【經驗分享】九次歐洲體驗Airbnb後感想——盡量唔會再住Airbnb

template40

係歐洲玩左百幾日入面,我地主要既住宿都係有私人浴室既酒店,比預期中少用Airbnb,我地數返,我住Airbnb既次數係十隻手指都數得曬,無記錯既應該係9或8次,點解話「或」呢?因為其中一次屋主失左蹤,無真係住到。

去旅行住宿,Airbnb絕對唔係我既首選,首選一定係住酒店,然後會考慮booking.com上既旅館,或者hostel既連浴室私人房,如果全部都太貴,就最後先會考慮Airbnb。而過左學生時代後,以後旅行我都會寧願比多少少,直頭可以話如非必要,我都唔會再住 Airbnb。

點解我要盡量唔再住Airbnb?以下會分享下我過去幾次住Airbnb得出既感受同經驗。

首先先簡略講下我8次選擇住Airbnb既背景:
第1、2次:想試下住airbnb,一次過book左2間
第3次:當地搞大型活動,酒店房價倍升,住airbnb以節省費用(但被放飛機)
第4、5次:因為上一次被放飛機後得到滿意既解決方案,比多次機會,一次過book2間
第6 – 9次:同朋友去旅行,太遲book,當地房價貴,跟大隊一齊book左4間airbnb

而只係9次airbnb既體驗,我都已經中左各類型既伏,下面會分享下:

一、可能遇到極不負責任 或 極衰 既屋主

若果你住屋入面其中一間房,你都可能可以輕易搵到屋主解決問題。不過,若果你住整間公寓(Whole apartment)既話,有問題就唔係好似酒店咁打個電話/落一落Reception就有人幫到你喇…有次最經典係我地仲搞到差d命仔不保…哈哈哈

最經典一次係我同朋友住一間法國里昂既Apartment,身在非洲既屋主自從託佢親戚交左間屋比我地後,就好似當左間屋唔關佢事咁,我地果時要用歐洲果種要自己扭開煤氣定石油氣+用火槍tart既煮食爐,煮完野食後,就扭返關個氣罐,但之後佢好似仍然不斷釋放d氣油味,我地已經扭開又扭關,都仲有味,扭到已經分唔到係關左定開左個氣罐,於是當然就打比佢親戚啦,但我地打唔通,於是就Whatsapp屋主,但屋主以極惡劣既態度叫我地唔好搵佢,有咩就搵佢親戚,我地表明搵唔到佢親戚,佢就問點解會搵唔到……哇我實知道點解啦!之後佢就話關左個氣罐就得架啦,我鬼唔知你呀媽係女人咩,而家就係關左都仲有味先要問你,佢又唔肯幫手搵佢親戚,亦唔答我地點先叫關左個氣罐,一味叫我地快d解決佢唔好燒左佢間屋,係咁話咁樣好危險,一味叫春……於是今次真係睬佢都有味,我地做左一萬次實驗都唔知究竟扭左定扭右先會無味…全日就開曬窗咁希望d氣會散出去,唔好搞到我地中毒……於是成日全屋都有陣氣油味…我傍晚訓左陣再起身都仲有…直至晚上十點幾十一點,終於都無味啦!!因為d氣睇黎已經釋放曬出黎…[sosad] [sosad]因此,我地接住落黎果2、3餐都逼住無得用已經買左既食材煮,因為d氣放曬出黎,開唔到爐,一定要出去解決…不過執返條命都算係咁。

另外,我朋友亦係柏林既airbnb住過一間房,但成個過程都被屋主以惡劣既態度對待,亦好多奇怪規矩同佢感覺自己因為係亞洲人而被佢歧視,住得非常唔自在。

有趣既係,呢兩間屋係airbnb上面都係好評如潮的。所以,如果遇到好屋主就可能無乜野,但唔好彩既話,絕對可以破壞你成個旅程,同埋你對一個城市既感受,甚至命都無!

