【Backpack攻略】行李篇——必備、不必帶既裝備

Plan曬所有路線、住宿後,臨出發之前不少得要做既當然係執行李啦!問題黎啦,背囊定拉篋好?要帶幾大個背囊?有咩要帶?有咩可以唔帶?玩個半月行李都唔夠5KG既我希望呢篇幫到大家。

pack-01

首先,我去旅行一次比一次帶更少野,因為一路去一路覺得去得舒服重要過所有野(包括靚),同埋會發現好多野帶黎都多餘。去到最後幾個trip,我只係用一個Doughnut既返學背囊、5KG 都無,就裝曬所有野出發去個幾月旅行喇!所以成日好疑惑點解D人去揹半個人咁大既背囊。

順帶一提,其實最好都唔好用返學果d背囊去旅行,因為雖然可能好睇,但佢地多數無護脊,建議用其他有護脊背囊,例如我之後就買左Doughnut既Woodland系列,佢地唔太細又唔太大,最重要係好多為背包旅行度身訂造既設計!
IMG_6265.jpg
呢個就係我17日旅行既行裝。(另外仲有個迷李既出街用背囊仔: 22*30 cm大)

拉篋 VS 背囊?

歐遊黎講,我會用背囊。原因講到聽朝都未講完,例如:

  • 內陸機handcarry慳唔少行李費,有D巴士直頭你用到巴士行李倉都要收你幾歐
  • 歐洲古城磚地凹凸不平,拉篋加倍吃力。
  • 落雨拉篋麻煩都算,落雪既真係等於要用手搬篋、抱篋,想像下都覺得好攰。
  • 歐洲唔少住宿特別係apartment、airbnb都無𨋢搭,孭背囊行上行落點都好過搬。
  • 搭車搭火車可以安心攬住行李,帶篋你要看實佢。
  • 歐洲細既火車站、好多地鐵站都無電梯或者𨋢,有都未必方便,通常要兜曬路先到𨋢口,所以上落都唔方便。
  • 個人去歐洲唔似去日本,除左磁石都無咩要買,一對鞋走天下,唔洗用到篋。

咩人唔適合用背囊?

  • 腰背長期有傷患、一揹重野就痛既人,長期負重呢D活動真係唔建議你做,就算揹都一定要揀個護脊既,感覺會差好遠
  • 去歐洲打算行Fashion show,要換N套衫、幾對鞋既人。算啦,你帶篋啦。
  • 打算去到瘋狂購物、掃貨既人

帶幾大個背囊?

呢part比較廢話,因人而異,但主要考慮以下呢幾點:

  • 季節 + 你會唔會洗衫:
    冬天去一般要大D,因為衫可能厚D佔多D位,又頸巾、手套果D,當然冬天唔出汗所以一件頂耐d唔洗都得,可以帶少幾件,咁可以唔洗特登要大好多既袋;
    夏天衫薄,但換既頻率高D,勤力洗既帶少D衫,背囊就唔洗咁大,懶得洗要帶多D既就預大D。
  • 多唔多大件器材:
    有相機呀、幾支鏡既就帶大D,當然都可以掛頸既
  • 會唔會玩露營:
    無行開山、Camping既習慣,但見呢D人多數好多裝備,就要大d。

有咩必帶?

  • 兩季必帶

  1. 護照 證件:身份證、學生證
  2. 錢 / 銀行咭 / 信用咭
  3. 車票!車票!車票!你print曬出黎未!!
  4. 底衫褲:
    下身呢D咁少布既野其實佔位有限,帶3-5條都得
    bra比較佔位,帶一個替換,變態講句:可以一個著幾日。
    底衫冬天我只會帶一件替換,夏天吊帶底衫就兩件。
  5. 薄睡衣一套(我唔帶替換,唔會日日洗,如有需要出門口前洗,晚上返黎就乾、著得)
  6. 一套出街衫替換(我唔介意張張相一樣衫)
    一條薄連身裙最方便、或者著半截中長裙,剩係換上身衫
    鬆身d既衫褲可以唔洗洗得咁密

