【歐遊遊記 2018 】獨遊瑞法德奧 童話小鎮仙境遊(十二) DAY 5 德國法蘭克福遊記 + 一日集齊曬多種你唔會想遇到既阻滯:Miss車+上錯火車+火車延誤+錯過尾班車驚魂記

話說今日係搭車災難日,基本上無一次交通係順利,全部都係因為我既失魂(好彩其餘十六日都順利無事)。因為呢兩單野,本來無野好寫既法蘭克福遊記就變左千字文啦,先講第一單,只係熱身黎。

話說本來我就買左火車票呢日早上由海德堡去法蘭克福既。琴晚訓覺前望左望自己之前打好既行程表,見到係11:46既車,又懶得double check返張車票,覺得果時已經 check過,應該無問題,我就去訓覺,準備訓到自然醒,慢慢食早餐,hea到11:30出門口。:):)

到第2日,我8點鐘都醒左,真係慢慢係度hea:),好難得終於hea到就黎11:30,就開開心心拎車票出黎出發去火車站啦[bomb] [bomb]。一睇…我頂:o) :o),張車票係10:46開出,11:45到!!!!:o) :o)唔係11:46開!!:o) :o)[shocking] [shocking][shocking] [shocking]好膠,即係頭先我好辛苦hea左好耐時間,其實係係到整到自己miss火車。:o):o) 呢程車係20歐架!!:~( :~(仲要係non-flexible既車票,即係只能搭指定時間果一班,miss左就無架啦,要買過張。於是我心都離埋,即刻上traineline睇下今日其餘班次幾錢,即時先買火車票既話要起碼30歐:~(,點知!睇左陣見到,traineline建議我搭12:10pm果班Flixbus!即時買都係只需要6歐!![shocking]哇!!!救星啊!!#love# #love#

呢班Flixbus仲要車程都係1個零鐘,只係慢十幾分鐘!之後我就諗,點解一開始我會買左DB:o),成20歐又唔係快好多。諗落就知,因為我當時search由 Heidelberg去Rotherburg,見成段路程太遠,就睇火車,不過當時就諗漏左我分拆出黎去Frankfurt呢段係可以改搭巴士。

到左12:10分,Flixus既巴士站有好幾架車黎左,次次都好緊張去睇係咪我果架,但一直都無我果架,起身又坐低,起身又坐低。雖然之前歐遊都慣左d巴士遲到,不過因為今朝既失誤,令到我成個人都精神緊張,所以見佢咁耐都唔到,都有d不安。再起身坐低n次後,過左半個鐘左右,我果班車終於都到喇!!嗚哇,只係比少少錢就補救到我個低級錯誤,其實已經好好彩,所以遲到我都唔介意了:~(。不過無諗過呢次miss車只係是日既前奏…

係下一單災難之前,首先講下Frankfurt呢個地方同遊記先[sosad] [sosad] [sosad] [sosad] 。

Frankfurt 正式全名係美因河畔法蘭克福(Frankfurt am Main),雖然多數大家都係叫佢法蘭克福就算,但其實德國有兩個法蘭克福,所以叫係美因河畔法蘭克福先係最準確既叫法,但我當然都係會佢叫做法蘭克福就算#haha#dog。法蘭克福係德國既一個大城市,全德國第五大,佢亦係重要既交通樞紐,唔少香港人黎德國,都係飛法蘭克福架。不過,呢個地方我就覺得對去旅行既人黎講,都係當落機點就算,因為真係無咩野好做,可以話幾無聊,亦無咩地方特別靚,現代城市樣,成個中環咁,千其唔好見佢個名幾響覺得佢好重要,就特登走過黎[sosad] 我都係當佢中轉站先黎行個圈架。

到左Frankfurt,首先就入火車站寄行李。大城市既車站氣派的確係唔同既。

WMF-8443.jpg

車站入面仲有好可愛既模型,不過要比錢佢先會郁。

WMF-8445.jpg

WMF-8446.jpg

法蘭克福既火車站好繁忙,火車流量係全德國第2高。

WMF-8447.jpg

不過另一樣大城市成日比我既感覺就係,佢地多數會雜d,呢個站個Locker果頭勁大陣尿味,勁噁心 xx( xx(

WMF-8449.jpg

locker位就係呢個大堂左邊深藍色果度入去。

話說當時已經過左中午,所以其實都好餓,而係車站終於見到我好耐無食既魚魚Nord See!!

