【資訊分享】意大利 Italy 篇 (一)五漁村 Cinque Terre 攻略:住宿、交通、行程、預留時間

【資訊】Day 7 意大利:五漁村 Cinque Terre 超詳盡攻略

快速跳至:

今日既行程係我期待左好耐既五漁村#love#

五漁村(Cinque Terre)之名既由來係呢個景點係由五條村組成既一個區域,佢意大利文既名 Cinque 係五,Terre就係land / 農地既眾數,而呢五條村分別係 Monterosso al Mare, Vernazza, Corniglia, Manarola, 同 Riomaggiore #yup# ,各有唔同既地貌,亦有好濃厚既意大利風情:P ,色彩繽紛,海天一色,有山有水有村莊,D山仲要係一層層既梯田,幾特別^3^

雖然呢度唔係誇張到絕景咁,但係個好有特色既地方,我覺得黎到意大利,呢個地方好值得一去#yup# 。另外,呢一帶係1997年被UNESCO列為世界遺產(World Heritage),1999年都被劃為國家公園,佢既價值係受到國際認可架:-]

先了解一下呢度既景點分佈:

預計所需時間

建議可以係La Spezia呢頭預留最少一個全日,一日半亦得。如果係會行好多山,又想去盡呢五條村,相信只係一日就未必夠啦。

我地係唔行山既人,一日剛剛好去曬想去既地方。呢日我地早上十點零出發,六點左右玩完,去左四個村落:Monterosso al Mare, Vernazza, Manarola, 同 Riomaggiore#yup#

Corniglia 因為到左車站見到得個海,目測要行山先去到個村[sosad] ,google完見到個地貌同景色唔算好吸引,於是我地就省力無去(一貫既廢柴風格[sosad] #cn# ),不過去埋其實都會夠時間,因為走果時仲係日光日白,仲等(delay既火車等左一粒鐘),只係我地有D攰,所以無逼自己去曬。[sosad]

此外,村與村之間既路我地全部都係用火車代步既:) ,不過呢度其實好受行山友歡迎,因為你google下會見到呢度係山上面望落去既景色似乎相當精彩:) (個人特別覺得Vernazza行上去個景會更靚:P )不過我地兩位廢柴就無行啦#:)#fs ,我自己覺得無行上去睇Vernazza係有d遺憾#:)#fs ,但因為當我地想行上去果時行行下先發現行錯左另一條錯既路,果道氣洩左[sosad] ,之後我就唔敢chur男朋友同我上去[sosad] 。我相信早d出門口,其實五條村係去得曬,除非你全部行山唔搭火車啦。:-] 如果要行山,揀一段路黎行,一日都會夠時間。:)

住宿及交通

我地今次唔係住五漁村,而係10分鐘火車車程以外既La Spezia:) 上次我家姐黎意大利係住 Genova 即日來回五漁村既,不過佢話因為咁要用來回一共2個鐘車程,覺得住La Spezia係方便D。另外,住五漁村入面會比La Spezia貴幾百蚊,而且La Spezia平路比較多,加上我地覺得住五漁村無咩特別,而La Spezia到埗同出去翌日要去既Portovenere既交通都方便D,所以我地就以La Spezia做落腳地:)

下面可以望一望佢既位罷,好多星星果度就係啦。

就咁睇好似好遠,但其實從 La Spezia 出發去五漁村係非常方便,因為 La Spezia 站係同五條漁村既火車站相連住既,唔洗轉車#yup# ,外面既人黎五漁村都可以話必經呢度,由呢度去最近果條村 Riomaggiore 既車站,都只係搭10分鐘火車,個人覺得同住左係入面既方便程度係一樣(以到訪五條村黎講),甚至更方便,因為佢出入其他城市係更方便,又有巴士去Portovenere——另一個靚景點。

更多有關La Spezia住宿請看:
【歐遊百幾日遊記】【酒店報告 住宿資訊及攻略】意大利(北部)篇 (十七)DAY 6 La Spezia 拉斯佩齊亞 – 五漁村住宿之選 及 中伏住宿包膠

火車Pass – CINQUE TERRE CARD (Treno)

交通費方面,我地因為主部依靠火車,會瘋狂搭火車(最少六程),而每程火車都要4歐左右,於是無論方便起見定省錢起見,都係有需要買 CINQUE TERRE CARD (Treno),就係火車pass ( Levanto – Cinque Terre – La Spezia line),佢仲包埋火車上既 wifi[sosad] ,佢仲係呢個五漁村國家公園既巴士pass同進出行山徑既通行證。

就係呢張::)

注意,佢同The Cinque Terre Card係兩樣野黎#no# ,後者係平一半但並唔包火車任搭既權利。價錢方面,2016年果時我係13歐,如今似乎加左價,成人旺季票價:

