【攻略 買歐洲機票教學】想買到平價歐洲內陸機票 你絕對要知既正確次序同變通玩法!

點樣可以買到內陸平機票?

template29
睇過我Budget篇既人都知,我地買機票每張係唔會買貴過400HKD既,多數唔洗300HKD就買到,而我買到既原因,絕大部分原因都係計劃出黎,唔係用咩奇特方法搵discount搶返黎既。呢篇,我會分享下點樣可以令自己可以更輕易搵到平價機票。重申,係「搵到」,唔係「變到」!

先講一下最基本策略:

  • 先到先得

平機票係先到先得,越早買就越多選擇,我多數兩個月前買定,因為如果最平既機位被人買左,剩返既就會貴一截。以我經驗,由起飛3個月前起觀察,我剩係見過機票越黎越貴,無見過越黎越平,你買兩個星期後既機票,搵到平既就真係你好彩。

  • 行李唔寄艙

我既機票全部唔包行李費,因為行李篇提到,我只會backpack一個唔洗寄艙既行李,咁樣絕對會幫你慳到唔少錢!

  • 嚴防廉航陷阱,減少損失

例如Ryanair會出發前幾日send個好似平時提醒即將飛行既email比你,叫你做定網上check in,如果你以為只係溫馨提示skip左,你就奶野啦——所有登機前2小時仲未網上check in既乘客,就必須機場櫃位check in,而絕大部份廉航都會有免費櫃位check in,但佢唔係,Ryanair櫃位check in係要繳交(其實係罰)手續費 55歐/人(我當年就試過一獲啦,果時「只係」20歐,估唔到時隔兩年狼死左,加左一倍幾)。

  • 先買機票,後plan內陸路線

你行程改動既彈性越高,搵到平機票既機率就越高,所以我成日話,要優先處理買機票事宜,其他行程全部就住張機票黎plan!否則你搵機票時,就會被所有定好既行程纏身啦。

搵到平機票方法成功率低於5%既情況係:你已經plan好曬所有路線、住宿、行程,剩返機票未買,然後話,「我想係5月25號早上由Amsterdam飛去Rome,等我睇下有無平機票先!」你既結果95%會係:

螢幕快照 2018-05-01 上午12.06.59.png
要日子、機場、時間都撞中平機票,真係抽獎咁抽真係有的話,恭喜你;無既,只見到成千蚊既機票都好正常。所以我係交通攻略篇就有段紅字提到,所有野之中,要plan左機票問題先,優先買機票,之後既行程再就住佢黎計劃!


買內陸機 經驗分享 及 建議方法

要買到平機票就好似玩一場解難遊戲,我同大部人一樣,
skyscanner 既,計劃次序如下:

Exchange / 幾十日長途旅行超彈性玩法:

(非超彈性玩法請看下一個大標題)