WMF-8450.jpg

睇過下我遊記既應該都知我好鐘意吹奏呢間nordsee既薯角,我真係好鐘意佢個薯角,於是當然要叫返個!!! #haha#dog  #haha#dog

WMF-8452.jpg

左下角係薯角既價錢牌,分別係細中大盒既價,

WMF-8453.jpg

因為一個中盒都已經好大,夠2個人share,於是我叫左個細既。時間無多,今個lunch我又係頹食唔入餐廳喇,我發現我今個trip真係無乜坐低食過lunch,係得晚餐先會入餐廳[sosad] [sosad] 但都幾啱我,因為一坐就要等黎等去,最後成1.5-2粒鐘先出到黎,我比較想去玩多d[sosad] 晚上先慢慢hea同食好野:P

原來細盒既醬會分開比我,以前買開中或者大盒既會倒d醬係個威化造既杯仔度,再擺係盒入面。呢樣亦係我鐘意魚魚既原因,我鐘意每舊薯塊點幾多醬就點幾多,佢唔會直接淋堆醬落去我d薯角度,搞到其中有d薯角太多醬,或者食到成手都係醬。

出去先!個站外面睇有d似Basel果個。

WMF-8454.jpg

WMF-8455.jpg

說說由火車站去古城要行20分鐘,唔知點解又係無顯示任何電車路線,剩係叫我沿住前面呢個大直路一路行。

WMF-8456.jpg

一出黎都無咩大感覺,但行落就真係覺得呢度好中環,四圍都高樓大廈,好多銀行總行,因為德國聯邦銀行、歐洲中央銀行、法蘭克福證券交易所同好多大型商業銀行總部都設立係度,亦有好多歐洲同跨國大型集團既總部都係法蘭克福。佢亦係歐盟既經濟中心。

WMF-8458.jpg

對於一心黎歐洲睇古建築既人黎講,Frankfurt真係唔洗黎,我本來亦預左呢度無野睇,唔會特登黎,只係唔想一次過搭5粒鐘車去Rothenburg,先係frankfurt行幾粒鐘再繼續去Rothenburg。(雖然因為頭先同接住既自製阻滯,結果我用左更耐先到Rothenburg[sosad] [sosad]

2018-09-04 23.29.36-2.jpg

WMF-8459.jpg

呢個係間酒店黎,真實幾靚,但睇相我唔知點解聯想起半島[sosad] [sosad],不過呢間大好多。

WMF-8460.jpg

WMF-8461.jpg

WMF-8462.jpg

行行下,見到Rossmann!仲好大間。

WMF-8463.jpg

對我黎講Rossmann就係德國版萬寧,咁啱我都預左要係歐洲買多d 沖涼同洗頭用既野,而呢間咁大,實會有,於是就當黎frankfurt shopping咁入去。

Rossmann入面我最鐘意睇佢果d專比人買旅行用品既貨架,有大量我好鐘意用既濕紙巾,仲有好多輕量裝沐浴露、洗頭水等,每樣都係1、2歐咁,我仲發現佢有比香港多既dry shampoo,我正好需要,因為次次搭完轉巴士火車,頭頂唔知點解就笠左勁多xx(,好似好耐無洗頭咁,明明我晚晚洗[sosad][sosad]。而香港d dry shampoo好劣質,萬寧買到果d都係勁臭既,見到呢度有我就雙眼發曬光。#love# #love#

呢度有好幾個牌子,我都唔識佢地,就靠包裝揀,見到有支話黑髮專用,就諗係咪唔洗噴完成頭白粉?咁又幾好,加上呢支細細支先3歐,就買左支啦。#love#

出到去即時搵塊鏡試下,初頭都幾好,因為佢真係做到無味,效果又好,真係無白色粉,但…我一望隻手,是黑色的!!![sosad][sosad]頂,原來黑髮專用就係白色粉變黑粉,結果我望一望我額頭…都好多黑炭粉係上面,好似啱啱逃離火災現場咁[sosad][sosad],仲有我對手都黑曬,拍幾多下都拍唔走d黑粉,於是頭先買既濕紙巾就大派用場…抹好後,全部紙巾都係黑色既!!痴線!!

