【歐遊攻略】Budget篇—超常問題目——帶幾多錢好?預算及控制洗費大全

旅行行程固然重要,但budget就當然最緊要。果時開始為歐遊儲錢前,我睇左N個post同遊記,都搵唔到或者無結論我要帶幾多錢、儲定幾多彈藥先夠我玩1XX日,好唔安心,所以只能瘋狂儲,到時再算,以減輕我既不安感。點知,後來用左個方法,就發現可以解決曬以上所有問題。於是,呢篇我會一次過分享下我地咁多個歐遊trip所有關錢事既事實同tips——用左幾多錢、唱錢計唱幾多時點做、食飯預 / 用幾多錢、住宿預幾多錢,交通錢點預、幾多錢買XX先算平,點樣控制洗費確保in budget,比埋tips幫你計自己要帶幾多etc。

europe budget map-01

睇落去之前,先講下我跟住落黎講既呢個budget下,最後係可以點玩法,同時大家可以諗下自己想點玩法,睇下自己計自己budget既時候有無野要加減返。
【注意,以下既HKD係以我當時去既匯率:1 EUR = 8.5HKD 計既,所以請以你地既匯率按比例去計返。】

經驗分享

首先,我地旅行風格係乜?我地大概係舒服又經濟實惠既風格 —— 唔算係窮遊,又唔係豪遊,但一定要舒服、安全、健康。

  • 住:唔訓sofa、唔訓街、唔訓車站/機場,唔住幾十人hostel果d——其實要share 房既住宿我地一個都無住過,我地住既係正常既雙人房連浴廁,酒店位置方便,有時包早餐。
  • 交通:絕對唔會為慳錢搭通宵巴士/火車之類,火車/巴士/機票時間要靚,就算平但要半夜起身或者深夜先到埗既都唔會搭,寧願比多百幾蚊訓飽D,精神D玩。
  • 食:唔係餐餐咬麵包,但都唔係餐餐美食,多數會一餐頹一餐好 —— 確保食到當地美食、滿足味蕾,同時又唔會太大洗。間中買零食、經常買水果、多數每日買支水或者其他飲品。
  • 玩:好少因為入場費而唔做一D野,應玩則玩,所以時間許可有興趣(但又唔會貴得太離譜)既都會入同試。

以上面呢個style黎講,綜合頭兩個trip既經驗同精密既計算後,我地得出既結論係:每人平均550hkd一日就夠做,於是打後所有trip,我地都係以550 hkd一日做計算。所以,想知我地每個trip洗左幾多錢,只需要將我去既日數*550hkd就係個答案。

但實際上,呢個數包乜?佢包所有野:

  • 食(一日三餐:普通早餐、純飽肚午餐、好味餐廳晚餐同雪糕飲品)、
  • 住(雙人房連私人廁所浴室既靚位酒店/屋)、
  • 交通(包括內陸機票、城市內外長短途火車巴士車費)、
  • 購物(紀念品)、
  • 玩(入場費)等等,

唯一唔包係香港來回歐洲既機票,因為我地係荷蘭出發,同埋加埋黎計有D無謂。

計 Budget 公式

實戰後知道550HKD夠做後,我地之後計一個trip要用幾多錢方面,公式通常都係:
總數 = 日子數(包括搭飛機果日)x 550 HKD。

注意,550一日唔係每日只可用550既意思,係平均每日550,即係就算你今日張機票450,唔代表你今日得100用要訓街, 550一日既意思係你 10 日既trip有5500HKD 用,稍後我會再講點確保唔會out bud。