  7. 冬天我著Merino羊毛襪,佢既技術係可以比你5日唔洗,著一對、帶一對。
    夏天我成日著涼鞋出去,有需要就帶兩對薄襪,洗都快乾。
  8. 相機 + SD card、手機
  9. 以上既充電器(有需要帶埋尿袋)、USB線
  10. 上到網既 SIM card
  11. 萬能轉插,越多USB hub 越好
  12. 耳機
    最主要用黎聽歌mute左飛機或者巴士喊B既聲。
  13. 拖鞋
    防水、輕(夏天12蚊店好多超輕)、出到街既更好,可以住宿時沖涼出入著,我會著住沖,因為覺得外面浴缸都污糟,游水都可以著。
  14. 出街用既袋仔
    唔洗下下出街都倒曬背囊D野出黎,我會有極細個斜揹袋或背囊仔,冬天直頭唔帶,要既野放係褸既袋就算(利申 有拉鍊/鈕)
  15. 藥品:頭暈、止痛、清腸丸、舒筋貼、個人藥品
  16. 止汗用品 / 香水
  17. 沖涼毛巾
    細同薄,可以快乾、唔阻位
  18. 洗面野、保濕產品。
    hand carry既話要分裝到100ml一支,你帶幾多支都得,但每支唔可以多過100ml(e.g 你可以帶10L既hand cream,但你要將佢分裝入100支100ml既樽仔度)
  19. 濕、乾紙巾一兩包(可以買,但廢時啦又輕又唔佔位)
  20. 女士:M巾(一、兩塊得啦,要既到時先買都得)
  21. 指甲鉗
  22. 梳、洗面時夾起D頭髮既夾/魔術貼、橡筋
  23. 棉花棒
  24. 眼鏡 / con /+ 100ml以下洗 con水+夾+盒
  25. 眉筆、唇膏(就算唔化全妝都要夠精神)部分人可能會帶埋其他化妝品
  26. 備用膠袋 (髒衣、方便分類行李)
  • 夏天必帶

  1. 太陽眼鏡
    非一般既殘眼
  2. 蚊怕水
  3. 防曬
    男女都要,四圍都無瓦遮頭唔似香港,到時膊頭曬到甩曬皮再孭背囊生不如死
  4. 止痕膏
    當蚊怕水無用時…

  5. 頭頂易曬傷,微雨又用得
  6. 一對硬皮書封面咁薄既出街涼鞋或拖鞋
    輕便、出街唔洗著襪,洗少樣野。
  7. 泳衣(除非你去非海邊城市)
  8. 雨傘
    其實咩季都會落雨,但冬天多數既人都係著件防水連帽風褸就得,夏天就要傘了
  • 冬天必帶

  1. 頸巾、手套
    但我會keep住戴係頸、手
  2. 厚褸
    當然著住啦,比多一兩千投資件著一件就夠暖、防雪、防水、防風、著到一世既雪褸,你唔會後悔。仲可以因為夠暖,帶少好多件衫。
    (就算落雪,我extra heat tech+面衫+雪褸就夠暖,無雪褸既應該要著5層衫加件普通褸都未夠暖)
  3. 暖包幾個 (對我黎講)
  4. 保濕產品
    多數凍既地方都特別乾,cream真係唔少得,唔係會成日都好痕

邊D係成日會帶但其實唔等駛既野?

  1. 沖涼液、洗頭水
    如果唔介意用酒店果d ,但有d國家酒店唔提供(唔多既)
    如果十幾日內都唔會搭飛機,我會直接去超市買支 2in1 Head & Shoulder,係果十幾日用曬佢。
  2. 訓覺保暖衣物
    歐洲既暖氣四圍都有,好正,係室內你只著一層睡衣都唔會凍。反而你著超厚底衫可以會熱醒。
  3. N支鏡頭
    除非你超執著呢方面/有特別野想影,我一支廣角鏡+定焦餅鏡就得,其實每影一張就換一次鏡人都癲。
  4. 腳架
    對我黎講太chur,從來唔做,搵D高位墊高佢算(但都幾辛苦)。有d人獨遊會需要既。
  5. N條褲
    一條長裙或者褲著住走天下
  6. N套衫
    洗衫吧! 同埋如果係 apartment hotel會有洗衣機,好方便。
  7. 幾個手袋
    我有fd會帶幾個手袋,其實好徙位,皮袋仲好重。
  8. N支護膚野
    係香港都極少用呢D野既我成日FF去旅行會敷住mask 睇電視、寫遊記。太天真了,試過兩次帶完無用過後,就唔再帶。當然,保濕cream 同防曬幾時都帶定d會比較好。
  9. 風筒
    太徙位了,多數酒店都有,無就自然風乾,果度天怎乾燥,唔洗好耐都乾
  10. 電腦
    唔好玩啦…公幹咩…
  11. 飛機頸枕
    慢慢會慣左唔洗用都沉睡到,要帶就帶吹氣果種,重點係唔好徙位
  12. 遊記
    又係想像得太美好既野黎。帶親都無寫,太攰同無時間寫,搭車、搭飛機時打係手機算。

最後就係:

其實唔洗怕帶少左野,果度D人都要生活,所以你要既野,
果度都會有得以正常價買到既!對自己肩背好D喇!


歡迎 Like 我既Facebook Page 緊貼最新既遊記及攻略 : 芒果豆腐花遊記 

 

Advertisements

Leave a Reply

This site uses Akismet to reduce spam. Learn how your comment data is processed.