From 1/04/2017 to 1/11/2017:
1 day Cinque Terre Train Card € 16
2 days Cinque Terre Train Card € 29
3 days Cinque Terre Train Card € 41
想知最update既票價,就要睇官網啦。
更多票價資訊: http://www.cinqueterre.eu.com/en/cinque-terre-card

去到現場既實況係架架車都full曬咁,都無人check票,不過個人覺得16歐呢張pass價錢相當合理,(加上經過Florence一役)我唔鼓勵逃票:D 。而見到買單程火車票果條隊有時都好長下(原來咁多人唔買pass#oh# ),你有pass就可以見到車就跳上去,唔洗排餐傻買車票,望住架車走。#bye#

買pass地點方面,我地係係La Spezia Centrale 既 ticket office買既,早上去到成個車站都係人,Ticket Office 超多人,可以以迫黎形容[sosad] ,請小心保管財物:-] 。買Pass果度係有條龍既,不過Flow得相當快,唔洗嚇親:D

我地買完就求其跳左上車,點知果架係意大利版既特急線,一野將我地由La Spezia站車左去最尾既Levanto 站[sosad] skip曬中間D村既站,[sosad] 所以記住睇清楚先好上車。#yup#

行程幫手:簡介五條村觀後感

每人適合自己既行程都好唔同,係度我會分享下五條村既觀後感,等大家有個參考,計劃出適合自己既行程。頭先講過,每個站我地都落左車,但實際上我地剩係去左四條村,個人覺得景色既值得去程度,我會咁樣排:

Manarola > Vernazza = Riomaggiore >>> Monterosso al Mare > Corniglia


Manarola
第一位最精彩既位我覺得係係山邊果個觀景徑望返去條村,就係有山有水有村落,懸崖上有條村係度,係幾型^3^ 。當然你都可以話呢個位係影相公廁位[sosad] ,但呢個位我覺得真係靚。:)第二、三個各有我鐘意既位,排唔到[sosad] 兩個我都鐘意。
Vernazza方面,
如果上埋Vernazza既山上面望落去應該會更精彩。
佢個海邊好熱鬧,個景色都非常之「我心目中既意大利」#love# ,果陣意大利風情濃到呢。:P流曬出黎。
Riomaggiore 就真係好有漁村既感覺,因為佢既岸邊真係有個位係比船落去,有D漁船泊係度,有一種D村民真係係度住同落黎打魚、行船既感覺[bomb] [bomb] ,無咁景點feel,係有種大澳果種漁村氣息:)


排第四既 Monterosso al Mare ,個人覺得佢既賣點係沙灘[sosad]
同前3個唔同既係前3個唔係陽光與海灘黎(雖然Vernazza 有個位D人好似係度玩水),而呢度係一落車就見到一個沙灘:D ,一條長長既海岸線,最右邊仲有條伸延出去既大石壩,係果邊影相同吹海風好舒服^3^ 。不過我去完完全無視左佢條村[sosad] ,睇返d相,見到原來條村就係沿住沙灘既果排屋仔(?)呢個村落既景比起前三個黎講就無咩特色,但夏天黎到享受下呢個沙灘都唔錯:) 。不如漁村景黎講,呢個的確係遜色不少啊。


Corniglia係個我無真係去既一條村,一落車果個無邊際海景我覺得係幾靚#yup# ,好藍好藍,但去睇村就要行下山。睇網上圖片,佢就係一個係山上面既村落,都係果句,相比起頭三位既地貌,佢就真係比較普通,整體好似唔係好精彩,所以覺得有時間可以睇埋,無時間又攰既似乎可以好似我地咁skip左。(利申:無去,話唔定好正我地唔知[sosad] #ass#

網上圖片:

因為我地一野搭火車飛左去最遠既站,於是我地行程就係由離La Spezia 最遠既 Monterosso al Mare 順住遠近,一路掃返去La Spezia,行程次序係:

Monterosso al Mare -> Corniglia -> Vernazza -> Manarola -> Riomaggiore -> La Spezia :)

美食

以係街上面既觀察,呢度既出名食物相信係 Ligurian Trofie al Pesto,青醬Pasta :) 呢種麵款係香港比較少見,呢度就好多#yup# 緊係要試試。:)


更加得意既係,可能人多過餐廳座位[sosad] ,呢度係興 take away pasta,D人會拎住一杯呢D Pasta係街食,

唔好睇佢青BB,好惹味架^3^ ^3^
佢仲有Pesto版本既千層麵!Lasagna al Pesto


可惜我地無試到Lasagna al Pesto#:)#fs

詳細遊記請看下篇!
………………………………………………………………
歡迎 Like Facebook Page 緊貼最新既遊記及攻略 : 芒果豆腐花遊記 
Advertisements

Leave a Reply

This site uses Akismet to reduce spam. Learn how your comment data is processed.