【歐遊遊記 2018】獨遊瑞法德奧 童話小鎮仙境遊(十八)重遊德國新天鵝堡 Neuschwanstein — 世上最美城堡之一

atemplate18

德國既新天鵝堡(Neuschwanstein)都可以話係黎到德國必去既景點,
我都去左兩次,但我其實唔係因為太精彩所以想去多次,
只係第一次去天氣差又整緊橋,靚相都唔多張,
今次順路就去多轉啦,結果好成功
天氣好好!至於值唔值得去,我覺得好天氣係好值得架,
真係好靚,周邊都幾優美幾舒服!今日都玩得好開心。

WMF-9790.jpg

新天鵝堡位於德國南部既巴伐利亞邦,通常黎既話都會住慕尼克,
以慕尼克做落腳點,早上出發,即日來回呢度。
不過,天鵝堡其實唔算好近慕尼克,
從慕尼克去最近天鵝堡既火車站富森(Fussen)需要2小時,
之後仲要再搭3個字左右巴士到新天鵝堡既巴士站,所以都有人選擇stay Fussen。
不過呢個行程無國王湖咁要咁多時間,
所以其實即日來回Munich咁玩係可行,而且時間充裕的。

交通 資訊

因為2小時既車程都已經係市際transit咁長程,車費自然唔會平,
單程都起碼20歐單程,來回就40歐以上,
所以無論你一個或幾多個人黎都好,
都一定係買每人最貴先25歐既交通pass 拜仁邦票最抵,
(介紹文:拜仁邦票資訊—— 慳錢必學!!
越多人同行仲越平,而佢除左火車,
仲包埋來往天鵝堡巴士站同富森火車站既巴士車費(來回價值5歐左右),
你返返慕尼克亦可以用佢黎搭市內既地鐵、電車等!
不過由天鵝堡山腳搭上天鵝堡果度果班巴士就唔包既
但果程來回加埋都係3歐姐。以下係交通詳情:

因為邦票係Weekday只能係早上9點之後用,而我又唔趕時間,
所以我當日就搭左9:53分從Munich站開出、一程過就搭到富森既班次,
夏天班次睇黎密d同方便d,因為我而家10月search d時間表無我呢個班次,
多數都起碼要轉一次車,可見期期既班次都唔同,
所以大家務必要自己上DB睇清楚班次同時間。

時間 車程(hr:min) 地點 活動
09:53 / Munich 上火車
11:55 2:02 Fussen 到站

搭78號或73號巴士,係Hohenschwangau Neuschwanstein站落車

12:15 0:15 Hohenschwangau Neuschwanstein  到站

來回一樣玩法,確實時間就睇返班次表(因為期期唔同,列曬出黎無咩意思),
巴士方面,去程基本上係同d火車接住駁,好順既,
回程想好預d既話,到左天鵝堡站影低巴士站個回程時間表就得,
我回程都係Google火車班次再睇返半個鐘前有咩巴士班次,
就係果個時間去等車。
以下係我果時巴士既回程班次參考,等大家有個概念d車既時間係點。

搭78號或73號巴士回程:14:40、14:41、15:36、15:47、16:30、16:40、17:44、17:50、18:15、18:44、18:50、19:30、19:35。
基本上計返火車尾班車既話,最遲17:50就好搭車返去啦,唔係就好易miss尾班火車。

我記得我12點幾去到,四圍影左好耐相,但期間無入餐廳坐低食野,
最後玩到3點半左右就搭巴士走。
我係無進入新天鵝堡既,入去參觀既就要預多1個鐘左右,而我兩次都無入去,
因為我剩係為左個城堡外表而黎既,而我又已經睇過幾個歐洲奢華既皇宮,
都睇到無曬感覺,就覺得無咩必要入去。
不過如果你無睇過歐洲奢華皇宮,想知天鵝堡入面係點既,
可以search下相再決定去唔去,睇相係幾靚既,
入埋去睇會令成個行程更完整,相信值得睇下。
但注意如果你係夏天呢個旺季黎,又想入去參觀,記住要上網預約
唔係既一黎你要排隊買,二黎你買到都可能係要等幾粒鐘後先入到場,
分分鐘多人到你驚。
雖然我當時無入去,但而家都整理埋參觀既資訊啦。

