝聖既音樂愛好者,又唔係想睇好多好多博物館既人,呢度真係無咩特別——古城唔夠布拉格美麗;亦無Hallstatt既童話小鎮感;湖光山色就更加唔洗講。除左名氣外,佢真係無咩突出,不過佢既建築風格上就比較Grand,的確係有種皇家既感覺既,有時間都可以黎一黎,當感受多一類型既歐洲城市,但若果你無時間想略過既,我並唔會覺得好可惜~

    呢個四國之旅係我抵達歐洲後既第一個旅程,所有野對我當時黎講都好新鮮,我果時亦未行過歐洲既博物館,於是黎到維也納,我都可以好好心機地睇下博物館度日,未算話悶,未去到覺得浪費時間(日內瓦…),只係回想起既就覺得呢個城市整體上魅力不大。雖然講到好悶咁,但你要行既,其實佢都幾多景點架。

    todoviennamap.jpg
    如果黎到維也納,有咩好做呢?第一日,你可以花一個上午欣賞下黃色地帶英雄廣場一帶既建築群(國家圖書館自然史博物館等等),果度全部都係華麗既風格,我相信係維也納既重點黎,要逐個影既都有排影。有興趣既,可以係果度花個下午參觀下室內裝修到成個皇宮咁、會行到腳軟既自然史博物館,或者去埋又係裝修到成個皇宮咁既圖書館,可以行到勁耐。

    之後就可以逛下紅框Naschmarkt(一個有食物、手信店既Market,掃下街咁),接住晚上可以去橙框國家歌劇院睇場歌劇,由於開演時間唔早,所以買完票可以先去市中心(粉紅色區域)行街、果度仲有好大既St. Stephen’s Cathedral參觀。

    去到第二日早上,可以去寧舍遠既藍框位置 百水屋,其實佢可以做既只係出面影相、去佢手信店參觀,但就要專程搭去果頭,如果對古怪建築無興趣既,可以直接早上離開,出發下一站了。

    相關遊記:
    【歐遊百幾日遊記】東歐四國篇(奧捷斯匈)(十四)DAY 8 維也納 VIENNA 一日遊(上)| 英雄廣場一帶華麗建築巡禮 自然史博物館(入內參觀) 國立圖書館 國會大廈 霍夫堡皇宮 藝術史博物館


  • 捷克(古城、童話小鎮、博物館、城堡)

    map4_prague.jpg

    捷克真係一個美麗迷人既地方,佢首都布拉格比我預期中靚好多,色彩繽粉、典雅又熱鬧既老城景比左我深刻既印象,即使呢度實際上可以做既野未必多,但將來我都好想再去多次,影多D相,因為佢真係條條街都係影相位黎!捷克仲有個重點——佢物價比其他國家低!


    布拉格 Prague

    IMG_6895ab拷貝.jpg
    冬天建議日數 / 2日 /

    夏天建議日數 / 1.5日 /

    todopraguemap1.jpg
    布拉格好大,不過如果以熱門景點黎講,都係聚曬係上面黃色老城區,以及橙色城堡區。紅色查理橋就係連接兩者既橋樑,佢自己亦係個景點,從果度睇河畔景色當然就好靚啦。至於藍色圈果度,其實就好似維也納既百水屋咁,係一個寧舍偏遠既奇怪現化建築黎(而我只係搭車經過見到就算)。

    正如上面所講,呢個地方真係好靚好靚,如果你鐘意影相既,係黃色Old Town Hall 古城區呢頭行足全日四圍影絕對唔過份,不過當然講緊冬天,如果夏天行到咁耐既話都真係好勁,但唔係講笑,呢個範圍真係兩步一景咁濟,有排你影。
    todopraguemapoth.jpg
    呢帶度度都靚,而且好多手信店、餐廳等,要認真慢慢行既真係行到好耐下,而以上係特別有印象既地方,但景點絕不限於此。我地仲去左哈維爾市集,有D手信、食物睇下咁。另外,呢頭既街有好多小型博物館:朱古力博物館、糖果館……又有好多表演場館:雜技表演、歌劇表演、音樂劇等都有,你可以係度發掘到唔少節目,所以話呢度可以玩到差唔多一日架。當然,如果你唔係好影相、又對呢D無興趣既,係咁依行下可以好快就覺得無野做,我係有聽過人話行左半日覺得有D悶的。

    第2日,你就可以經查理橋過對面,去橙色既城堡堡區啦。todopraguemap1.jpg
    雖然上面框左好多位,但有野睇既其實就係呢帶:
    todopraguemap_castle.jpg