2018-09-04 23.29.48-2.jpg

抹完之後我再撥一撥d頭髮,撥完一睇隻手,都是黑色的!![sosad][sosad]呢支野真係好伏,唔知世上除左黑人之外仲有無人適合用呢支野,於是我影完張相後,諗都唔諗就掉鬼左佢,就係下圖呢支,大家可以留意下我d手指…好似摸完舊炭咁。

WMF-8465.jpg

我一路行,d頭髮一路旭就一路染到我個額頭黑返[sosad][sosad],抹完又黑,如是者無限loop左好多次,最後都係廢時理佢,有個呀伯路過凝望住我額頭,我就知我額頭又黑左[sosad][sosad],媽啊好伏!!好想洗頭!!呢支野搞到我每兩秒就要抹一次面。

繼續行,

WMF-8467.jpg

路邊突然有間幾靚既cafe,個風格好襯海德堡。

行得越近古城,就越黎越多大品牌既店。呢頭好熱鬧。

WMF-8468.jpg

WMF-8469.jpg

行左四個字,終於開始似到老城啦。

WMF-8473.jpg

WMF-8474.jpg

教堂隔離都係要加d現代野

WMF-8477.jpg

WMF-8479.jpg

WMF-8481.jpg

有個花墟。

WMF-8482.jpg

繼續行去廣場…到啦。

羅馬廣場 Römerberg

WMF-8486.jpg

:o) :o) :o) :o) :o) :o) 不過好多野都整緊。

雖然係老城廣場,好多木骨屋,但我覺得好新淨,所有野都係一睇就知係近年建既。唔知係咪因為造得太完美,好公整,無左種古舊感。

WMF-8496.jpg

呢幾間木屋好大,係幾有特色,因為係小鎮唔會有咁大間。
本來一排咁睇都幾得意,不過有間整緊,影響曬。

WMF-8501.jpg

上面既人吊緊d野落去。

WMF-8492.jpg

廣場中心呢舊野又整緊,佢白色果碌野仲有你qr code叫大家上個網睇原貌[sosad] [sosad]

後面呢座係市政府 Stadtverwaltung Frankfurt,幾大。

WMF-8491.jpg

廣場無咩野睇,亦唔靚,於是四圍行下。

WMF-8502.jpg

呢間幾特別既。

WMF-8504.jpg

WMF-8507.jpg

WMF-8514.jpg

呢間紅木屋都幾型,咁多細緻既木架。

WMF-8512.jpg

WMF-8509.jpg

有間教堂 法蘭克福主教座堂 Kaiserdom St. Bartholomäus,入左去,純粹想搵個位坐下。

WMF-8513.jpg

hea完我就出返黎,見到有手信店,呢張postcard…設計得太精美啦!真係好想買一千張派街坊哦!  :D :D :o)

2018-09-04 23.29.49-2.jpg

呢間個樣好似教堂,但好似唔係黎。純粹個樣幾得意,影下佢。

WMF-8516.jpg

睇完呢度,都係無野好做,一於行埋去河邊。河邊有個景都唔錯,不過都唔係咩特別野。

WMF-8519.jpg

WMF-8521.jpg

WMF-8526.jpg

WMF-8534.jpg

呢度係幾舒服既,黎到Frankfurt唔知做咩好既話,直接係度坐全日算。(我好似對呢度所有野都不太欣賞#haha#dog )

WMF-8535.jpg

呢度有路軌,但我完全唔見有車經過。[sosad] [sosad]

WMF-8538.jpg

WMF-8555.jpg

仲有個橋景,好天之下唔錯既,不過好天就度度都靚架啦[sosad] [sosad] 但條橋本身都的確係幾靚既。
話說去到呢度已經差唔多要返火車站,為左唔miss車,我都無留太耐,沿路一直行返去。

WMF-8559.jpg

呢頭係幾舒服,不過我行到腳底都生曬水泡,好想有車直接返去火車站,但唔覺有[sosad] [sosad]

WMF-8565.jpg

對面有個嘉年華,有時間實去望下,不過無時間又腳痛,廢時去了,

WMF-8561.jpg

WMF-8569.jpg

個嘉年華應該都同果時Amsterdam果個差唔多,果時我地玩到就黎嘔[sosad] 中曬伏[sosad]詳情可以睇:【歐遊百幾日遊記】荷蘭 AMSTERDAM 篇 (五)Food Market + 機動遊戲