入內參觀 預約資訊

預約網址:https://www.hohenschwangau.de/1392.0.html

2018年10月官網票價表:
9975d6d07c.jpg

  • 參觀天鵝堡係要跟導賞團入既,過程40-50分鐘。
  • 成人 13歐;學生12歐,以官網為準。
  • 預約要每張加1.8歐手續費,取票時比錢,但要留信用咭資料訂,以防甩底會
  • 可以改期,但視乎仲有無位剩。
  • 可以取消,但要開場前2小時之前申請,否則會收手續費。
  • 遲到就無架啦,你最遲要係你揀既場次開場前既1.5小時前黎拎飛,即係如果你book 睇12點,你10點30就要到達。
  • 如果你聽日去,而家先發現可以預約既,就太遲啦,因為起碼要係2日前既3點前完成預約(eg 20號去就要18號3PM前完成預約)。
  • 你試用下佢張form揀下日子就睇到你大概可以理解為佢2個半月前開始可以book,建議最好起碼1個月前預約,最後有無位都係要等佢覆實你先知,因為你填既日子同時間只係你理想既時間。
  • 太遲/已被人預約曬點算呢?你可以即場買,但夏天好可能要排隊,或排到你都只能買幾個鐘後既場次。所以如果想確保入到場,就要早d,weekday最好9點前出發,因為個個都用邦票黎,你搭9點後既車黎到實排好耐隊,所以你可以考慮前一晚住定富森先,或者用邦票搭9點前(e.g. 8:53am)既班次,並補買一張9點前路段(8:32-9:00am)車程既單程車票,應該都係一兩個站姐唔會太貴,咁就唔洗好似逃票咁,又可以比更多人早d到達城堡啦。

遊記

呢日早上,係酒店附近買完早餐,我就上火車啦。
呢程火車其實真係幾full,記得第一次我一行三人咁搭呢程火車,
行左好多車廂先搵到位坐,仲要係打散咁坐,
今次因為得我一個,係易搵位d既,但真係好多人,無乜空位。
搭火車期間,附近仲有個強國男人間唔中就係度「kwaaaak!!!」咁唔知咳痰定乜xx( xx(
次次全車都會勁詫異咁望過去,或者勁厭惡咁同旅伴對望,
過多幾次後,隔離班意大利人直頭係度扮左幾下咁恥笑佢,
強國人又_出國際了xx( xx(

落車後,見到巴士已經係度ready,
基本上成大條火車d人落車都一定係搭呢兩條路線既巴士,
咁你可以預想到架巴士會有幾咁full,
手腳慢d都可能會上唔到車,所以建議大家唔好慢慢係度影相,
快手搵巴士隊尾排隊上車好過。
三個字左右,到站啦!其實我落車果下好灰,因為我見到個天係咁:

WMF-9648.jpg

大家見唔見到個堡,就係座山既左邊。
但重點唔係呢度,重點係勁厚雲!
只係好過我上次黎少少,無陽光!
我真係心諗點解我要係同一個天氣同時段黎呢個天鵝堡兩次 :o) :o)
但當我望去天空既另一邊:

WMF-9646.jpg

哇咁好天!#love#
呢個時間緊係孔明上身,睇下風向啦,
發現果堆烏雲係離開緊,d薄雲係向緊天鵝堡去!!#love##love##love#
所以我就決定唔好咁早狗衝上去,一於係山腳呢頭hea下先:D

WMF-9651.jpg

真係超厚雲,直頭係要落雨咁既樣。
但另一邊就另一個世界:

WMF-9652.jpg

上圖係舊天鵝堡,別稱高天鵝堡,其實係呢四既另一個景點,
係呢頭都一定會見到佢,但大家有眼睇,佢外表比起新果個真係完全唔吸引,
絕大部分人黎到都會skip左佢 [sosad] [sosad]
真係Your face, your fate.  [sosad] [sosad]

呢個城堡好普通,如果呢頭只有佢,絕對唔會吸引到咁多遊客黎到呢度。
所以新天鵝堡都起碼有令佢有多d曝光既機會既  [sosad]

Schloss Hohenschwangau 舊天鵝堡

WMF-9665.jpg

高天鵝堡雖然而家被人無視,但其實當年佢係12世紀建成果時係好出位,
經常成為古詩既主角架。

咁睇好似玩具。如果有興趣去埋入面參觀,
係可以買新+舊天鵝堡既套票架。價錢都係上面個表度。

WMF-9668.jpg

WMF-9671.jpg

除左高天鵝堡,呢頭仲有個湖,係度坐下都幾舒服。
咁啱而家呢邊藍天,所以我覺得好靚,因為只要好天,
所有大自然境都會變到好靚,同上次黎真係差好遠!