二、位置透明度太低,難以揀到真正靚位既屋

經過幾次旅行後,我唔想住再離車站多過10分鐘(最好5分鐘內)既住宿,因為到埗後要揹或拖住行李行十幾二十分鐘路程好麻煩,如果遇正落雨、大雪就更加唔洗講有幾大問題。
但因為保障屋主,你未落訂間airbnb,好多時候你都唔會知道間屋實際位置,只會見到地圖上一個頗大既範圍,求其係上面篤一間住宿出黎做例子:
螢幕快照 2018-06-16 下午12.06.38
佢多數會以一個圈圈住一個範圍,而呢個範圍粗略對比google map既路程計算,係起碼超過15分鐘既步住路程。

螢幕快照 2018-06-16 下午12.08.33

所以基本上你只能靠屋主自己講既描述黎估算,無法自己睇下佢附近有無某d路線既車站、店舖等,或睇下果頭d街道係點,再作決定,呢點我就唔太安心。

而每次我都係搵d個圈圈一野達落個地鐵站或火車站既bnb,諗住應該會靚位時,最後得出黎既結果係,我地要行d小巷十幾分鐘先到到車站…d路仲要係無人既小巷,因為果度通常都係d住宅區,唔會熱鬧得去邊。所以,係airbnb住正靚位住宿,真係抽獎咁抽,可遇不可求。

三、要事先與屋主約定時間,缺乏彈性,瑣碎麻煩

約左人唔好遲到大家都知道,不過旅行往往可以發生好多意外,好既可以係意外路過一個幾靚既地方想留多陣影下相、食下野,遲幾個鐘先到酒店 check-in,唔好既可以係行程、交通延誤,亦有一d情況係你比預期中早好多到達目的地,就算未到check-in時間都想搵個地方放行李先。

面對呢d情況,如果你接住落黎住既係24小時前台既酒店就輕鬆無問題,但當呢d意外發生係你約好左Airbnb屋主某個時間搞check-in既時候,你改時間又唔好意思,有時甚至係情況不許可或講明遲過某個鐘數就要罰d錢等等,因為屋主唔係24小時前台黎,佢都要做野,或者上一手未走你無得放定行李先,唔能夠隨時話想早d就早d,想遲d就遲d。再加上你到左就要同佢打電話約黎約去,除左打歐洲電話有時又要加0有時有d位又打少個0,打好多次後終於搵到屋主,但有時可能佢又遲到,你就要係門口企返半個鐘等佢黎,佢一句唔好意思就算,總之成件事就係瑣碎但麻煩,所以我都係鐘意自己任何時候行入酒店就放低行李、check-in既感覺。

四、自助Check-in似玩解難遊戲

有D airbnb會提供比較彈性既方法,同你講如果你同佢夾唔到check-in時間,你可以自己拎鎖匙入屋,然後就會比一系列既指示你去拎,有d輕鬆既可能係去附近佢相熟既餐廳度放低條匙等你去拎,不過有d係放佢條匙係一d好隱蔽既地方,或者樓下信箱度,而d信箱係寫人名唔係單位號碼既,你就要慢慢係n個信箱入面搵佢個名出黎,再按指示上去,有次我上到去見到有幾個單位,但屋主無講自己邊個單位,於是我就要估下邊間最似airbnb,再望下d鎖邊個似會match我手上條匙…再用條鎖匙每個單位都試下……果下真係心諗,完未啊!!!我要放行李啊!!!好彩第一間一插就入到…否則可能被人當賊捉左…

總之面對自助check-in,真係好有玩解難遊戲、密室逃脫既感覺…

五、實際比圖片望落細係基本

Airbnb請專人到單位攝影,用上廣角鏡後配上好既角度,細屋都變大屋,當你想像自己會住一晚千幾呎幾屋,到頭來可能見到既只有五、六百呎。我試過用廣角鏡影自己客廳,即時變到成間大屋咁,不過Airbnb住宿黎講,大細都唔係最大重點,唔係劏房咁細就得啦,但下面既問題就難講d。

