【歐遊遊記 2018 】獨遊瑞法德奧 童話小鎮仙境遊(十四)浪漫之路 德國羅騰堡 ROTHENBURG OB DER TAUBER — 德國最完整中古世紀古城 (上)行程景點一覽

位於德國南部巴伐利亞邦既羅騰堡(陶伯河)被譽為「中古世紀之寶」,呢個名真係無誇張,佢真係一個又大又靚既古城,外面有完整既城牆;入面大部分都係充滿中古色彩既木骨屋同德式山形屋,真係個非常可愛既古城!亦係我係德國最愛既地方!絕對係個我想再返去既地方。係開始呢個遊記前,先睇一張最標誌性既羅騰堡街景,亦係吸引左我黎既景!

WMF-8879.jpg

其實德國有兩個叫羅騰堡既地方,所以呢個羅騰堡全名就叫做Rothenburg Ob Der Tauber,意思就係陶伯河(Tauber)旁既羅騰堡,用以區分呢兩個同名既地方。

雖然佢同Colmar一帶都係好多木骨屋既古城,但兩個比我既感覺都幾唔同,Colmar係靚到童話咁、好假既感覺,而呢度就比較有田園、有種身處鄉郊既感覺,但一樣有非常精彩既風景,對我黎講,去曬兩度唔會感覺好重覆,亦無話邊個靚過邊個,以致任何一方被比下去,兩個都好值得去啊!

羅騰堡話大唔算好大,絕對可以輕鬆徒步行曬整個古城,你齋行既兩個鐘應該都行得曬主要既地方,但話細又唔算好細,都幾多野可以做同影下相,所以建議最少以一整日參觀,如果你要睇好多博物館,加上好鐘意影相,係可以用上一日半,而我係2018年6月底黎到,日照好長,9點先天黑,都stay左兩晚(晚上到,玩一整日,翌日中午前行多轉先走),以超慢步伐,總共用左一日多少少遊覽。

詳盡羅騰堡住宿攻略及推薦請看:
【歐遊遊記 2018 】獨遊瑞法德奧 童話小鎮仙境遊(十三) 德國羅騰堡 Rothenburg ob der Tauber 住宿攻略 推薦

輕輕講下我做左d咩先(排名不依時序):

Plönlein 

當然係四圍影相,影呢個打咭位啦! 但其實呢個鎮四圍都好靚,絕對唔止呢個景!影相有排影,遊記再慢慢post啦哈哈。

WMF-8877.jpg

集市廣場 Markplatz

當時有個交響樂園係度表演,都睇左陣。呢個廣場四圍既建築都好得意!!又好熱鬧,超歡樂。

WMF-9089.jpg

參觀Käthe Wohlfahrt + 聖誕博物館

夏天都可以感受傳說中既德國聖誕市集!呢度有著名既德國聖誕飾品公司Käthe Wohlfahrt總店,佢有最大既店面——唔好睇只係屋仔一間,有排睇!行到迷宮咁!遊記會有多d入面既相,好正好鐘意呢間店!上層仲有個聖誕博物館,對我黎講都好有趣,剩係呢間屋仔,我都用左起碼兩個幾、三粒鐘啊!

WMF-9148.jpg

從西邊城門(Burgtor)外公園影去城,欣賞山城景

呢度明明只係其中一面既城門外,但就可以遠眺古城,都幾得意,呢度近黃昏d光幾靚。

WMF-9239.jpg

行羅騰堡城牆

用另一個角度睇呢個城,沿途留意住德式小屋既結構,都幾有趣,你要行曬都可以用好耐。

WMF-8606.jpg

Rothenburg市政廳塔頂登頂睇風景

爬上去真係攰到傻,但超靚!!影左好多好鐘意既相。

WMF-9304.jpg

晚餐 Zur Holl – Mittelalterliche Trinkstube

好鐘意呢間餐廳,好好味,好好味,好好味!!!!

WMF-9271.jpg

另外我仲Plan左去參觀帝國城市博物館 Reichsstadtmuseum
不過唔夠時間,同埋只係無野做既後備方案,就skip左。

如果你12月黎,晚上仲會有德國既聖誕市集!一定好有聖誕氣氛!!去完今次,真係好想將來聖誕前再黎德國啊。

遊記請看下篇

(待續)


【歐遊 2018】獨遊瑞法德奧17日童話小鎮仙境遊 路線行程 : https://wp.me/p8A312-14I
歡迎 Follow Facebook page 留意最新資訊同遊記: 芒果豆腐花遊記
詳細遊記及資料整合:https://mangotofufa.wordpress.com/

Advertisements

Leave a Reply

This site uses Akismet to reduce spam. Learn how your comment data is processed.