【攻略】歐遊預計每個城市逗留日數?計劃歐遊路線資訊大全及懶人包【二】(持續更新)

上篇(東歐四國:奧地利、捷克、匈牙利、斯洛伐克)
【攻略】歐遊預計每個城市逗留日數?計劃歐遊路線資訊大全及懶人包 (持續更新)相信由買機票一刻起,除左去邊頭之外,另一個問題會即時彈出黎既就係:去幾多日好?而呢個問題去到plan路線果時仍然會比唔少煩惱你,完全唔知買幾時走既車票好;完全唔知book 幾多晚酒店好……而係我既旅行post入面或者係我幫人執行程時,去幾多日都係最熱門問題黎。於是,呢篇係想分享下以個人經驗黎睇(包括中伏體驗),一個城市可以留到幾多日 / 值得留幾耐。我會分冬天、夏天講既,因為日照相差成五個鐘,係plan行程上完全係兩個唔同玩法黎。
另外,我都會講我咁樣預法做左D咩比大家參考下,等大家加加減減D時間咁,因為我有去既地方唔係個個都想去,我無去既地方亦有人有興趣去。

利申:
1 – 如非搭車,我多數係訓到10點幾先出發,下面都係以呢個鐘數出發計。
2 – 無去北歐、葡葡牙、最東東歐、大部分瑞士
參考:冬天 5 點幾開始天黑,夏天晚上 9-10 點天黑
定義:一日= full day,講緊中午前已經出現係個城市度,直至天黑,咁市際搭車就當前一晚/接住果朝發生既。

國家(重點)
城市 / 冬天建議日數 / 夏天建議日數 / 做左D咩或者可以做咩 (*號地方=無去,但我會咁預)

  • 法國(地標、博物館、南法海邊城市風情、美食)


    巴黎 / 4 – 5 日 / 3 – 4 日 / 計起黎我係3個full day,去巴黎鐵塔、凱璇門、睇埸巴黎聖日爾門足球賽事、巴黎地下墓穴(頂,plan錯日子,星期一關門去唔到,但絕對有時間,最後用黎行街同去多次鐵塔)、大半日至一日羅浮宮(星期三、五開夜D ^)、一日凡爾賽宮,我嫌無時間係鐵塔下面hea半日。如想去聖母院、鐵塔下野餐坐大半日、塞內河遊船、奧賽博物館(星期四開夜D^)、outlet、迪士尼要自行加日數。

    Dijon* / 1日 / 1日 / 市內 可以從巴黎經呢D地方落南法
    Troyes* / 1日 / 1日 / 市內 可以從巴黎經呢D地方落南法
    Colmar* / 1日 / 1日 / 市內 可以從巴黎經呢D地方落南法

    尼斯 / 2日 / 2日 / 冬夏一樣因為夏天要用D時間游水曬太陽,冬天應該唔洗。我2個全日:行old town、行海邊、上山睇城市景海岸線、半日即日來回摩納哥、石灘hea同玩水、晚上廣場睇歐國盃決賽直播。唔去摩納的話可以減半日,冬天減一日。(唔建議冬天黎)

    里昂 / 1日 / 0.5日 – 1日 (可上午到;傍晚走)/ Miniature Museum 、行市內。如果打算入教堂、去聖母院就自行加日數。

    馬賽 / 2日 / 1.5 日 / 市內行街、上半山公園睇城市景、出海睇地質、山上個守護聖母聖殿。如果想去薰衣草園果D自行加時間。

  • 意大利(古城、博物館、特別村莊、沿海城市、風情、超多美食)


    威尼斯 / 2日半 / 2日 / 1-1.5日主島亂行加行幾步影下相、蝸牛府、里阿爾托橋、總督宮 [有入]、聖馬可廣場、鐘樓 [無上]、嘆息橋、睇夜景;1日玻璃島+彩色島;想去埋麗多島、入多幾個聖馬可廣場入面既館/教堂,要自行加日數。

    Verona / 1日 / 0.5日 / 我中午到,傍晚6點走既,夠時間行完市內、過橋、上山睇城市景。Juliet’s House搵極都搵唔到,無入去,但去埋都會夠時間。