  1. 呢個係難度程度0既方案。由我荷蘭既城市出發,最近既機場係Brussels,一個十幾日既歐遊行程,要令買到平機票既機率增至最大,我永遠唔會心入面限住今次要去咩國家咩城市,而係去邊都得。所以,上到個網,首先係 set出發日期、起點城市,而目的地就set做 Everywhere。今次日子就揀19/9 做例子先。去邊都得咁有彈性,你實好易搵到平機票。
    螢幕快照 2018-05-01 上午12.00.02.png
    — 記住揀埋nearby airports,因為一個城市可以有幾個機場,機場越多,班次越多
    記住就算二人行,都揀一人,因為e.g. 有時佢剩返最後一張100蚊既,你揀左2個人,就會show 2張 199,但你分開一張一張咁買,就可以買到一張100,一張199,平均洗費就會低左。
  2. Search flights後,一堆200蚊都唔洗既機票就出曬黎,求其揀個去玩都開心,如果全部都貴點算?試下早一晚、遲一日出發啦。
    螢幕快照 2018-05-01 上午12.00.10.png
  3. 打開果個國家名,就會見到有咩城市可以去:
    螢幕快照 2018-05-01 上午12.00.22.png
    哇,可以去Krakow呀!唔好咁開心住…
  4. 睇埋時間先。
    螢幕快照 2018-05-01 上午12.01.04.png
  5. 當我見到呢D衰時間,就會返返去睇其他城市,放心,平機票絕對有靚時間,唔好屈服。今次試下一野飛到西班牙先!
    螢幕快照 2018-05-01 上午12.02.08.png
    睇下,巴塞隆那既機好fit!
    螢幕快照 2018-05-01 上午12.02.23.png
  6. 好吸引啊!但唔好咁快買住…小心去左返唔到黎…睇埋回程方案先。
    當你有15日左右玩西班牙,咪睇下13-16日後西班牙會有咩機返黎:
    螢幕快照 2018-05-01 上午12.35.41.png
    螢幕快照 2018-05-01 上午12.32.27.png螢幕快照 2018-05-01 上午12.35.50.png
    咁多機,輕鬆啦!開曬所有有興趣既機出黎睇下,再揀個fit既,當然唔會特登返返去巴塞啦,揀其他城市例如馬德里既機票,
    螢幕快照 2018-05-01 上午12.32.45.png
  7. 210 HKD絕對無問題,即係話,你個trip就會係19/9 早上去Barcelona,2/10號由Madrid返黎,有14日玩,去程、回程加埋只係 210*2 = 420HKD !咁你已經可以拍板比錢了,接住你就可以再慢慢計劃點樣由巴塞慢慢玩到返去Madrid啦!

另外,如果你心中有個必去地方,但唔知幾時去最平,就可以揀好曬出發地、目的地後,日子揀cheapest month,一次過睇曬幾時去最抵玩:
螢幕快照 2018-05-01 上午1.16.49.png
佢就會彈佢搵到有既最平月份比你:
螢幕快照 2018-05-01 上午1.18.03.png然後佢就list曬呢個月每一日有既機票價錢,你仲可以慢慢咁睇下其他月份邊d日子啱心水,買你想買既機票。

疑難:如果搵到去程靚飛,但該國家回程無靚機返點算?

你可以試下其他附近機場,又或者係中間 ,例如 day 6 試下搵由西班牙去其他國家既機票,轉係果度玩幾日,再返返去自己城市。Exchange、長途旅行就係咁有彈性,你鐘意早d返又得,無啦啦去第二度又得,去唔到既地方留返下一轉出行再去都得。都係唔得既,出大絕啦…成個行程倒轉行(飛madrid->granada->barcelona返變 飛barcelona->granada->madrid返),話唔定你會發現驚喜,發現一set平好多既來回票!

非 Exchange,無咁有彈性情況:

如果你係由香港去十幾日,係機會難得既歐遊,無得求其去邊就去邊,比較有目標既,

  • 例子一:你已經買左香港去巴黎入,羅馬出既機票,有15日,中間d國家唔會去,咁你plan所有野之前,首先就係睇巴黎去意大利既機票,因為一但計劃左其他野,你就唔再有彈性:

一、睇曬旅程中期例如 day 3-8 有無咩平機票一野由巴黎去到意大利任何一個(最好羅馬以外)既機場。(search既方法同上面幾張圖一樣,起點揀巴黎,目的地揀Italy ,日子就手動去睇曬幾日)

二、意大利咁多機場,其實幾易有,如果理想地day 4、5 就有平機票就fit,玩完巴黎就可以去意大利:eg, Paris -> Florence / Paris->Venice/ Paris -> Milan,再慢慢玩返去羅馬。

都係果句,一定係搵完機票先plan內陸路線,唔好plan好曬意大利條路線,然後指定一定要從巴黎往威尼斯著陸,你搵到平機票既機會會低好多好多。

但如果day1-7去成個意大利都係得貴機票,到day8先有平機票,不過純玩巴黎撐唔到咁耐點算?試下考慮幾日即日來回法國巴黎附近既小鎮 玩到day8飛,或者玩完巴黎慢慢玩落法國中、南部,然後係中南部d機場出去意大利。總之你一日未book酒店,中間d行程點轉都得架姐,所以就算你無exchange咁有彈性,但都唔係完全無彈性,只要你個人夠彈性,就無問題啦。

