【歐遊遊記 2018 】獨遊瑞法德奧 童話小鎮仙境遊(九) Day 4 德國海德堡住宿報告 Steffis Hostel Heidelberg — 第一次住dorm分享

atemplate9

Steffis Hostel Heidelberg 斯海德堡斯特菲旅舍

今晚係海德堡既住宿係Steffis Hostel Heidelberg 斯海德堡斯特菲旅舍,今次係我第一次住hostel既dorm(無錯,我歐遊過百幾日都無住過dorm[sosad] [sosad]),事前都幾驚自己唔慣,因為成日聽d人講成晚會唔洗訓、d人好嘈、會被人偷野之類,都驚驚地。不過可能因為我book親都係female dorm(女生宿舍),房型都係10個人以內,問題會少d,今次成個歐遊trip住左果四晚hostel既人都幾正常,11點都一定全部準備訓,唔會話成班半夜party到半夜先返黎嘈、發癲、開大燈,亦唔係好覺有咩扯鼻鼾既人,都訓得唔錯,基本上都一覺訓天光,體驗都比想像中易接受好多。今次住落都發現,雖然都係hostel,但住落細節上當然間間感覺都可以幾唔同。而家就報告下我第一次住既呢間Steffis Hostel Heidelberg喇!

海德堡住邊最方便?

首先,如果你係海德堡只係玩一日半日,唔洗住到入老城,住火車站一帶就得啦,咁就唔洗搬住行李搭巴士出出入入!我自己就覺得無咩必要住入老城,於是就揀左係正火車站隔離既一間hostel。

今次呢間Hostel位置好方便,我一落Flixbus行兩步就到。
2018-08-28 23.05.53.jpg
WMF-8026.jpg呢個時候天氣都非常好。

入到去,Hostel reception係3樓,就搭左呢度工廈feel 既貨𨋢lift上去,部lift都幾搞野,有兩層門,首先要好似醫院門咁開左呢個大門,
2018-08-28 23.15.46.jpg
入面係d大工廈果d貨𨋢,入面㩒左𨋢佢就有個閘由上而下咁落。(我拍左條片,呢個係cap圖)
螢幕快照 2018-08-28 下午11.13.15.png
WMF-05-11.jpg
閘上面有呢張紙,呢張紙既中文版[sosad] [sosad][sosad] [sosad]淘寶腔[sosad] [sosad]

搞完Checkin手續後,可以提早入房,唔錯唔錯,因為其實未到本來講既check in時間,但都有得入去先。話說呢度幾似大學宿舍既佈局,走廊、廁所、飯堂,所有野都似,個裝飾都好似,真係覺得自己入左宿咁[sosad] [sosad]

我一入到房,完全無人,但地上好多行李,睇黎個個都出曬去玩。事前我仲ff一入到去會有幾條友係度吹水,然後又要 social一餐咁[sosad]不過諗落都係,個個黎到係12點呢d鐘數緊係去玩,坐係間房度做乜[sosad][sosad]

另外我本來又以為大家住hostel會好小心個人物品,不過入到去先知原來d人會就咁開大個篋放床邊就走左去 [sosad],應該因為全部都唔值錢。但見佢地晚上都係將d手機放曬係公用既拖板度差電,都幾信得過大家,可能因為female dorm 感覺安全d掛 [sosad]我就始終唔太敢。

由於職員無講我係邊張床,第一次住hostel既我都唔知點算,就求其放d野係其中一張床(揀左上格床,有d後悔,因為個叉電問題,下面會講),放好我d行李入locker就出發。

關於呢間住宿,如果有興趣係海德堡搵「平平地」既住宿既話,
以下係我就呢間hostel唔同方面既報告,講明我係報告,唔係推薦[sosad]亦唔係唔推薦[sosad]

價錢:

我住呢晚一個床位係一晚連稅27.27歐(~250HKD),其實真係幾貴,因為我之前住開d酒店每人都唔洗250HKD晚 :~(,但自己一個去旅行就無得咁平住酒店,唯有間唔中住下hostel拉低下住宿費[sosad]無錯,所謂拉低都要250HKD:o) 不過係今次個trip黎講算平,因為今次其實我住宿平均每晚係4百幾蚊,所以兩百幾蚊一晚已經算幾平[sosad][sosad]至於今次點解可以咁貴,因為我成日住單人房,同埋今次d城市房價普遍都比其他地方高。但你比我再揀既,我會比多百幾蚊住單人房,可能因為覺得呢種住宿體驗應該係十幾歐,成三十歐就唔太值,直接比四十幾歐住酒店好過[sosad]

位置:

非常近火車站、Flixbus巴士站、市內電車站、市內巴士站,基本上係係正隔離咁。附近有個商場仔,有間cafe、雪糕店、士多(規模係細超市同士多仔之間),不過晚上都會關曬,想補給糧食就要襯早。

設施:

房內:

床—
我呢間係8人女生宿舍,入面既床係鐵架床,有Full set 床單、被袋、枕袋,要自己鋪。
後來我發現原來唔係間間hostel都有full set床鋪比你,有d係比個新既睡袋你隔開你個人同張床就算,所以相比之下,覺得係度訓都算係幾乾淨同舒服。WMF-05-9.jpg
上圖可見,呢度既床係無簾。另外,每張床床頭都有黃燈,床隔離多數有插座、地面有拖板,但呢d係下格床先用到,上格床係完全無插座 xx( xx(,所以如果你訓上面,又要差電過夜,就要冒險將你手機、尿袋、相機電放係下面差 xx((除非你條叉電線夠長),而如果訓上格床但訓覺前想用陣手機先差電就要爬上爬落啦 xx(,我就係訓左上格床[sosad] [sosad] 。我就唔敢全晚手機放下面,所以我就手機放身邊訓既,剩係差相機電同尿袋。

WMF-05-8.jpg
房內都有張梳妝枱,有紙巾,有垃圾筒,有全身鏡、有梳化。

WMF-05-7.jpg

Locker—
房內有Locker,放到大背囊既,細細地既行李篋都可能夠位,鎖頭要自備,不過可以係checkin時比5EUR按金同reception借鎖,check out時拎返錢就得了。
WMF-05-3.jpg

燈—
門口開關掣既大燈係好光既大白燈,我住果時晚上9點幾先天黑,有人8點幾已經訓左[sosad] [sosad],所以一直無開燈,當時9點幾入黑,黑左後乜都睇唔到,同房有個人超級為人著想,9點已經唔比任何人開燈[sosad] [sosad][sosad] [sosad],所以我成晚都要用手機開住電筒摸黑咁執我d野同搵野,乜都搵唔到#beat#dog ,果下真係好想自己係住單人房,入到房想點都得倒曬個袋d野出黎慢慢睇慢慢用[sosad] 不過後來搞完一大輪上床休息果時,一開床邊燈先發現,其實床邊個黃燈開左既話都可以照到全房但又唔會太光,如果其實入黑要照明可以用果盞燈[sosad]

浴室:

浴室係房外面既,係香港宿舍果類一間浴室入面有好多一格格沖涼格果種,仲有一排洗手盆,基本上個setting就公廁咁,不過呢個景幾靚,好有歐洲古老既大學宿舍feel。
WMF-05-4.jpg
佢既浴室花灑係固定係上面,無得拎住花灑沖,最煩係每5秒就停一次水,要再按過,即係好似公廁d洗手盆果d咁 :o) :o)
WMF-05-2.jpg
我自己就最唔鐘意呢類沖涼設備,沖個涼按十幾萬次水,沖到燥曬 :o) :o)沖涼既質素真係好影響我對個住宿既評價,因為呢個沖涼設備,我好想轉曬之後d hostel做酒店  [sosad]不過因為全部cancel唔到,最後都有住埋其他果3日唔同既hostel。後來住其他hostel或者shared bathroom果d浴室發現其實hostel都唔一定係咁樣,佢地既浴室可以係成間大過貨𨋢既房就係一間浴室,自己入去鎖埋門就用得,好闊落又舒服,仲有花灑拎住用,而呢d一格格既就好窄,仲要係每格只有兩層布簾,d布簾又會隨風飛埋你度,因為窄又易整濕d衫(好彩我有膠袋 [sosad]),真係唔太舒服,加上如果你慣左貴重野跟身既話,感覺帶埋黎呢度就放邊都唔安全,因為得簾,真係放locker好過。

總括黎講,我最憎佢個沖涼設施,沖到好唔舒服。
至於廁所,好似就係獨立一間房仔黎,唔係公廁式setting。不過我對佢無咩印象,應該係無咩特別感覺。

早餐:

早餐我係walkin比錢入去食既,印象中三、四歐左右,典型歐洲早餐,就係呢d野自己拎黎食:
牛奶、cereal、包、火腿,唔記得有無蔬果。早餐個位置亦係廚房,不過我唔清楚可唔可以係度煮晚餐。

服務:

正正常常,員工都幾友善。

總括黎講

訓覺既話今次我都住得算舒服,感覺乾淨,同房又正常、無大問題,所以都一覺訓天光。
房內設備我就覺得上格床無插座好麻煩,其餘都ok,
最差係個沖涼設備,因為我唔鐘意公眾泳池式沖涼設施。
如果對沖涼設備既要求唔太高既話,呢個住宿都唔錯既[sosad] 靚位、企理。
但如果你住慣酒店,對沖涼好有要求,最好揀下其他[sosad]因為hostel沖涼設備唔一定係呢種[sosad]

下篇會係海德堡既遊記!(待續)


【歐遊 2018】獨遊瑞法德奧17日童話小鎮仙境遊 路線行程 : https://wp.me/p8A312-14I
歡迎 Follow Facebook page 留意最新資訊同遊記: 芒果豆腐花遊記
詳細遊記及資料整合:https://mangotofufa.wordpress.com/

Advertisements

Leave a Reply

This site uses Akismet to reduce spam. Learn how your comment data is processed.