WMF-8571.jpg

影埋呢度就全速行返火車站啦。

話說由Frankfurt去Rothenburg都唔係好方便,要轉2次車,即係一共要搭3程火車,全程2個幾鐘,車程如下:

18:22 Frankfurt (Main) Hbf – IC 2027
19:32 Würzburg Hbf
轉車
19:41 Würzburg Hbf – Regional train 58131
20:23 Steinach (b Rothenburg)
轉車
20:36 Steinach (b Rothenburg) – Regional train 58911
20:50 Rothenburg ob der Tauber

返到車站,拎返行李後,我醒起去到Rothenburg呢d小鎮已經9點,
都唔知仲有無野食,就想係Frankfurt買定d外賣去,
就把握5分鐘時間去Nordsee買個沙律。

買完後,就急急腳趕上火車。另一件痴線事就開始啦[sosad] [sosad]
我見到係11號月台,就衝過去,仲用手機係度影架火車。
我覺得係時間太趕加上自己唔夠專心,掛住影黎影去,搞到出事。

2018-09-04 23.29.51-2.jpg

影完相我好驚佢無啦啦開,就一野飛左上車,
一上車,火車就真係開左。
心諗真係好 :P ,好彩無miss火車 :P 。
火車係6:22開,果時我手機只係6:20分,佢就開左,
初頭都不以為然,搵好位就坐低,然後我就望出去,
但一睇路軌d牌,寫住12號月台!!!!![shocking] [shocking][shocking] [shocking]

睇多幾個牌,頂!!真係12號月台既車!
我果架11月台既火車係隔離果架!!![shocking][shocking]
無錯,我太心急衝錯左上另一架火車…
而架車已經開左!全速開出!!!
我心入面已經叫曬救命…今朝睇錯火車時間:o) :o) ,
而家又睇錯月台牌:o) :o) ,痴線!:o) :o) :o) :o)
真係無一程車係順利[sosad] 仲要全部都係因為自己疏忽而搞出黎…
我已經不斷同自己講今程一定唔可以miss,結果…。
我當時完全唔知點樣可以知道呢架車係去邊…電子牌又無,
只希望下一個站同我本來果架係一樣…
加上一入路軌就咩network都無曬,上唔到網,
search都search唔到。

呢個時候查票員入黎啦,我即刻狗衝去同佢講我上錯火車,
問佢呢架車係去邊的,佢話呢架車係去munich既[sosad]
之後就幫我搵我可以點…[sosad]不幸地兩架火車係完全唔同路線:o)
因為我d車票只可以搭原定果班車,下班車我係搭唔到,
所以佢建議我下個站落車,搭回頭車返去frankfurt:~( :~(
再搵ticket office幫我改返張車票,
我問:我洗唔洗係frankfurt買過set車票
(心諗今次無600HKD都唔洗指意去到Rothenburg:~( :~(),
佢就話 no, the officer will help you.
聽完心入面都放左心少少:~(
結果我去到下個站都要等半個鐘先有車,然後再搭半個鐘車,
最後一粒幾鐘後又返返Frankfurt車站:o)

當時係7點半,我已經睇定下一班車,係8:22pm開既車,
預計11點先到Rothenburg,佢亦係我search到既尾班車,
但覺得去到就得啦,夜都無所謂,同民宿講聲就ok。
而係車黎之前,我要去office改好我set車票。

一去到Frankfurt既ticket office,見到勁多人,
原來係要拎飛排隊既,仲要係排緊百幾張飛 [shocking]
雖然有8個職員左右,但目測每幾分鐘先輪一個人,
而下班去Rothenburg果set車係9個字後就開,
我去拎飛果時,同派飛果個職員講我既問題,
佢就送左啱先另一個人等到唔耐煩放低走人既果張飛比我,
話:「你拎呢張啦,唔係就有排等啦」我見張紙已經揸皺曬[sosad] [sosad]
但真係好彩有佢,只需要等十幾個!
初頭我都覺得自己好黑仔,咁危急仲要等,
但等落發現坐我隔離果個等緊百幾張飛都坐係度等[sosad] [sosad]
而我幸運地得到人地送既「插隊飛」,成功係下班車前處理!