微調

550 HKD 係一個有限既budget,但人人玩法唔同,如果你係以下既人,你要加D budget:

  • 要每餐食好野
    550hkd係—食飯要就住budget黎食既法玩,唔係瘋狂亂入餐廳豪食既玩法,於是覺得一場黎到旅行要餐餐好既朋友,可以預多15-20歐一日,你當 700-750HKD 一日,咁應該係(係正常城市)鬆動D既budget了。
  • 住五星級酒店 / Villa resort
    如果你去一D地方係歎世界,覺得唔住返個villa/高級酒店唔得(e.g.希臘D面海白屋、巴黎鐵塔景酒店etc)咁你預當晚貴多100歐,你當 1400 HKD
  • 去物價極高既地方
    如果你去瑞士,建議你triple 一日既budget,除非你餐餐咬麵包,就只需加住宿+交通既budget,因為我去到見到D野食、交通同其他國家比係以雙倍價錢黎計,住宿直頭係三倍先有酒店住,budget雙倍都只得Hostel住。
    如果你去北歐,我相信都要預多每日30歐左右,共850HKD以上一日。除左上述,荷蘭、法國住宿同食物都係偏貴。
  • 撞正酒店比較貴既地方
    Amsterdam、Hallstatt、威尼斯、瑞士、北歐等酒店價位可以好驚人,當然你可以以無咁方便既酒店位置換錢既方法黎解決。但如果你去呢D地方,又堅持住靚位酒店,請每晚每人預多起碼300HKD,即850HKD一日;意大利、巴黎、西班牙大城市酒店價位偏高,但未去到驚人,咁可以預多100左右 HKD既住宿budget比自己,唔洗逼住住hostel,每日 600-650HKD(暑假去一定要更多)。
  • 一人旅行,但堅持要住酒店
    以我呢D會一個人去歐洲,但想盡量唔住hostel既人黎講,我既經驗係較少酒店提供真正既單人房或 單人房價比你,更多時候你係要以1.5或2人既房價黎支付一間雙人房住宿費。即係2個人住一間雙人房係一晚440HKD/房,1個人住同一間房一樣係要比440HKD/房,或者好彩既就 3xx HKD/房,但唔會話變左比220HKD/房就得。呢d情況,你都係想住酒店的話,請double住宿預算(e.g. 220/晚變 440/晚)。
  • Transit頻密
    市際transit係可以好貴,一個trip多transit,就會不知不覺少左好多錢用,如果經常transit,可以比多少少自己用,每日補多100-200HKD,650-850HKD。
  • 住島國
    你每次出去玩都逼住搭飛機,但有D地方總係會由你果度飛去點都貴,所以交通方面可能要預多起碼200HKD。
  • 狂買手信
    我既budget只容許自己買幾個磁石同畫做紀念品,如果你係要買一盒二盒送禮既人,請自己加錢。
  • 搭飛機會寄艙
    我既機票係完全無寄艙行李費,因為我全部handcarry既,如果你會寄艙,請每程預多150-300HKD,視乎航空公司policy同你行李幾重。

總之,窮遊既話,應該無乜可能會高過550 HKD一日,可能可以再少D,
而550HKD對我呢個長征型 & Exchange student黎講就啱啱好,
但特登由香港飛黎玩一、兩星期既朋友,我就建議對自己再好D,唔洗咁慳,時間寶貴、機會難得,食多D好野,比自己700 – 800蚊一日都唔過份。

控制洗費法

唔少人有疑問點樣做到550HKD一日全包而不會洗凸,我會講下我地點做既。

首先,對佔洗費最大既方面既洗費,我地都有個上限,

  • 住:每人最多220HKD一晚,即係我地只會搵最貴一房440HKD一晚既酒店,貴過呢個價就叫outbud,ban。一晚半晚out bud可以,但其他日子就要比in bud平幾十蚊黎拉上補下。我地唔會下下揀220hkd黎住,越平越好,係揀最平入面最正常(位置好、私人浴廁、乾淨企理)。
    參考下:歐洲多數酒店都係每人200HKD左右一晚,都幾多選擇(hotels.com, booking.com, hotelscombined.com),當中最常光顧既品牌係ibis 酒店。酒店可以做到170HKD/person 一晚或以下既,我地覺得叫平。當酒店全部都貴又無得住遠D解決,我地先會用airbnb。當然,上面講過,有d城市 / 國家係就算住hostel 都要每人400蚊晚,例如瑞士、北歐、法國、荷蘭,仲有你踩正最旺既七、八月都會特別貴,咁就唔洗強逼自己220HKD一晚解決,可以(亦係需要)比多每晚200以上 budget自己。
  • 交通:火車、巴士都多數20歐內(瑞士除外),所以都無咩特別,但機票我地就只會買連稅400HKD內一程既飛機,多數200蚊內我地先稱之為平,3XX-400頭 HKD為可接受,4XX但無計就算,高過500HKD叫做不能接受,遲D先去(但我地有方法令我地可以買到平機票地去,另一篇講)。