Alpsee 阿爾卑斯湖

WMF-9674.jpg

呢個位係果條路度影相應該幾好feel,不過得我自己無人幫我影就不了啦。

WMF-9685.jpg

WMF-9684.jpg

WMF-9693.jpg

我就係度坐左好耐。

WMF-9702.jpg

WMF-9704.jpg

下圖係2016年黎,天氣唔太好果時,其實湖呢d天氣唔算太差,都仲有少少藍色同光:

WMPO-7194.jpg

再post幾張兩年前影呢頭既相,因為今年黎呢堆建築好多都整緊。

WMPO-6935.jpg

WMPO-7192.jpg

呢頭d屋仔係幾靚,全部都好有迪士尼feel,但我今年黎就好多都裝修緊,遮曬。

返返黎2018年先:

WMF-9706.jpg

沿住湖邊行,有個位影到鏡咁

WMF-9712.jpg

WMF-9716.jpg

WMF-9722.jpg

WMF-9718.jpg

望返過去,藍天勢力越黎越強啦!

WMF-9727.jpg

上圖雖然好細,但大家可以留意下d樹下面中間既位,有一隻大天鵝同一行天鵝bb一直線咁遊緊去岸邊,超得意,好似故事書見到既畫面,對住呢d湖真係難怪會作到醜小鴨呢d故事出黎。

WMF-9729.jpg

WMF-9730.jpg

WMF-9732.jpg

WMF-9737.jpg

因為有人餵包,引曬d鴨同鵝黎。

WMF-9740.jpg

WMF-9748.jpg

d鴨終於走人

WMF-9756.jpg

天鵝bb真係灰色,比起鴨bb係頹d,但好多毛毛好得意!

WMF-9753.jpg

WMF-9757.jpg

WMF-9761.jpg

WMF-9768.jpg

大patpat

WMF-9771.jpg

好得意啊!

WMF-9741.jpg

WMF-9745.jpg

WMF-9743.jpg

WMF-9744.jpg

WMF-9774.jpg

我睇鴨真係睇左好耐,而家望過去個堡…

WMF-9776.jpg

!!無曬雲!!而家緊係夠鐘上去睇啦!!!#love# #love#

WMF-9777.jpg

嗚哇無曬d厚雲真係靚勁多

因為天鵝堡係係半山既,所以要搵方法上山。上天鵝堡係可以搭巴士、搭馬車或者行上去,我次次都係搭巴士既,來回先3歐,反而如果你搭馬車上去,再單程搭巴士落返黎,果程就貴d,我唔記得幾多,2-2.5歐左右啦。

WMF-9780.jpg

等巴士,班次唔算好疏既,感覺上係十分鐘左右一班。

WMF-9781.jpg

等車位置係望到高天鵝堡既呢個位。

WMF-9782.jpg

呢張就係車票,張車票係進入條隊度會經過既售票亭度買,
上落山都要用,唔好上左車就掉啊。

上車十零分鐘左右啦,一落就會見到兩條路,
左邊係去天鵝堡門口,向前行就係去瑪莉安橋Marienbrücke
係睇天鵝堡必去既觀景位置。

WMF-9783.jpg

目標好明確,當然係去瑪莉安橋Marienbrücke啦。

WMF-9784.jpg

要行d斜路,但轉幾個彎姐,都輕鬆。

WMF-9785.jpgWMF-9787.jpg

之後就會見到…要排隊[sosad]  都正常既,條橋企太多人容乜易爆[sosad]

WMF-9788.jpg

WMF-9789.jpg

一路等一路好期待,呢個隊既盡頭就係橋口啦[bomb] [bomb] 等左唔耐既,5-10分鐘左右啦…到我啦[bomb] [bomb]

瑪莉安橋 Marienbrücke

WMF-9790.jpg

[bomb] [bomb] 終於睇到啦,我2016年黎果時條橋整緊…我無得睇呢個景啊!!

WMF-9791.jpg

一座聳立係山谷中小山丘上既城堡,座城堡真係好有公主feel[bomb] [bomb]

又係影一萬張一樣既相既時候:

WMF-9792.jpg

WMF-9796.jpg

WMF-9803.jpg

嗚哇,設計師真係好勁,點諗到呢d咁童話既設計。

WMF-9794.jpg[bomb] [bomb]

另一邊就有d山睇下,d樹好靚。

WMF-9890.jpg

WMF-9891.jpg

WMF-9901.jpg

呢個時候,見橋既盡頭仲有山路行,係行上上d既位置睇既,
但d路就無頭先鋪得咁靚,係d山黎,而且比較窄,唔小心就gg,
我得一個人無照應,而且唔知要行幾耐,爭扎左陣,
但見一場黎到,我都決定住住前面對台灣情侶行,
但行行下前面對台灣情侶竟然折返,搞到我士氣大挫[sosad] [sosad]
不過好彩前面仲有個好明顯都唔係行山友既女人,
一路行佢又問回頭既人洗唔洗行好耐,
見到d人話唔耐,都比左d信心我完成。