    佛羅倫斯 / 2日 / 1 – 1.5日 / 我留1.5日,7點天黑既,市內漫遊、food market、聖母百花聖殿 [外面睇,無入]、老橋、皮革市場、領主廣場睇雕像、舊宮出面睇、山上 Piazzale Michelangelo、其中半日去The Mall outlet幫人買野,啱啱好。聖母百花聖殿好多人排隊,要入去自行加日數。

    五漁村 / 1日 / 1日 / 我全部火車往返,剩係去左四條村,因為有個一落車得個海又唔想行山搵佢出黎(廢柴哈哈)6-7點天黑前去完。想狂行山既自行加日數。
    如果去五漁村住La Spezia,可以留多半日去Porto Venere先走,靚。

    米蘭 / 0.5日都嫌多 / 0.5日都嫌多 / 米蘭大教堂(無入)同周邊(名牌)購物街(得個行字)。如果唔係黎搭飛機,建議直頭唔好黎,我留左一日半(有晚睇演唱會),呢度好悶好悶好悶又唔靚。想去睇場米蘭既波或者去聖西路球場就預多半日。

    羅馬連梵帝崗* / 3 – 4日 / 3 日 / 資料後補

 

  • 德國(博物館、歷史、中南部德國童話小鎮、建築)


    ^大部份博物館星期一休息

    柏林 / 2-3日 / 2-3日 / 我冬天留左1.5日:柏林圍牆 East side gallery、柏林圍牆紀念館、Charlie’s Checkpoint同附近一帶展覽、The Brandenburg Gate、巴黎廣場、一個奇怪博物館、想去個food market但fail左無店開。如果要去博物館島、薩克森豪森集中營Sachsenhausen、歐洲被害猶太人紀念碑要自行加日數。

    不來梅 / 1日 / 0.5 – 1日 / 留左兩日,風車、廣場、Schnoor Viertel(老城區,避過二戰轟炸既幾條街道)、Museen Böettcherstrasse、第二日無野做去左市郊既科學館玩左大半日

    Essen / 1 日 / 1日 / 其實純粹搵個城市做中轉站先黎,無咩特別,Zeche Zollverein Schacht XII, Essen 關稅同盟煤礦工業建築群及博物館、Ruhr Museum Essen 、冬季嘉年華

    Dortmund / 0.5日 / 0.5日 / 睇波

    科隆* / 1日 / 1日 / 男朋友有去:科隆大教堂、EL DE Haus (關於納粹、蓋世太保囚犯博物館)、橋

    羅騰堡* / 1日 / 1日 / 鎮內行下,靚
    海德堡* / 1日 / 1日 / 鎮內行下,靚
    紐倫堡* / 1日 / 1日 / 鎮內行下,靚

    慕尼克 / 2.5日 / 2日 / 天鵝堡一日、廣場(市內剩睇唔洗半日),但我去左1.5日,於是要去超無聊英式花園,最好留起碼整整兩日,就可以去埋國王湖。如要去楚格峰、達豪納粹集中營、慕尼克皇宮等自行加減日數。

  • 西班牙(風情、超多特色美食、博物館、建築、地質)


    巴塞羅那 / 3日 / 4 日 / 聖家堂、加泰羅尼亞廣場、蘭布朗大道區(La Rambla)、格利亞市場 (Marcat de La Boqueria)、Maremagnum (海傍 商場)、米拉之家(CASA MILÀ ) 、格拉西亞大道(Passeig de Gracia)、不協和街區 (Manazana de la discordia)、巴塞羅內塔灘 (La Barceloneta Beach)、睇波、一日 Montserrat。夏天可以遊埋水,個沙灘幾正,所以預多D時間。想去Casa Amatller、巴特略之家(Casa Battlo)、睇鬥牛、奎爾公園 (Park Guell) 自行加時間。

