【歐遊百幾日遊記】夏遊東南歐篇 (二十三)【資訊 + 遊記】DAY 12 Slovenia 斯洛文尼亞 無想像中咁靚既 Lake Bled 碧湖/布萊德湖

【資訊 + 遊記】DAY 12 Slovenia 斯洛文尼亞 傳說中仙境咁既 Lake Bled 碧湖布萊德湖 

斯洛文尼亞其中一個唔少遊客慕名而來既景點就係碧湖 Lake Bled。  佢最特別既位係被群山環繞住,湖心既小島上有座小教堂。碧湖呢個名既「碧」其實幾微妙,不單同英文幾啱音,睇返相,湖水的確係碧色。不過老實講,唔知同當日天氣烏雲密佈有無關,現實上既碧湖同想像中/傳說中人稱仙境既碧湖落差實在太大了…… 尤其當我返黎再 google 下佢既相,我直頭懷疑自己係咪去左個老翻 對我黎講,呢個地方,有時間既可以一戰;時間緊湊既……skip 左都唔算可惜

呢日早上,我地一樣係行去車站先買前往碧湖既車票,方法都係同counter既staff講要去Bled就可以了 一個鐘左右一班,75分鐘車程,價錢無mark低,但應該都係來回二十歐有找,買完佢就會比張同你去超市買野張收據無分別既「車票」比你

照舊訓足全車程後,到左 一落車都係要行少少既。
跟住路牌,五分鐘內,已經見到湖邊。 環境的確恬靜清幽,不過講唔出仙境呢個term

剩係湖面D浮波都破壞左7成既景緻,仙境值扣30分

左邊其實有D好現代化既酒店,好似長洲沙灘個酒店咁,同個湖十分違和。 仙境值再扣30分

黎到碧湖,高空景係不少得的。

上面呢個城堡既觀景台可以俯瞰碧湖全景 上呀
望落好高,但上山過程其實只係D唔算斜既斜路 好快就到城堡門口

入場費係幾多,已經唔記得,唔係貴,但門口外面有D人唔想比錢又要睇果個高空景,係度爬城牆 細路大人都有

首先要上呢條石仔斜路,細石好似石春咁,好光滑,而係今日又濕又雨既天氣就唔洗講,好跣,於是我寧願行隔離大級D既大石。當然,都係幾滑

一入,就有個水井 之後就係瞭望台啦

放眼望去,的覺係群山環繞、湖山擁翠、碧水悠悠,仲有一個充滿歐陸風情既小教堂矗立係湖心,但好可惜…

天色 黯淡無光,毫無生氣 無左陽光,群山既樹林只見一片墨綠,總覺得少左D層次

老實說,呢個算係一個幾普通既湖 或者我仲未懂得欣賞湖景

對面山被人剃左忽咁,原來係纜車黎

我好鐘意歐洲呢邊既草既果一種青綠

呢個湖色係有點特別,不過現實睇並無咁鮮色
下面仲有D人工建築,仙境值再減20分

比起碧湖,我反而覺得遠方既小村莊更有睇頭

一條小村落座落係一片青草上,背住連綿不斷既山脈,仲有一串浮雲係半山,呢個景緻既仙境值好似仲高分

萬里都係雲,仲要係好厚好厚既雲

不過,都係要影下合照既

近D睇,湖中心既教堂係能夠搭船前往既

又有D似放左個城堡模型上一塊翡翠度咁
或者有太陽會靚好多?

城堡呢邊

影左千萬張相後,我地入去城堡參觀

都幾有童話故事既feel 可能因為個草牆

記憶中個城堡內部係無咩特別野睇

就係有d骸骨咁

個窗門幾得意


城堡下既「小廣場」,見到少少碧湖
唔洗一個鐘,已經「玩」盡左個城堡,落返去

散下步

觀光小「火車」,係歐洲呢邊幾興。

對面岸都有個小屋,仲有浮舟,但都係有好礙眼既浮波

有幾隻鴨仔係湖上面,其實仲有天鵝既。

佢全日就係係度同自己拔毛,我地係地上拾一支黎睇,覺得好得意,原來佢地既羽毛末端真係成支膠咁

呢隻鴨好得意,我地又餵包

伸到長一長

食呀


果邊兩位香港女仔同一個景互影左千萬張、起碼大半個鐘


無錯無錯,當我地落黎地面後,開始有太陽了!
成件事即時立體得多少少藍天都出埋
你好野

唔夠兩個鐘,連鴨都玩左半個鐘,我地已經覺得玩完呢度
回程

途中見到幾靚既屋

有一個亭仔有過千隻蜜峰係果頭飛,好恐怖
無聊既我地係度講,究竟比幾百萬你,肯唔肯去果度企一分鐘
真係想像唔到

返返落車既位,等車回程 返到去再行old town,因為一黎無野做,二黎琴日咩都收曬無野睇。

去到邊天氣差到邊

唔知幾時食過呢件cake

因為開始落雨,我地去左個教堂

個門都幾得人驚

出返去,發現仲大雨 入左間餐廳食野

唔記得名,只記得天花幾靚

食親panini都好伏,但呢間真係好好味
出面簡直係暴雨,可能係呢半年係歐洲見過最大既雨

返去拎行李準備去車站,先入M記hea下先
當地既特色M記貼品

頹得黎又好味,好似朱古力批黎


雪葩 酸得黎又幾好味

接住,我地等巴士,架車delay左起碼一個半鐘
期間大雨再細雨再大雨,一見公司既車一黎,我地就一野衝上去,
但見有一兩個都去zegreb既人無上車,
於是我地就求其問個車上既人係咪去zegreb,點知個鬼妹話:to Salzburg!
一野跳返落車 下一秒架車就開
好彩問一問!差d犯左個嚴重大錯

到架真車黎,去到Zagreb已經十點幾十一點咁,乜都關曬,條街感覺都幾雜,D牆全部都好多噴字,又多廢棄左既屋 勁恐怖 唔知以為玩緊喪屍game VR場景

不容易地到hostel,點知連間hostel都無野食的
已經餓到極點,去到開始唔識餓既境界 訓到第二朝再算

歡迎 Like 我既Facebook Page 緊貼最新既遊記及攻略 : 芒果豆腐花遊記 
Advertisements

Leave a Reply

This site uses Akismet to reduce spam. Learn how your comment data is processed.