Murano（玻璃島）係威尼斯主島以外既一座離島，威尼斯玻璃 Murano 就係源自呢座小島，黎到威尼斯千其唔好錯過佢既小島啊，會有唔會既感覺！

先劇透一下玻璃島景色：

早上我地入到主島，首先就係搵3號碼頭，

Piazzale Roma 呢頭超多碼頭，呢個名既站有分 A B C D E 碼頭 etc. ， google map會講埋比你知你個路線要上船個碼頭係 a定b定c果D，你只需要跟住搵個碼頭位置出黎。因為見到架船3分鐘後就開，唔想等四個字船既我地瘋狂狗衡，雖然話個站係巴士站羅馬廣場，但其實因為多碼頭，所以好長，趕船都足以都跑死人 預多D時開去啊！

上船後，其實搵個位坐好就睇景啦 感覺船速都幾慢

經過之前J google map時見到既墓島，有牆圍住，係google map會睇到成個島都係一個墓園，

毒毒地講句，原來軒轅劍3入面既威尼斯畫到個墓園係獨立既島係有幾分事實根據

相信我既威尼斯情意結同呢隻我小學玩既RPG game有好大關係

到左Murano Colonna呢個站，有唔少人落船，跟遊客大隊永遠是對的 於是唔知頭唔知路既我地就落船

我地所在位置係黑色範圍，C碼頭

呢個站一落有點荒蕪，有一條唔算好旺既街，向左行既全部都係玻璃廠同玻璃品專門店。因為D店係正間廠前面，所以感覺呢度買玻璃比較貨真價實，所以係主島唔洗心急買，黎到玻璃島先慢慢揀都得，雖然應該無乜分別 但係玻璃島買先有concept嘛 。

呢度D店絕大部分都唔比影相，有好多好靚既玻璃燈同鐘，但無影低，男朋友勁鐘意果D奇形怪狀既玻璃燈 仲有呢D擺設幾靚：

價錢唔記得了，但一定係勁貴。

行到最左邊，有一間店寫住free show之類既字眼，即場表演燒玻璃 未見過大蛇痾尿既我地當然要睇睇佢 好得意，佢係個玻璃廠入面set左個看台仔 好似集誦果種，但係穩固D既。我地就可以企係上面睇表演。

表演緊燒既果個人好似係前面果張thank you紙上面果個人

佢一次過表演左燒幾種形狀既玻璃，可以睇住佢將一舊球體既物料燒、轉、吹、扭等，唔洗幾分鐘就將佢地變成一個個玻璃製品，記得當中有馬仔、唔同形狀同顏色既玻璃瓶，感覺好神奇，個個反應好似細個睇人表演扭氣球/變魔術咁，勁impressive。除左報以掌聲，當然仲可以去佢地既店面度選購啦

入面既製品其實係外面其他店都有同款賣緊，不過睇完個show就特別會感覺佢地真係有D工匠手藝係入面，特別想係果度買（好成功既銷售技巧 ）。最後我bf買左隻馬仔，果D馬仔既身體入面有d紅色，睇落好似有血既馬咁，好似五六歐左右定十歐（唔記得了），我地無影相，上網search搵到隻類似既，但我地買果隻橙色果d係紅色

但因為返香港pack得唔夠好，最後隻馬尾定腳斷左

另外我係果度睇中左一條鍊，但佢賣得幾貴下，成33歐定40歐

真係好鐘意，好想買但又唔捨得 ，但最後都無買，決定出去行一圈考慮下先 之後係玻璃島市中心既手信店成功搵到，只係賣9歐 一野狗衝了

玻璃珠鍊，每粒入面都有D閃閃地既白色同銅色顏料，好晶瑩剔透既感覺

雖然話果間買有工藝品feel d，但30歐既差價唔少野 所以黎到都係建議格下價先好落手買 好鐘意 平時乜都唔戴既我都日日戴住，日日J條鍊

Btw，最後佢連住d珠既果D線可能抵唔住日日沖涼刷牙果d被水淋，係米蘭車站行行下爆開左 佢無解曬體，只係有兩粒甩左出黎，我無掉，太鐘意，想返黎香港得閒串返佢，不過就當然到而家都未搞