    過橋後,首先可以去紅框果度睇下Lennon Wall ,連儂牆呢個名相信對大家黎講都不會陌生啦。接住,就可以去橙色框果度睇Prague既Skyline,觀景台就係係進入黃色區域既樓梯上面。而黃色區域,就係城堡果帶,入面有一堆古建築群,有聖維特主教堂舊皇宮藍色區域既黃金巷等,都係行下睇下既景點黎,我仲入左個玩具博物館 ,呢一帶可以用上一個半日左右。

    因為我晚上睇左個Imagine Dragons既演唱會,係布拉格就過左充實既兩日喇。
    如果夏天黎,早出晚歸(十點天黑),鐵腿人係可以一日就行曬、睇曬,但如果想慢慢行、慢慢影既,就預返一日半都差唔多。

    相關遊記:
    【歐遊百幾日遊記】東歐四國篇(奧捷斯匈)(二)Day 2 布拉格 老城區 Old Town 一日遊(上)古城建築的一、二事;詳說天文鐘、舊市政廳登頂資訊分享
     


    Cesky Krumlov CK小鎮

    cesky-krumlov-day-trips-from-prague-2.jpg
    網上圖片:@Prague Guide ↑

    冬天:

    IMG_7656拷貝.jpg
    冬天建議日數 / 1日 /
    夏天建議日數 / 0.5- 1日 /

    CK都係一個我想再返去既地方,我去既時候正值冬季,有幸睇到佢童話般既雪景(真係超靚),不過佢夏季既橙、藍、綠分明既小鎮景亦係我好想親眼見到既,所以真係好想再返去!黎到捷克,落奧地利時真係一定要係呢個美麗小鎮行返日!

    其實CK好細,可以做既都好少,真係預半日黎行一圈都可以徙步行曬,佢主要既景點係:
    todock.jpg
    仲有去影相位睇高空景(因為我當日唔舒服,係酒店入面hea左全日,晚上先出去行,所以無時間去影),仲有其實我真係好鐘意座彩色塔!
    順帶一提,呢度冬天好多店都唔開,有D似死城架,可能會比較悶,千其唔好預太多日留係度,一日真係夠,不過雖然話少野睇,但就更加寧靜,係度抖下、慢活下都好啊。

    相關遊記:
    【歐遊百幾日遊記】東歐四國篇(奧捷斯匈)(八)DAY 4 Cesky Krumlov 庫倫洛夫 (下)夜遊冬日童話小鎮CK小鎮 住在白雪小鎮裡 | Pension Kapr住宿報告(推薦) + 著名地窖餐廳 KRČMA V ŠATLAVSKÉ


    Karlovy Vary 卡羅維瓦利 (溫泉小鎮)*

    864436 (1)網上圖片@easyvoyage.com

    冬天建議日數 / 1日 /
    夏天建議日數 / 0.5- 1日 /

    Karlovy Vary 係捷克西北部一個以溫泉聞名既城市。呢個城市真係幾有特色——唔同既溫泉泉口遍佈呢度每一個角落,路人可以用溫泉杯斟呢D泉水飲用。以前既歐洲皇室、貴族都好鐘意溫泉水,因為覺得溫泉係有神奇既療效,因此呢度以前已經係好受歡迎既旅遊城市,有唔少名人既足跡,例如莫扎特。如今,佢依然係個美頭既溫泉城市,黎到捷克,如果從德國入捷克,不妨花一日係度行個圈,遊覽下!你亦可以從布拉格即日來回呢個城市。不過,睇過咁多遊記,佢出名既溫泉似乎主要都係飲用既泉水,如果要係東歐呢邊浸溫泉既話,我都係比較推薦匈牙利。
    map7KV
    呢個地方唔算好多,係由沿住Telpa河而建既建築物組成既,所以主要景點都係曬呢個細小既範圍,全部都係行街、影相,徒步可到,所以唔需要用太多既時間就可以行完,當中亦無理想地浸個溫泉既行程。

    其實我未黎過呢度,不過順道做個綜合。呢個城市出名既景點,主要都係迴廊,每個都有唔同既溫泉口,有唔同礦物既泉水,但全部都係非常難飲既(我係匈牙利飲到既亦然),就係鐵味,係直頭覺得飲完會中毒既水:
    todoKV
    以上MILL COLONNADE(磨坊迴廊)MARKET COLONNADE(市場迴廊)PARK COLONNADE(德弗札克公園的公園迴廊)都係長廊入面有幾個特色泉口,而且內外裝修都幾靚,係影相既地方。而最後一個既溫泉迴廊入面就有名副其實既噴泉啦——一個會噴溫泉水既噴泉。