故事仲未完,到左我,我同個職員講左我既情況,
初頭個職員一開始就話我要買過張飛,不過佢見我個樣咁慘,
佢就無直接趕我去買飛,再問detail d 我本身坐錯左邊架車[sosad]
check左一大輪之後,佢竟然突然話,
我出過set車票比你啦,但剩係今次先比,
以後一定要睇清楚先好上車[shocking][shocking][shocking]
我都唔太知點解佢會突然轉軚,雖然佢個樣好似有d惡,
但我都非常非常多謝佢免費幫我改我set車票做下一班車[shocking]:~( :~(

當我開心地狗衝出去搭下班車果下,發現原來故事都係未完!
因為呢班前往Wurzburg既火車delay,而且係delay30分鐘!

2018-09-04 23.29.55-2.jpg

delay本身唔係問題,但我即時check下預計到達時間仲有無車駁去Rothenburg…係!
無!架!!![shocking] [shocking][shocking] [shocking]
我係肯定會miss尾班車去Rothenburg。[shocking]
點解要咁對我啊!!明明架車係度,但就係唔開!!(聽講壞左)
當時月台好多廣播,但基本上都係只有德文,
真係唔會知發生咩事。

於是我係唔同月台跑黎跑去搵職員,
睇下仲有無車可以去到wurzburg,
咁啱一個係架ICE前面既女職員話:
你可以上我呢班車,我呢班車係去Wurzburg既特快車(ICE)。
嗚哇!聽到特快呢個字真係就黎跳起,我真係感動到半喊咁confirm完多謝佢 :~( ,
佢見我把聲咽哽咁都覺得好誇張,係度笑住講welcome[sosad]
之後我就衝上車 :~( 。
其實平時就唔可以話轉車就轉車,今次係因為我架車delay先可以轉另一架快d既車。
故事完未?未啊!!!
坐左陣,我見佢都唔開車,我就開始懷疑…
落車一睇個站牌,原來呢架都要delay,仲要係1粒鐘[shocking]
即係雖然快d,但仲遲開車:o) :o),一樣無尾班車搭:o) :o)
我當然即刻又跳返落車再搵其他職員 [sosad] [sosad] 。

哇,幾時先完啊!:~(:~(:~(

我又跑返去我本來要搭果班車個月台,
話說頭先咪話已經行到腳底出水泡,呢個時候我真係唔得閒理個水泡,
見職員就跑過去,因為好驚問問下架車突然會開左[sosad]
當時我見到遠處有個職員,就跑去問佢,
今次呢個真係我既大救星:~(:~(
佢真係極好人,超級好人:~(
當時有三四個人圍住佢等問佢野,
佢都逐個回應,勁好態度:~(,比著香港,
一個對三個客實會好躁剩係想打發曬d人走,
但我單野勁長佢都好耐心聽:~(:~(
仲係面帶笑容,勁有耐性同我講,
佢話雖然我miss硬尾班車,但放心,我呢d case係會有免費的士搭[shocking][shocking]
因為我係DB delay搞到搭唔到尾班車,所以DB會比free taxi voucher比我[shocking][shocking]!!!
聽到有的士搭我都安心好多:~(:~(
不過得佢leader先有taxi voucher係手,所以我都未可以放心曬,
因為未可以即時拎到的士券,
於是佢就慢慢講我知點樣可以搵到果個人,一陣要搭到邊個站,
坐第幾卡車等佢上黎check飛時同佢講 etc,
仲有有時佢見我聽唔明佢講既站名,佢都好樂意幫我寫係車票上面,
哇點解德國人可以咁好人:~(!!!!
我記得個職員係光頭,戴個鼻環既,
嗚哇,我從此對戴鼻環既後生仔改觀啊!!:~(:~(