剩返既數,其實就係我地既「零用錢」。即係有幾多呢?點樣控制呢筆零用呢?事前要做完幾樣野先:

  1. book曬酒店
  2. book曬車票 / 計曬車費
  3. 計劃好曬所有景點同了解相關收費

接住,以十日trip為例,
550*10既總數 5500 – 酒店錢 (1980 九晚) – 交通費 (e.g. 600) = 2920 HKD
零用錢就係 2920 HKD,

再接住,2920 – 所有門票費用 (e.g. 300) = 2620 HKD
2620 HKD 就係十日既飯錢 同 紀念品錢,

呢個時候,我地先至要將呢個數除日子,
2620/10 = 262HKD ~ 30 EU / day。
每日有30歐用,其實都係幾寬鬆既Case黎,每日洗30歐,應該易D預啦!

先減最有可能最貴果part,入餐廳食,預洗 15 EU,都仲有15 EU,
再減頹午餐 5EU,仲有10 EU,
買杯雪糕兩份食,都仲有 9 EU,買水兩份飲,都仲有8-8.5歐比你洗,
如果唔逃票,兩程local車當4歐,每日都仲有4歐自己用,我可以買磁石、零食、水果等,
甚至可以儲起黎聽日變兩餐好野,或者入餐廳果餐夾埋旅伴一齊再叫多個菜。
550 HKD 一日,就係咁樣玩法。
當然,你每洗一次錢,就要睇住盤數啦。

不過,如果你減曬D住、交通、門票後,發現每日只有20歐用的話,有D手緊,
咁可能要有D變動:

  • 變兩日食一餐好野,三餐一般,呢度兩日就可以慳返 10歐做其他野。
  • 提自己呢個trip買少d雪糕、水、飲品、紀念品,就可以慳返幾歐食多餐好野。
  • 對自己好d,每日加返10歐比自己用,總budget加 (85HKD) x 日數。

呢個 550 HKD rule 我地用左半年,百幾日歐遊都係靠佢,有左呢個 rule,

  • 未出發未plan行程都知道自己大概要儲定幾多旅費先去到幾多日
  • 去一個唔同貨幣既城市要唱幾多錢?就係零用錢*日子數了(假設其他野都prepaid曬)。
    當然,建議唱多50hkd走盞
  • 可以輕易預見到自己既身家仲可以玩多幾多日
  • 一日知道自己是日有幾錢可以用,唔會唔小心洗大左/完全唔敢買野
  • 唔洗無啦啦玩玩下發現洗曬錢都唔知咩事

所以,任何人問我,要帶幾多錢,xx,xxx hkd 夠唔夠用,玩到幾多日,我都係用呢個公式,
如果見到去歐遊(行程無瑞士、北歐等地),每日計出黎既錢係

  • 550-650,我會覺得都夠,
  • 低過550少少會話有D mung,但慳d食多d頹餐就ok,
  • 低過550好多就覺得幾辛苦下,
  • 650hkd以上就覺得算係幾舒服,
  • 800以上就直頭唔洗慳,話係豪遊哈哈,再唔係可以玩耐D。

去到呢度,相信大家都計到我成個歐遊旅費啦,120日左右,就係大約 70000 HKD —— 比公式計法多,因為第一、二個trip我地未識控制budget呢個玩法,不知不覺fing左好多錢出去…
嘿嘿嘿

希望呢個計法幫到大家預budget!

我將歐遊既經歷同攻略整合左出黎,
攻略、遊記列表請睇:歐遊資料整理 總目錄

歡迎 Follow Facebook  page 留意最新資訊同遊記: 芒果豆腐花遊記
更多歐洲遊記及資料整合:https://mangotofufa.wordpress.com/

 

Advertisements

Leave a Reply

This site uses Akismet to reduce spam. Learn how your comment data is processed.