    馬德里 / 2日 / 1.5日 / San Anton Market(唔大但食物好味)、Museo Cerralbo、Plaza Mayor、Museo Nacional del Prado晚上免費入場、太陽門廣場、購物 (好大間 Primark,有排行)、睇波、Mercado San Miguel(又大又高質 Food Market)。想去睇鬥牛(星期日有^)、El Rastro(好正既跳蚤市場,得星期日有^)、蘇菲亞王妃藝術中心、近郊托雷多Toledo、近郊Segovia塞哥維亞睇羅馬水道橋、馬德里王宮、麗池公園等自行加減日數。

    推薦:
    西維爾* / 資料後補
    格蘭納達* / 資料後補
    Ronda* / 1日 / 1日 / 資料後補

  • 比利時 (朱古力、窩夫、青口,根特:中世紀古城;布魯日:小村莊+古城)


    布魯塞爾 / 0.5 – 1日 / 0.5 – 1日 / 我咩館都無入,去朱古力街、廣場、市內閒逛、尿尿小童同小妹、四圍食野就半日,會入一、兩個館就1日,想去原子塔請自行加日子。可以住Brussels即日來回唔同比利時城市及盧森堡。

    根特 / 1日 / 0.5 日 / 其實根特係6個鐘內玩完:伯爵城堡(有入)、香草河畔遊船、市內漫遊、惡魔城堡(無入)、廣場,當時我係度 6、7點玩完,傍晚就去布魯日住。夏天的話,可以半日根特,半日布魯日。

    布魯日 / 1日 / 0.5 日 / 其實呢度都係6個鐘內玩完:市內漫遊、愛之湖一帶、廣場,男朋友晚上去球場睇波。夏天的話,早少少出發就可以半日根特,半日布魯日。運河遊船請自己加時間(多數都係一個鐘既事)。

  • 盧森堡 (堡、少少法式建築、迷你國情意結)


    盧森堡市 / 1日 / 1日 / 城牆城堡果帶、old town、係廣場睇歐國盃法國賽事,無入任何館,其實主要都係搭車耐,個人覺得唔算好精彩,無時間唔洗特登黎。

  • 荷蘭(風車、村莊、建築、紅燈區、踩單車、花)


    Amsterdam / 4日 / 3.5日 / 紅燈區、Anne Frank House、Sex Museum、紅燈區、九街、市內漫遊、Food Market & Carnival、國家博物館(無入)、大半日風車村、一日羊角村。想入國家博物館、花季去睇鬱金香(連車程一日)、踩單車、梵高博物館、Alkmaar(連車程一日)等,請自行加日數。

    Rotterdam / 0.5日 / 0.5日 / 市內其實3粒鐘都得,奇怪建築、 Food market,男朋友晚上睇波。如果想順便去小孩提防,可預一日,去完再睇市內。

    Leiden / 花季:1日 / 唔係花季都無必要黎:去鬱金香園、Corpus人體博物館。

    Den haag 海牙 / 0.5都嫌多 / 0.5都嫌多 / 悶、無乜特色既荷蘭鎮一個。

    Maastricht 馬城 / 0.5 – 1.5日 / 0.5 – 1.5日 / 我覺得係Amsterdam以外最靚既隱世荷蘭小鎮,2月去撞正嘉年華期既記住要黎!市內半日都得:紅色塔(可上去睇城市景)、廣場、橋、天堂書店、城牆、古鎮感覺,市外有荷比德交界點(幾得意)、St. Pietersberg Caves 聖彼得堡地道導賞團 ,逐項加半日。(由呢個城市搭去比利時 9 歐有找)

“^”號內容係巴絲打們提供既,鳴謝 超人Tiga、GaryPBrinson  巴打。

整合需時,會陸續再更新,
上篇(奧地利、捷克、匈牙利、斯洛伐克、法國、意大利):
【攻略】歐遊預計每個城市逗留日數?計劃歐遊路線資訊大全及懶人包 (持續更新)
接住會講:波蘭、希臘、斯洛文尼亞、克羅地亞、波斯尼亞和黑塞哥維那、瑞士、英國等國家。
歡迎 Follow Facebook  page 留意最新資訊同遊記: 芒果豆腐花遊記

遊記及資料整合:http://mangotofufa.wordpress.com/

Advertisements

Leave a Reply

This site uses Akismet to reduce spam. Learn how your comment data is processed.