WMF-9906.jpg

左邊一失足就飛落去架啦,所以我行得都好小心,
千其唔好一路玩手機一路行。

WMF-9907.jpg

就係呢個洞,可以係樹叢間睇個堡,好多人係度影d ig feel打咭相,
仲有個人係崖邊踎低咁影完起身果下差錯腳,
真係如果佢失多d平衡就可能飛落去,我睇見都勁驚,
所以完全唔敢行太邊,影幾下相就算。

WMF-9910.jpg

其實我又唔太覺得呢個位同下面橋影有咩大分別,
只係高少少,不過始終唔係果d超靚postcard果d位

WMF-9914.jpg

我睇完呢個位既結論係,呢個位睇景就無咩特別,
唔係想係度影自己同個堡既全身相既話,就唔洗特登行上黎,
不過想影張全身就要上黎啦,因為下面橋果度窄到影唔到全身相既

WMF-9918.jpg

睇完呢座橋望過去既景,我今日已經好滿足,
因為補shot得好成功[sosad] [sosad][sosad] [sosad]
之後就去埋城堡果度,其實去城堡反而無野影,
因為個堡咁大,你咁近反而無咩野睇到。

出返去中心點,路過好多靚既高樹。

WMF-9924.jpg

去天鵝堡門口由頭先落車個位行去要行五到十分鐘左右。想入去參觀既,就唔好預咁忟啦。

WMF-9926.jpg

途中會經過一個位睇到好廣闊既風景。

WMF-9927.jpg

WMF-9939.jpg

上面呢個係Schwansee

WMF-9940.jpg

左邊大d既係頭先個Alpsee

WMF-9946.jpg

佢地被舊堡座山隔住,我聯想起瑞士既Interlaken[sosad] [sosad]

WMF-9938.jpg

呢個位都睇到個新堡。

WMF-9929.jpg

當然要就下角度啦

WMF-9936.jpg

始終有樹遮住

WMF-9963.jpg

個露台好得意,好似豬鼻

WMF-9969.jpg

WMF-9971.jpg

WMF-9975.jpg

WMF-9978.jpg

WMF-9979.jpg

WMF-9982.jpg

WMF-9991.jpg

其實我行到黎先發現佢正面係整緊,好彩頭先橋果度望過去唔細心d睇都唔覺!唔係既又要再黎啦[sosad] [sosad]

正門係咁既(兩年前既相)

WMPO-7222.jpg

行埋呢度其實我都玩夠,所以落山了[sosad] [sosad] 落山就係返落車果度等車,呢度因為山路窄,只能單向行車,有車上緊就唔落得,有車落緊就唔上得,所以頭尾都有交通燈。

WMF-9995.jpg

WMF-9996.jpg

個天清到假既咁[sosad] [sosad]

WMF-9998.jpg

WMF-0003.jpg

一路行都一路望住個堡,唔捨得 :D

WMF-0005.jpg

返到富森其實我如果之後無野做係夠時間比我係度行個鎮,
不過因為我要返Munich去間MediaMarkt / Saturn 買轉插,
所以唔可以太遲,唔係關左門就GG,
唯有搭最早既火車返去,行間手信店就算。
不過呢個手信店我搵到寶物#love# #love# :D

係我係Colmar, Rothenburg, Nuremberg都錯過左,
以為之後過左木骨屋既城市就會買唔到,
但竟然係 Fussen 遇到既德國木骨屋型燭台!#love##love#
呢間火車站手信店既款式雖然唔夠果幾個城市既多,但都夠我搵到個鐘意既#love#

WMPO-1.jpg

WMPO-2.jpg

WMPO-3.jpg

WMPO-4.jpg

我本來預左幾百蚊買個返去做裝飾,所以見到36.95歐,諗都唔諗到買左了 :P  好彩無打爛 :P  :P 關曬燈入面放蠟燭一定好靚 :P

另外下面兩個係我上次黎買既磁石,所以今次就無買磁石 :P

WMPO-36.jpg

勁靚!

WMPO-37.jpg

仲有上次買既Postcard,絕對係天鵝堡最靚既相,可能無得有再靚既相。:D

WMPO-42-2.jpg

WMPO-42-3.jpg

WMPO-42.jpg

呢篇真係好長,剩係紀念品都貼咁耐 [sosad]

Munich既古城漫遊同酒店推薦下篇再講:D

如果想知更多歐遊資訊,歡迎Like我既 Facebook page 留意最新資訊同遊記: 芒果豆腐花遊記


【歐遊 2018】獨遊瑞法德奧17日童話小鎮仙境遊 路線行程 : https://wp.me/p8A312-14I
歡迎 Follow Facebook page 留意最新資訊同遊記: 芒果豆腐花遊記
詳細遊記及資料整合:https://mangotofufa.wordpress.com/

Advertisements

Leave a Reply

This site uses Akismet to reduce spam. Learn how your comment data is processed.