【住宿資訊】奧地利 Hallstatt 住宿攻略 及 分享 Haus Höll Herta 住宿體驗

黎到 Hallstatt,都會好想係呢個童話小鎮住上一兩晚既,呢篇會介紹下我住既酒店同分享少少tips既。

首先,Hallstatt住宿係搶得好勁,一定要早!當時我地出發前近2個月book都剩返極少好選擇,而我地當時只係淡季!所以如果你夏天去,最好早早早D book。

最初揀酒店,其實都唔知邊個位先叫靚位,因為呢帶有兩個火車、4個碼頭,個個區都沿湖而建既,相信呢點係唔少人既疑惑。

Tips

首先,我地了解下Hallstatt既結構。

  • 鎮中最「旺」既區,即係商店、餐廳重地,係左上角果邊,而 postcard上面個景都係果帶既。另外,果度都有個碼頭,搭去對面果個Hallstatt Bahn,我最後係係果度搭火車去Vienna既。住果度應該最貴,果帶有幾間高級酒店,對正個湖,應該要千幾二千蚊晚(我覺得有D唔抵既,雖然湖景靚,但呢個價去到Santorini可以住到果D歎住私人泳池、面海既獨立白屋villa了,花係呢度就感覺無咁抵玩,當中Seehotel Grüner Baum Boutiquehotel am Hallstättersee既食物更加要以貴價劣食黎形容)。橙色帶中間條路都係D店同餐廳。
  • 接住,要介紹價位相對正常,但位置同樣靚既地帶啦。左下方超市果帶開始,就係民居啦,當中有booking.com 既 apartment、airbnb等,酒店就少見D,鹽礦纜車車站、tourist info centre都係係果度。而我住既Haus Holl Herta就係係正個纜車車站隔離既。呢個位近超市,又近碼頭(雖然呢個我用唔著),我CK shuttle落車位都係超市出面,加上呢個鎮好細,行去最旺果區只係200m距離,所以我覺得絕對係靚位。我當時冬天黎,住雙人房(包獨立 bathroom)包超高質早餐,每人近300hkd晚,但我都聽過有人search夏天,係要千幾蚊晚既……
  • 綠色一帶就係入D既民居,位置無上面果D咁近車站、鎮中心,但以呢帶咁細既面積黎睇,佢地遠極有限。
  • 最後,就係黃色Obertraun一帶,其實我覺得佢都係個靚位,首先果帶有曬火車站同碼頭,到埗/走可以用火車,而去Hallstatt果區都只係一個短短既船程(記憶中唔貴),就可以到達超市果邊個碼頭,遊覽Hallstatt。另外,佢一樣沿湖、果頭又有自己既餐廳果D,最重要係價位應該會比住Hallstatt平一截,所以到左旅遊旺季,呢度都係個唔錯既選擇!
  • 至於最頂既Hallstatt bahnof果邊,以我經驗,果度係荒山野嶺咁,應該無得住。

然後,就係揀酒店時候啦。

  • 你可以係唔同既酒店網(hotels.com / booking.com / hotelscombined.com / agoda / trivago etc )search Hallstatt,
  • 再用地圖搜索,之後zoom去上面提及幾個較好既area,一次過見到果帶酒店每晚既價錢,crl+click開曬你覺得位靚又平既幾間酒店,
  • 作出選擇。

如果全部都好貴,可以試搵遠少少既位,都唔掂再試下airbnb。

住宿推介

我住左 Haus Höll Herta 兩晚,係1月出發前2個月(11月)左右book既,我地住既係一間連私人浴室同廁所既雙人房,一房每晚包早餐近600hkd,即係每人300hkd晚,比其他城市價位高出唔少,但已經好抵了,呢帶好多住宿真係貴得驚人。

呢個酒店係booking.com搵到既,係類似Airbnb既private room,因為佢唔係酒店format,有屋主,佢比其中一間套房你住,出面個廚房可以共用。比Private room好既係,佢係帶私人bathroom既private room,無論係房定浴室都相當闊落。
https://www.booking.com/hotel/at/haus-hoell-herta.zh-tw.html
你會見到佢冬天同夏天感覺好唔同,而網上面既室內相有D頹,我果時都覺,仲有點驚伏,不過佢係當時望落算正常D既住宿入面最平既選擇,所以就照揀試下先。結果去到發現其實好舒服、乾淨、企理,位置又靚,仲有每朝高質早餐,非常滿意!

呢個係屋主每朝早(約好時間)敲門揣到門口比你既早餐。全部都係好靚既餐具(所以好重手),上面既食物都好高質,雖然只係火腿、芝士、包、果醬、果汁,但你會feel到全部都唔係好cheap既貨種(有d酒店自助早餐果d好 cheap),因為D果醬超好味(你都知好多味都好假,我去到荷蘭超市都買唔返有咁好味既jam),火腿唔會臭、包又好好味唔頹,果汁都唔係水溝糖果類,仲有新鮮水果,奶+茶比你自己調,成set野真係好正好正。

我地打開個窗,係暖氣房入面一邊欣賞雪山景色,一邊利用呢D餐具享用呢個優質早餐,嗚呀好有度假感覺!

極力推介呢間酒店!

Hallstatt 行程 Planner 懶人包(東歐四國全攻略):
【攻略】歐遊預計每個城市逗留日數?計劃歐遊路線資訊大全及懶人包 (持續更新)

歡迎 Like 我既Facebook Page 緊貼最新既遊記及攻略 : 芒果豆腐花遊記 
Advertisements

Leave a Reply

This site uses Akismet to reduce spam. Learn how your comment data is processed.