但假如你話你一定要day4就飛意大利,因為想意大利玩十日,可以點算?抱歉,我只能叫你比多幾舊水day4直接飛過去(睇你想儲起幾舊水多d,定想要理想旅程多d),或者搵(通宵)巴士火車。

三、買左張機票,開始plan內陸行程同交通住宿。
(唔建議等埋火車巴士酒店一齊比錢,因為機票真係平機位唔多,先到先到,你target果張好快就會被人搶左去,剩返貴左百幾蚊既票,到時就心都痛啦。)

  • 例子二:如果你係9月10號 – 25號從香港飛去比利時,比利時入;比利時出,但想中途去一去布拉格,雖然聽落好奇怪,但其實都唔一定會貴d,歐洲機距離同價錢無必然關係架。

一、起點set 比利時既機場,目的地set 布拉格,日子set whole month 9月,一次過睇曬你旅程期間幾時去最好
螢幕快照 2018-05-01 上午2.06.44.png

二、睇下中段邊d日子去最fit,以下黎講就target 16號啦
螢幕快照 2018-05-01 上午2.08.12.png

16號既機有以下既,CRL係個交通比較煩既機場,重點係時間唔靚,同埋去CRL比去BRU係要搭多程百幾蚊既車,所以其實佢地成本係差唔多,所以呢個case寧願比多d錢揀第3班機。
螢幕快照 2018-05-01 上午2.09.27.png

四、同用樣方法,月份式咁睇回程有咩機,再前後幾日揀下。
螢幕快照 2018-05-01 上午2.13.40.png
五、見到d時間、價錢都唔錯,咁就可以拍板買 16號1950班機,同21號1740班機啦,四個full day既布拉格之旅咁就搞掂啦。

你甚至可以回程唔揀比利時,揀Amsterdam、法國巴黎等城市黎飛,慢慢再陸路玩返去比利時,再搭飛機返香港!總之最重要都係識得變通。

如果以上方法我都試過都搵唔到平機票,點算?

如果內陸機點搵都好貴既,就連附近細機場都係好貴,點算呢?你只能做既,就係放低執著,雖然咁講好膠,但的確要咁,先做到以下其中一個既決定哈哈哈

一、有D國家既機之間既機其實永遠都要過千蚊,例如 Croatia <-> Hungary之類,長年都係過千蚊,咁你不能執著一定要點到點咁飛,你可能要飛個d機票會平d你又有興趣去既中轉國家城市(例如 italy 既 florence)玩下一兩日(最好玩下,唔係既變左轉機就感覺好傻),先再飛去Hungary,當然啦,中間既時間、兩程平d既機加埋可能仲貴過你一張貴機票,睇你點取捨!

二、第一點講既例子,你都可以唔執著於只玩本來決定要去既地方,你可以試下加入新地方,由Croatia陸路玩到去鄰近既Sarajevo,再飛去Hungary,就可以平更多。

三、放低對省錢既執著,食左張貴機票…

四、放棄目的地,去第二個機票平好多既城市玩。

講到尾,你只能盡量將買到平機票既機率擴到最大,
但你始終不能忽然變出一張平機票!

以上,就係我買歐洲內陸機平機票既心得啦,其實無咩特別,總之要訣係:
優先處理買機票事宜,其他行程全部就住張機票黎plan!
用盡各種變通方法都無既,就要接受現實了~


大家既支持就係我分享既動力 
歡迎 Like Facebook Page 緊貼最新既遊記及攻略 : 芒果豆腐花遊記 

 

Advertisements

Leave a Reply

This site uses Akismet to reduce spam. Learn how your comment data is processed.