2018-09-04 23.29.57-2.jpg

於是我終於可以上車好好坐低等佢開車!!:~(
話說呢架車好full,我路過見到一個窗邊空位,
不過個德國女仔放左個袋係上面,我望左下都廢時叫佢拎開,
因為又要讓我zip入去咁,就轉身想繼續行,
點知個女仔主動問我係咪想坐[shocking]
超級nice,仲行出黎,歡迎我坐入去!![shocking][shocking]
仲超好笑容!!然後問仲我想坐出面定入面[shocking]
哇點解可以咁好人??如果係香港,
有時你搭巴士想叫人拎開個袋比你坐,都好似得罪左佢,
佢會黑口黑面好唔情願咁fing起個袋由你入去[shocking]
點解德國人可以咁大愛,我咁多行裝佢都歡迎我入去,
仲清左個枱面d野比我放我d沙律上去[shocking]
好人到難以置信!!好多人話德國人好冷漠、唔肯講英文、歐洲人歧視亞洲人,
嗚哇無啊!!今日遇到既每一個人都超好人對我極好啊!![shocking][shocking]:~(:~(
我真係覺得自己今日唔好彩得黎又好鬼好彩:~(

我個沙律拎左兩粒鐘都無機會食,而家終於可以坐低食。
其實到呢刻我都唔知黎緊仲有無痴線野發生,
但起碼我知道今晚起碼會有的士搭,
我都安心d,終於可以慢慢食:~(
而呢架車一個鐘既車程最後停下開下,
都搞個個幾鐘先到職員講既果個站,
不過我等極都等唔到佢講既果個人黎查票,剩係見好多職員來來往往咁經過,
可能因為火車delay,個個都好忙搞呢樣果樣,無人停低查票。

2018-09-04 23.30.00-2.jpg

呢個係我當時既ig story:~( 過左佢講既果個站後,我都未見有人查票,穩陣起見,
我自己行出位,打算搵個似leader既問,又好好彩地,
一去隔離卡就遇返頭先幫我既超好人職員!![shocking][shocking]
見到佢我就安樂:~(:~(,因為佢最清楚我等緊咩,
佢見到我果下已經知我想問咩,於是就幫我搵果個人,但搵左陣發現,
佢唔係附近,好彩問一問!![shocking]
之後佢就建議我,照係Wurzburg落車,果個站都算大,
有個counter會有職員處理呢d事項,
而且果個counter係未收既(當時10點零,個counter 收10點半),
如是者我又再瘋狂多謝佢:~(:~(
我一定會記住佢架!!到站後就衝去個counter。

到站後,去到counter,見個職員本來都準備收工,
因為佢隔離位已經執緊野,但好彩未走曬!!
我就比曬我d車票佢睇,講我miss左尾班車,
佢又問下我野,又check呢樣果樣後,
(又問我點解會miss左車[sosad] [sosad][sosad] [sosad]
嗚哇最後終於比左張taxi voucher我:~(!!

2018-09-04 23.30.01-2.jpg

我張重發既車票同埋下面係Taxi voucher:~(:~(得來不易:~(:~(

不過因為原來中間呢程車(Würzburg Hbf – Steinach (b Rothenburg) )都仲有尾班車,
只係第3程(Steinach (b Rothenburg)  – Rothenburg ob der Tauber)無尾班車,
所以的士只係for取代第3程車,
而家要做既就係照搭下一班去Steinach既火車,
出到去就會有的士搭,上面仲寫左的士司機既車牌——佢連的士都幫我call埋!!
於是我就狗衝去等火車,超級小心睇清楚d火車牌、月台牌,
上車前都要捉個職員黎問係咪呢班車[sosad][sosad]
職員又係勁好態度,答d咁無聊既問題都勁好笑容,真係誇張過日本。[sosad]

到到Steinach,我見到有架7人車咁既的士,
雖然車牌唔同我張voucher寫果架,但我都行去望下,
上面有個德國女仔問我係咪都係無左尾班車要搭的士去Rothenburg,
然後就歡迎我上車,仲落車幫我開門,幫我拎野,
不過佢唔係司機,佢只係另一個乘客[shocking][shocking]!!
我又要問啦,點解可以咁好人架!![shocking]
佢唔係職員,真係大可以唔理我,自己摺埋玩手機就得,但佢係咁幫我,
仲幫我同個司機做翻譯,笑住同我講好多德國人都完全唔識英文,
我真係而家先發現原來德國人係咁好客,真係好好人!!:~(:~(

過左陣,佢見到有另一架的士,就問我,咦,會唔會果架先係你搭既的士?
睇個車牌,係啊![shocking]原來DB係幫每個乘客各自book一架的士,
於是同佢地道別後,我就去左另一架的士。
個司機直接問我住邊間酒店,就起行啦!!
佢仲車埋我去酒店門口,太好啦:~(
係的士上面我真係好感動,
因為終於都見到終點啦!!:~(:~(:~(:~(:~(:~(:~(:~(:~(