    以下圖片左邊既階梯都係呢個城市既重點,果度係一D電影既拍攝場景黎架。螢幕快照 2018-01-26 下午1.59.49網上圖片@historickasidla.cz


  • 斯洛伐克 (古鎮建築、城堡)

    map6slonhung
    斯洛伐克幾大,如果你要深度遊呢度,你絕對可以去盡呢度不同既山洞、冰洞等,亦可以行山,不過如果你唔係呢方面既愛好者,係四國遊入面既熱門行程就多數都係去一去佢既首都Bratislava——一個都幾細、無咩好做既小鎮。

    如果你係維也納如果無野做,不妨即日來回斯洛伐克既Bratislava黎個半日遊,亦可以係去匈牙利之前係呢個城市停留返半日行個圈,佢既古鎮都幾彩色,唔錯既。


    Bratislava  布拉提斯拉瓦

    jj.jpg
    冬天建議日數 / 1日 /
    夏天建議日數 / 0.5- 1日 /

    Bratislava真係幾細,你係入面亦唔會有咩好特別既野做或有咩可以睇好耐既博物館,但佢有個令我好回味既餐廳係令我係果度食左兩、三餐。以下係你係呢度可以做既事:

    todoBT.jpg

    除左以上頭三項既搵銅像、藍色教堂德文城堡,我仲去左個Museum of Trade [極迷你,只有一間店仔咁細]。基本上,除左德文城堡要搭幾十分鐘車出去之後,其餘既地方都係集中曬係古城範圍內,所以唔會需要太多時間。食野方面,絕對推介LOFT Hotel Bratislava入面既酒店餐廳Fabrika the beer pub

    其實我係呢個城市留左兩日,真係悶到發霉!千其唔好重蹈(我地既)覆轍!留一日、半日都好夠架啦。

    相關遊記:
    【歐遊百幾日遊記】東歐四國篇(奧捷斯匈)(十八)DAY 10 斯洛伐克 布拉提斯拉瓦 BRATISLAVA, SLOVAKIA 古城半天遊


  • 匈牙利(古城、博物館、建築、城堡、夜景)

    map6slonhung

    匈牙利最出名既一定係號稱多瑙河上明珠既布達佩斯 (Budapest) 啦,唔少人去完都好鐘意呢個城市,而我亦覺得呢個城市幾精彩,都幾多野可以去做下!黎得東歐,一定一定要黎呢個城市留返幾日啊!

    Budapest 布達佩斯

    5104226627001_5515999951001_5214933106001-vs.jpg
    網上圖片@Lonely Planet

    冬天建議日數 / 3日 /
    夏天建議日數 / 2 – 2.5日 /

    其實布達佩斯多瑙河一帶既景色相信真係好靚,點解我話相信呢,因為我去果時正值極濃霧既幾日,可以話伸手不見五指…所以咩靚景都睇唔到啊!所以呢部分既相好多都要用網上圖片了…不過,就算不幸睇唔到景,呢度亦有好多精彩事可以做,依然不枉此行啊。當時我得2個Full day,D行程pack得好實,好chur,以下會詳細講下你係呢度可以做既野!

    map8budapest.jpg

    布達佩斯其實多數景點都係沿河兩岸,仲有一部分係東邊岸既內陸D既位置,所以可以分為上圖紅(漁夫堡一帶)、黃(國會一帶)、綠(中央市場一帶)、藍(塞切尼溫泉浴場一帶)四區域

    todoBD.jpg

    第一日早上,你可以先集中黃區,去多瑙河畔行下,睇下國會大樓Parliament(可網上預約進入參觀)同去河邊放左紀念猶太人既靴子(Shoes on the Danube Bank 多瑙河畔之鞋 )果度參觀下。