六、屋內設備可能有問題,就連大門同床都可能係爛既

無錯,住airbnb的確係有間屋你住,設備亦同網上所見一樣會提供,但用唔用到就係另一個問題啦,你唔能夠知道佢入面講既野有無壞既,就算壞左你亦無得話換房就解決到…

回想起頭幾次住Airbnb 既經驗,係次次都有野壞既。

第一次係Vienna既住宿,電視、房燈、沖涼熱水爐(呢個佢話有時會無熱水,教埋我地點做就解決到,但我地果時用就無壞)等都係壞既,而個煮食爐因為同香港用法有d唔同所以一度以為壞既,所以搞左就黎一個鐘先煮到野,仲有個洗碗盆既水喉只有凍水,係近0度既天氣下,水喉水就同冰水無分別,一路洗碗要抖陣先洗到落去,因為凍到手都彊埋;第2日佢大廈部老爺𨋢都壞左,好彩只係行5層。但最最最大問題係,張床爛既…好記得坐落去轉個身,床板舊木已經蹋左(利申,體重唔夠50KG,應該唔足以坐爆一張正常既床),一訓落去直頭好似地坎咁…一野下墜,最後左邊床正常,右邊床部分凹左,第2日背脊都痛埋。相信張床根本一直都係爛既,每次轉手後屋主就係咁依tune一tune返好就算。 經過呢次之後,感覺睇黎就連住 airbnb都要先驗樓。(雖然之後我地並無咁做)

第二次住Airbnb係匈牙利,今次屋主幾好交帶,同我地講佢間屋個門係壞壞地既,要用某個方法先關到大門,仲即時示範比我地睇,但個方法都幾難即時學到,於是佢走左之後,我地就再無成功關過個大門…兩晚都無真正鎖好大門咁訓覺、出外玩。好彩佢門外有個鐵閘,所以閂好鐵閘後,大門係咁依扮閂左都勉強叫「安全」,不過都係有d不安,始終歐洲治安都好一般…

第三次住Airbnb係無住到…因為屋主當日失左蹤…一野飛去講第四次…第四次係只係住一間房,所以要用共用浴室。係除曬衫準備開水果下先發現,個水喉無熱水……開極都得冰水…於是我就著返曬d衫去搵屋主。屋主個反應絕對係習以為常,拎左幾個士巴拿去整下整下,幾分鐘後就搞掂,所以好明顯個水喉係幾日就失常一次,佢都整到熟曬手,拎咩架生、點整法都非常清楚。佢整好之後就正常返,有水力好細既熱水涼沖啦。

第六次,呢間我地租左private room,不過間房門係無鎖既,你真係同屋內既屋主及其他租客講個信字,萬一有人半夜潛入你間房,你都唔會知道架。果日我d 朋友未到住宿,我自己一個係間房度訓左個晏覺,出面就係男屋主同其他房客路過、出入佢地房門呀、傾計既聲,我又鎖唔到門,初頭都有d訓唔著哈哈哈。

第七次,就係最經典既,上面第一點講果個閂極都閂唔到既氣罐……

七、屋主絕對有機會臨時失蹤、取消booking,你會浪費幾乎一整日既行程去處理

當時因為利物浦當地搞個大型比賽,所以果兩晚酒店價格就貴到飛起,千幾蚊一晚,於是我地唯有再試下住Airbnb,最後揀左間要從利物浦市搭程車去既一帶民居度住,咁就比市中心既價正常。點知我地係大風雨下搭到入去,正想搵屋主,屋主完全唔應機,打左好多次電話都無人應,比約定時間過左差唔多四五個字都未出現過,所以決定搭返入市內,搵間M記坐低搞掂佢。

