【歐遊新手必看攻略 尋找歐洲交通、車票方法】歐遊交通起步攻略 (巴士、火車、機票、渡輪)

呢一篇,係想整合同分享一下我地歐遊時如何計劃、搵到同買國家之間、城市之間既車票或機票既,另外仲有一D常見問題既資訊,以及推薦一個外國交通超級大全網站。

template34.jpg

計劃程序

  • 搵交通先定酒店先?

首先,歐遊黎講,我習慣揀好城市後,會先計劃市際交通,再搵酒店,target好曬要買既車票同住宿,然後先一次過拍版落訂。基本上,我唔會建議揀完城市就即訂酒店(除非免費取消),再慢慢搵交通。因為

— research左交通先,你先會清楚酒店位置應該揀近邊個火車站定係應該近巴士站,有d城市有好多個大巴士站同火車站遍佈四方,我都試過一野揀左個其實我完全唔會用得著既大車站附近住。

— 有時d班次可能一日得一班,無咁彈性,你係邊度留幾多晚都好視乎你訂左幾點既車,有左班次先,比較好預。

— 唔會訂曬先發現架車要搭好多粒鐘,想改係中間加多個城市住一晚做個中途休息都唔得。

—及早知道邊d位要買機票,優先處理買內陸機票既問題。

— 最重要既係,試過有人一野係個大城市訂好曬幾日既酒店,諗住去周邊小鎮玩,但搵交通時先發現果d小城其實超遠,根本好難即日來回,又或者即日來回果d地方好浪費時間好兜路,順住搬酒店咁玩過去仲好,但都已經太遲,我都幫唔到佢,因為所有酒店都比曬錢,而且無得取消,局住每日用好多時間來回搭車或放棄果d地方。

不過我都唔會建議一見啱既車票就買左先,再慢慢搵酒店,因為有時有d地方酒店極貴,你可能需要住係另一個車站果帶(成尼斯變Mestre,五漁村變La Spezia)/改成訓多晚前一個城市,翌日早上先搭過去玩,咁你一早訂曬d車票就改唔到,要局住住貴野。所有野夾好曬先一次過比錢,點都穩陣D。當然,呢個過程應該要係兩日內一次過完成,拖多幾日,D房隨時被人搶曬。

  • 應該搭巴士定火車定飛機?

由城市A去城市B搭咩好,計劃次序如下:

  1. 先去 Google Map 或 Rome2Rio  睇下兩個城市陸路 包括直通巴士同火車 要幾耐
    .
  2. 個人只能容忍搭5個鐘內既車,所以5個鐘內既車,會順住下面做— 首先睇巴士,因為多數都會平過火車十幾二十歐,十零歐可以兩個鐘左右到既巴士,都係好既deal,以下網站好多時可以搵到各巴士公司既班次:
    Checkmybus.com 、 getbybus.combusradar 等等
    *注意有時巴士會遲到或塞車

    如果巴士要三、四個鐘,班次疏到唔啱用,我會睇埋火車,如果火車一程過、快一倍但二十零歐內既,都會考慮轉火車。但時間無快到又貴左,或者要狂轉車既,一定會揀返巴士。
    *注意有時火車會遲到或罷工

    基本上火車車票、班次我都會先睇 trainline europe 或 raileurope.hk 望下有咩火車公司既路線,有時同一條線會有幾間唔同公司既火車營運,所以上中介網睇到比較全面既情況(瑞士反而我只睇官網),揀啱既就買或者再上返果個公司官網買,因為有時中介網會有d服務費(trainline無),但更重要既係佢可能唔會顯示到部分既折扣車票,或無顯示某d票種。

    每個國家既火車購票玩法都可能有d唔同,呢個時候如果想了解多d, 例如 洗唔洗提早買、邊度買、當地有無交通pass等資料,我會上外國交通超級大全網站睇資料:
    The Man in Seat Sixty-One 既歐洲車票果版
    螢幕快照 2018-05-14 下午9.28.51.png
    http://www.seat61.com/Europe-train-tickets.htm#Important_tips
    佢仲有分國家、城市咁介紹當地交通,有咩passes都會講埋,所以幾好用,推薦使用!如果你玩極都係係同一個國家既城市內不斷移動,記住研究埋當地既鐵路pass。