    接住,你可以去綠區 中央市場一帶 Central Market行個圈掃下街輕鬆下,呢度有成行成市既小食店,全部都係匈牙利特色菜!可以係度揀到午餐架。佢出面就係叫做自由橋 Liberty Church既綠色仿鏈型大橋樑,係呢度最著名既大橋之一,沿住佢行,對面就係山洞教堂 Cave Church (Sziklatemplom),係個幾有特色既教堂,因為係建於中洞中,從外面睇都覺得幾壯觀!果度山頂仲有個解放紀念碑,果度可以睇下高空城市景。但如果對佢地無興趣,就可以直接搭巴士去漁夫堡果區(紅區)

    todoBD2.jpg
    漁夫堡係山上,山腳有Lift上山頂,而重點係山腳有個好值得去既戰時岩石醫院博物館 Hospital in the Rock,故名思義,係戰時呢個岩石山洞係個醫院,而家改建成博物館,但仍保留大量當時既設施,黎呢度參觀係必定要參加佢為時一小時左右既導賞團(需要預約),所以可以預留定時間參觀。參觀過後,就可以上漁夫堡。漁夫堡係個外型好特別,好值得去既城堡,呢度仲有座教堂馬加什教堂。漁夫堡除左本身已經好靚,堡上亦可以俯瞰飽覽多瑙河畔既景色,如果鐘意既可以逗留耐D,睇曬佢既日、黃昏、夜景。(冬天四點幾開始就天黑;但夏天可能去到九點先天黑架,所以夏天想睇山上夜景建議上堡前放多個行程。)

    晚上,你就可以參加遊船河,係船上食個晚餐,一路食一路歎夜景!
    (如果對歷史有興趣,夏天可以係上堡前去埋恐怖之屋,佢唔係鬼屋,果度係有關於20世紀匈牙利既法西斯主義同匈牙利共產主義時期既展品,亦係制度底下受害者既紀念碑。不過如果冬天去應該唔夠時間做咁多野了,因為睇曬D館先上到漁夫堡就一定會剩返夜景,所以就話冬天要比夏天預多日。)

    todoBD3.jpg
    第二日,早上首先可以去藍區英雄廣場一帶,其實果頭就係有D雕塑,無咩好特別既野要逗留,除非你想參觀果度既美術館。呢度睇完就可以去附近既動物圖,途中係冬天時你會見到結冰既湖仔變成溜冰場(City Park Ice Rink and Boating)夏天就係坐下艇仔啦,可以係度玩下先架,仲會經過一個餵鵝機,幾蚊就會出好大堆食糧出黎比你玩下(唔止上圖咁少)。然後就可以去參觀動物圖——呢度好多動物,不過冬天時熱帶動物會收起曬唔知去曬邊,而我幾鐘意度,因為D動物真係好鐘意望住D人,對你好有反應,唔會無視你!
    todoBD4.jpg
    而動物園隔離,就係著名既塞切尼溫泉浴場(呢度最大既浴場,有露天及室內溫泉),絕對係必去體驗既地方!佢係呢個城市既重點啊!你唔好錯過啊!!!一定要去!!!當時我就係0度底下係度玩盡曬呢度每個池!可以花上數小時架,詳情、玩法後補啦哈哈。

    晚上,你可以自由搵下自己鐘意既餐廳,都可以去New York Cafe 歎個晚餐或食完野行下河邊睇下多瑙河一帶既夜景先去NYCafe飲下野,食下甜品(開到12點!),呢度環境真係幾靚,值得黎打個咭!

    第三日,夏天行程若果無咩特別其他地方想去,可以去下個城市了,或將前兩日既地方打散黎呢日,可以休閒D。冬天亦都係,前兩日既行程最好打散過黎第三日,因為日落較早,係黑夜中係街留太多會覺得好攰架,不如提早休息下啦哈哈。

    相關遊記:
    【歐遊百幾日遊記】東歐四國篇(奧捷斯匈)(二十一)DAY 12 匈牙利 布達佩斯 BUDAPEST, HUNGARY | 中央市場 Central Market Hall、馬加什教堂 、漁夫堡 Fisherman’s Bastion


以上,就係芒果豆腐花遊記既東歐四國懶人包(v.2.0)啦。
比多好多心機同時間整,如果大家覺得有用既,歡迎支持下Facebook  page ,
留意最新資訊同遊記: 芒果豆腐花遊記
黎緊,我亦會打返東歐四國既遊記架!

我希望可以整到更多國家既懶人包,但由於懶人包整合需時,會陸續再更新,
接住會講:德國、西班牙、比利時、荷蘭、盧森堡、波蘭、希臘、斯洛文尼亞、克羅地亞、波斯尼亞和黑塞哥維那、瑞士、英國等國家。
歡迎 Follow Facebook  page 留意最新資訊同遊記: 芒果豆腐花遊記

詳細遊記及資料整合:http://mangotofufa.wordpress.com/

Advertisements

Leave a Reply

This site uses Akismet to reduce spam. Learn how your comment data is processed.