第一件事當然就係搵Airbnb客服,而且係要打電話搵。有趣既係,當時(而家唔知啦)我地係英國既airbnb網站上面係難以搵到一個電話,只有電郵係可以搵到CS。電郵既話,相信我地離開利物浦佢都唔會覆到我地,於是男朋友就用盡所有方法搵,搵左好耐,終於都搵到一個法國定德國果邊既airbnb客服,打左過去之後,就叫佢轉駁去英國果度,每一次打過去同轉駁都要等起碼5-10分鐘,因為CS d線好繁忙,而加上我地當時用個19荷蘭電話plan係打唔到好耐既長途電話,所以成日打打下就斷線要重新黎過。當我地終於成功同一個英國Airbnb職員講到呢件事後,就要再經過一輪佢地既查證同等待佢地既回覆,最後成件事搞左近三、四個鐘,終於得到一個理想既答覆——佢地會退款及額外賠多百幾鎊我地做返個住宿津貼,比我地即時搵間酒店住。

呢個結果其實唔錯,因為我地唔洗住人地屋企既一間房仔,可以變左住市中心酒店(而且係我地上次黎住,最鐘意既果間酒店),不過就浪費左我地一日既行程,加上因為呢兩日住宿太貴,佢津貼後我地都要貼返錢先住到,而唔係唔洗錢——不過後來比左張單airbnb果邊後,佢話因為呢兩晚住宿比平時貴,佢會再額外補貼埋我地比多左既酒店錢!結果我地係利物浦既呢兩晚酒店係唔洗錢既。

雖然個客服好難搵到,用左唔少時間,但我地最後都得到一個好既解決方案同客服果邊態度一直都好好同好誠懇,於是一被人甩底後本來打算呢世唔會再住airbnb既我地,都變做可以再試下,所以就有之後再住既經驗啦。

八、airbnb上面既評價並不可靠

相信用過或睇過人地分享都會發現呢個問題,因為大家都係睇你過去比人既評價以及人地比你既評價去決定同唔同你做一單租屋既交易,你試諗下假如你中左伏,然後係review度如實咁數間野有幾差,以後仲有無屋主夠膽租佢間屋比你?相信10個有8個都會覺得你要求高、避之則吉啦。於是,為免影響日後成功租屋既可能性,又或者因為覺得屋主份人幾好人就包容下,有唔少中過伏既住客都唔會寫真話,可能唔好都講到好似好正面咁,整靚自己個「CV」,營造返個乖房客既形象,都仲未計有唔少人住完就算,未必會花時間去寫篇野(正常我有時間會打遊記,但我當時都無去即時寫返review)。所以上面所有中過既伏,我地事前睇reviews都係完全睇唔出架!!

相反,你上酒店網,好多客人都會係d酒店中介網上面毫不留情咁數間酒店既問題,相比起airbnb,酒店網既評價會比較可靠…

總結

係我幾次住宿經驗後發現,基本上9次體驗入面,真正覺得無咩甩漏既住宿只有2間,不過佢地位置都係一般,價錢亦唔係真係比酒店便宜幾多,但就叫做無伏啦,同埋有間屋主都幾sweet幾好人,果間屋仲幾靚tim! 另外,你住入人地d屋,就真係會睇到平時係街外面睇既歐式建築住宅,內裡果d結構究竟係點樣,我都係住完先知既,所以未試過既,搵一晚黎試一下,當參觀下都可以既,但以佢作為一日行程終結後既休息地,我就覺得有點冒險同一般啦。

當然可能我係比較唔好彩,住得果9次都中咁多伏,但呢d野真係好難講,即使你睇曬reviews都係避免唔到呢d地雷。係Airbnb中伏機率之高同當中所帶比我既麻煩,足以令我對airbnb卻步,無辦法向大家推薦住宿揀airbnb~

當然,因為我多數都住整間住宿,同埋我唔係個特別鐘意同陌生人交流既人,人地住入airbnb好似住到多左d外國屋企人咁既體驗我就無機會感受到啦。對我黎講,airbnb只係另一個住宿既選擇,而除非差價真係太大,或者我想試一d超級特別既住宿,否則,我盡量唔會再住Airbnb了。


歡迎 Follow Facebook page 留意最新資訊同遊記: 芒果豆腐花遊記
詳細遊記及資料整合:https://mangotofufa.wordpress.com/

Advertisements

Leave a Reply

This site uses Akismet to reduce spam. Learn how your comment data is processed.