    — 如果巴士同火車都要狂轉車,甚至呢d網都話無方法既,我會上網睇下人地有無其他例如共乘、shuttle bus之類既方法,例如CK <-> Hallstat 就可以搭 CK Shuttle,會方便、快好多。

    — 如果係小島,不設陸路,例如 Santorini,其實唔一定買機票,你可以研究下搭船,係渡輪網可以搵到,例如 http://www.go-ferry.com/ 。如果係跨國交通,而且係沿海城市,你都可以設下睇下有無得搭船前往。而前往Croatia既Hvar,你都可以search 「Hvar ferry」 實有好多網站幫到你!
    .
    .

  3. 如果陸路點都多過5個鐘既,會有 3 個方法
    — 絕大部分情況下,我都會係兩城中間加插一個中途城市半日遊 或 stay一晚,歐洲咁多靚既小鎮,要做到呢樣其實唔難— 如果兩個城市超遠而又唔想夾硬加地方係中間,例如好似由荷蘭去到布拉格既,我會搭內陸機,一般內陸機單程300HKD以下為合理,最盡只能接受500HKD。記住記住,逢親有搭內陸機既行程,一定係優先買左張內陸機機票先,再繼續plan其他交通路線、住宿,因為飛機既班次疏好多,一定係行程就住機票去plan,而唔係要機票就你個行程,除非你身家萬貫,比幾多錢搭飛機都無所謂。
    》》》詳細玩法,原理可以睇內陸機票攻略篇

    —自問係好chur得既人,你可以考慮通宵巴士或通宵火車,而我就…不了,所以我係呢方面係無經驗分享。
    .
    . 

  4. 揀好班次後,mark低 / save link,睇埋酒店後就可以拍板訂購喇。

其他常見問題

  • 點樣可以買到內陸平機票?

睇過我Budget篇既人都知,我地買機票係唔會買貴過400HKD既,多數唔洗300HKD就買到,而我買到既原因,絕大部分原因都係計劃出黎,唔係用咩奇特方法搵discount搶返黎既。詳細玩法、原理可以睇內陸機票攻略篇

  • 呢程巴士/火車洗唔洗網上買定車票先?到時買有無分別?

    • 巴士
      • 巴士車票黎講,遲買多數唔會加價,問題係你越遲買,車票平既班次會被人買曬,甚至連唔平既都被人買埋,就可能會無巴士搭。所以,旺季建議買定以免賣曬。另外,巴士有時會推出早鳥價惠,例如英國搭megabus有時early-bird可以3鎊(當年1鎊都有)就搭到原價6-12鎊既車。
    • 火車
      • 對於好多位既火車車票洗唔洗提早買,可唔可以到時先買票,最基本原理係:
        • 高鐵類既高速列車
          例如TGV、Thalys、 ICE、RJ呢類名既高速車(High-speed train),多數都好似機票咁,早買係會平D,因為價惠車票係數量有限既,平票被買曬就得返貴票,臨上車前買基本上係一定會貴到飛起。
        • 其他國內正常/快速列車
          多數叫IC、EC呢D 快速長途車,正常情況下都係固定票價,即係早買、遲買都係一樣價,原理好似你MTR買車票咁,臨上車前先買都得——只要你唔打算加錢劃位(短途車有機會會無位)。不過,有時個別火車公司有D Promo 可能會有早鳥價一律19.99EUR / supersaver 咁都唔奇,所以我唔會話你可以坐定粒六到時買,想知你心儀果個班次冼唔冼早買,只要search聽日果班同兩個月後同一班車,比較下個價錢就知了。因為個個鐵路D車種名都唔同,強烈建議你買另一個國家既車票前,先上 www.seat61.com,了解下當地鐵路既玩法!

以上就係對歐洲交通車票購買方法既一個基本整合。


大家既支持就係我分享既動力 
歡迎 Like Facebook Page 緊貼最新既遊記及攻略 : 芒果豆腐花遊記 

 

Advertisements

Leave a Reply

This site uses Akismet to reduce spam. Learn how your comment data is processed.