睇完呢一堆廠同店後，我地極肚餓，於是就去搵餐廳，就係去最旺果度

紅色範圍 去啊

我地一見餐廳就狗衝左先，Osteria ai cacciatori, Murano

呢間我係tripadvisor搵唔返，剩係見到Burano同主島上面唔關事既餐廳

Facebook就反而搵到。位置大概係呢度啦。

呢間我會覺得係平價特色美食之選 呢個櫃有好多點心之類既野。

我鐘意既係佢入面有唔少我未見過既當地小食 平平地食到，唔洗又pizza、kebab咁悶 而且服務好好，我問果D咩黎佢都會好友善同熱情咁解答。

首先叫左呢個：

其實佢唔識英文，但因為之前學過既意文食物 vocab未還返曬比老師，都聽到佢話入面有飯，咁神奇當然要試

外面脆，咬開果然係有飯係入面，味道有d似焗豬扒飯 ，有茄汁、芝士，係久遺既香港風味

呢兩個我會解讀為捲捲三文治/多士，白麵包夾住牛油/雞粒/火腿果類，捲埋佢，又一味茶記點心 。

呢間店都有pasta，但我地今次無叫，因為食完d包都夠飽。

繼續出發 ，玻璃島同主島雖然都係canal景，但睇相都會分辨到兩者：主島面河既建築一般比較grand同高大，睇落高貴典雅D（窗口會多D圓拱形），同埋每一棟都好大，似係有好多戶係入面；玻璃島果d就矮D同比較多單棟式既，門面窗口都樸素D。

呢一條canal兩邊全部都係玻璃品手信店同餐廳，為左買睇中左果條玻璃珠鍊，我地逐間入去睇 。

其實呢款近似既款式好多間都有，但粒珠會變長型，或者變左頸鍊，所以行左十間都未搵到，但就覺得總會搵到，因為間間都賣緊同類野，而且知道唔會貴，因為見到全部價位都係10歐左右，所以30 40歐果間就一定不買了 。

最後，我只係用7-9歐就買到 得一間有

行行下會見到條大橋過對面，

呢頭既景都幾靚，條河比比較闊，

D屋比較殘舊

係度影左好耐相。

對面有舊大型既藍色玻璃擺設，

就係Cometa di Vetro，中文見網上叫琉璃彗星中的聖誕燈   係影相位黎，相信標誌住玻璃島啦，不過感覺呢舊野同周邊景色好違和。晚上佢有燈會發光

遠處都見到佢，好搶眼。

呢D幾搞野，雖然有d恐怖

呢種幾靚

關於呢度既玻璃品，有人話佢地有D店會入口D強國製既cheap工廠製玻璃，所以你會見到有D店會係門口貼住：not made in China 既紙牌強調自己真係賣緊Murano野

不過講真，其實都唔知點分辨，都係講個信字，但有d賣得特別平同樣衰既應該就一睇就知，例如有間店賣果d勁似日本城以前十蚊幾舊既玻璃老鼠仔狗仔果d 仲要d眼耳鼻口都歪曬

我地路過一間餐廳被佢D相吸引左，蜆肉意粉！！佢寫住12歐，張相大大碟，咁抵玩，仲可以坐河邊食，環境好好，就當然要試試。

呢間叫Ristorante Dalla Mora，每人會收2歐coperto架，所以剩係入去食12歐既，最後埋單其實係16歐，係意大利入餐廳真係要計過先。

不過，佢「盤」蜆肉意粉同相顯示一樣咁大盤！！！D蜆肉勁多，味道都夠濃，都好滋味，兩個人share當tea食好啱。不過我上trip advisor D評價又一般 主要都話服務差，我唔係好記得 只記得埋單等左勁耐。

由於坐河邊，好多人經過，個個路過都會望下我地呢個大大碟既蜆肉意粉，簡直係活生生既廣告哈哈。

話說我地隔離枱係講英文既couple，個女既食一碟pasta，男既食曬成大個一圈既pizza，好拆得 同我地好唔同，我地兩人share一碟pasta ，佢地就完全無share，一啖都無，完美呈現東方人同西方人既餐飲文化對比 。我地心諗，唔會好想試下對方果道菜既味道架咩

行多兩圈就搭船去彩色島 碼頭附近有燈塔，開始好天

彩色島遊記係下一篇啊！

（待續）

【歐遊百幾日遊記】意大利（北部）篇 （七）DAY 3 威尼斯小島遊 （下） —— 彩色島 ：影相、影相同影相！！

………………………………………………………………