當時已經12點幾,路上真係幾乎無車,feel到司機都開好快,
成條路黑到剩係見到車頭燈前面既路同地面少少反光既貓眼,
大概十零分鐘,終於見到d木屋仔,嗚哇!到左Rothenburg啦!!:~(

司機仲問我咁夜會唔會check唔到in,
不過因為頭先我已經同民宿申報左我會過左12點先到,
民宿主人都教左我點搵鎖匙上去自己房,
所以到左酒店問口,同司機道別後,我就去開門。
一入去,竟然見到民宿老闆![sosad] [sosad]我以為佢已經訓左,
佢仲同我講Guten ________(唔記得佢講邊個字,一定唔係Tag)!!
雖然只係好簡單既打招呼,但可能佢把聲好有爸爸feel,又講得超warm,
聽到覺得好感動,佢仲無即時叫我搞check in同磅水,
剩係話我知我行果邊樓梯就上到房,
嗚哇太好人啦:~(:~(,我真係有返到屋企既感覺!!:~(:~(

入到房果下真係超級極度感動:~(:~(:~(
本來唔洗3個鐘既車程,最後我搞左6粒幾鐘:~(
終於都到左羅騰堡既民宿房!:~(:~(!仲要係好warm既德國小木屋!!

2018-09-04 23.30.11.jpg
好彩今日係住單人房,唔係住hostel,
所以可以好好咁沖個涼、訓個靚覺:~(!!
呢間住宿我真係好推薦,報告就下一篇詳細講啦[sosad] [sosad]

有趣既係,本來由heidelberg去rothenburg,
我係可以一過搭5粒鐘車(都要轉車),但因為唔想一次搭咁耐車,
我就留陣frankfurt再搭2粒幾鐘車,點知最後呢2粒幾鐘反而就變左6粒鐘,
仲過多過本來全程果5粒鐘!真係諷刺[sosad]
不過呢個奇遇記都算係咁,就算又搭錯車又delay搞到miss尾班車,
我都唔洗補錢就可以到達Rothenburg,
仲因為咁遇到咁多超好既德國人:~(
發現德國人有幾咁好人,係不幸中之大幸啊:~(:~(!!

故事未完全完,當我臨訓前想充電,又有精彩既事:我個萬能轉插壞鬼左!!

2018-09-04 23.30.20.jpg

個插頭唔知點解出唔到黎…:o) 卡住左…因為佢咁萬能,
我真係只係帶左佢呢個:o)
結果而家我就變左無轉換用…唉點解呢個時候先搞d咁既野:o)
比我安心訓下得唔得啊!!:~(:~(
都無辦法,好彩尿袋都仲有d電,
我就用尿袋差住電話訓,聽日再搵下邊度有得買轉插…:~(:~(

呢日終於完啦!!:~(:~(
Frankfurt呢日Suppose無咩好寫既遊記變左可能係最多字既遊記…[sosad] [sosad] [sosad] [sosad]
不過…朋友們都講得啱,咁先深刻難忘啊嘛,
諗返都覺得呢個經歷係幾神奇,不幸同幸運爭住出場,
真係夠曬迂迴曲折。[sosad] [sosad]
睇到呢度既巴絲打,好多謝你咁多字都睇曬[sosad] [sosad] :~(
呢個故事教訓我地,上車前一定要睇清楚時間,
預多d時間慢慢上車,仲要專心,唔好掛住玩手機,
要確認月台牌,每樣野都要睇幾次!
仲有,有唔肯定既野唔好怕醜,瘋狂問職員!
呢度既職員真係好專業!!

聽日,就係成個trip我最鐘意既地方之一(其實有好多個[sosad]
羅騰堡既遊記喇!


【歐遊 2018】獨遊瑞法德奧17日童話小鎮仙境遊 路線行程 : https://wp.me/p8A312-14I
歡迎 Follow Facebook page 留意最新資訊同遊記: 芒果豆腐花遊記
詳細遊記及資料整合:https://mangotofufa.wordpress.com/

Advertisements

Leave a Reply

This site uses Akismet to reduce spam. Learn how your comment data is processed.