【歐遊遊記 2018】獨遊瑞法德奧 童話小鎮仙境遊(十九)Day 8 德國國王湖 Königssee — 遊記 攻略

atemplate19

國王湖係位於德國邊境地區貝希特斯加登(Berchtesgaden)內既湖,呢個湖景大受好評,個個去完都讚歎不絕,可惜上次黎奧地利果時我無去埋,所以今次再去呢頭就一定要去埋啦!不過今次天氣真係麻麻,d陽光唔太夠,所以結果無預期咁靚…相信只睇到佢一半咁靚…但其實個風景係優美既,可惜因為少陽光,我無大家果種一致都有既好震撼既感覺,天氣好應該會好好多!呢篇會講下當日既國王湖遊記。

WMF-0279.jpg

國王湖雖然位於德國,不過多數去國王湖既旅客都會係奧地利既Salzburg 薩爾斯堡落腳,因為係奧地利邊境既Salzburg去仲近過從其他德國大城市(eg 慕尼克)去,所以好少人會從慕尼克去,因為一黎車程要3粒鐘,當中又要火車轉巴士,一來一回都幾煩(全日會好趕,仲有萬一delay就打亂曬),二黎個路線點都要經Salzburg,咁多數人就會覺得不如係Salzburg 留一晚,順便玩埋呢個城市啦。另外,都有人會直接係貝希特斯加登落腳既,方便去埋呢度既另一個景點鷹巢。而今次,我就係住奧地利既Salzburg既。


國王湖遊記

關於搭車既實戰過程,車站係邊、點買車票我都一次過係攻略篇講埋,詳情請睇攻略,呢篇會由係國王湖落巴士開始講起~

其實呢日本來原定行程係Salzburg既,不過睇到天氣預報聽日國王湖同Salzburg呢頭會落雨,今日就陰天,就決定今日去左國王湖先,搏下佢間中會有陽光,好過係成個天都厚雲既雨天先去。不過今日天氣都係麻麻~

WMF-0031.jpg

巴士站呢頭幾有規模,完全係旅遊區既樣。

WMF-0032.jpg

一落車跟大隊行,就會去到下面呢條街。不過都有堆人係向旅客中心行,因為佢地要去廁所[sosad],呢個廁所係免費既。下面就係手信街,唔太建議一黎就行街買野食,建議直接向前行去爭取前d既位置買船飛,我就係因為排住買野食,搞到行到前面先知排曬長龍

WMF-0034.jpg

WMF-0036.jpg

附近既屋仔

WMF-0035.jpg

呢個時候間中都有d太陽。

WMF-0037.jpg

因為覺得入到湖就唔會有野食,我就醫肚先。

WMF-0038.jpg

WMF-0041.jpg

自製雪糕Crepes[sosad] Nutella Crepes就一定好味架啦,個雪糕就…係勁假又酸既士多啤利味。:o)

下圖係我排緊隊時影既,果邊係碼頭,幾好陽光,勁想快d出發。

WMF-0043.jpg

我後面條隊,其實好長,成條隊應該排左最少20分鐘,應該有半個鐘。

WMF-0044.jpg

到手啦終於,我見到前面好多人買既都係排到11:45定35左右班船既飛,但因為而家有隻就開既船有一個位剩,我就可以率先上船:P 果時覺得好好彩:P 。

WMF-0045.jpg

睇返時間,我諗我10:30左右到,行下食下應該搞左15分鐘,所以的確係排左30分鐘左右。

當全世界排緊隊等船,我就有個特快線比我直接上船[sosad] [sosad]好似買左特快證既VIP咁 #hehe#

WMF-0046.jpg

WMF-0047.jpg

全架船都坐好曬,我行到入去,全船望住我,我向入去,全部人就一直望 [sosad]  可能覺得好奇怪點解仲有人上船[sosad] 無幾耐,船長上場船就開船啦。

不過上到船就發現其實呢d 率先出發既機會都無乜好,最後一個上船即係你無得揀位:o) :o)我個位都幾爛,首先我坐船既左邊,而搭落我覺得多數既靚景都係右邊度,加上我個位個窗一開就要推開左係我隔離果個人果邊既窗位先,即係我唔可以自己想開窗就開,因為我一開,d風就吹埋佢,而當一開船全場都開窗睇景時,我就開啦,點知:o) :o)佢關返,話:it’s too cold :o) :o) :o) :o) 結果幾乎全程都隔住玻璃睇同影:o),不過好彩後來佢見到我咁影法佢都話如果你想影相你可以開一開黎影下[sosad] 唔…都好過無既。

呢個島仔幾得意

不過呢邊d景真係無咩好影

成日都係對住呢堆樹,但另一邊係對住d石壁!!果邊真係多野睇好多,我就得個遠觀,被d人頭遮住曬,都幾掃興,望住人係咁影影影:~(

如果你識聽德文,呢個船河係唔錯既,因為呢架船會有個導遊狂講野,會介紹下國王湖一帶既山、水,因為聽到佢講d數字之類既內容,但重點係佢講野應該好好笑,d人隔幾秒就笑下,不過因為全德文,一粒字都聽唔明,全部人狂笑,得我同對面兩個華人唔知咩事咁[sosad] 不過有個環節就睇都睇得明,就係湖既右邊有個壁叫Echo,如果你對住佢叫係會有回音。而佢就示範…當然就唔係對住個牆9叫[sosad]而係向住佢吹喇叭,無錯,又係右邊,所有風景都係右邊啊 #it1#dog不過好彩呢個係聽聲既,起碼有份聽下先。佢吹既好有一個孤單既退伍軍人去到戰友墓地,係度諗返戰時情境既感覺,係呢d寧靜既環境下就變得好有feel。佢每吹一節,停一陣,你就會聽到d音樂既回音,大家都好享受,但無人會發出噪音打擾,個個都好靜,直至表演完就拍曬手掌。完左之後,佢就會用頂帽收tips,基本上個個都會比既,所以最好預定d散銀啦。

以下呢條片…係完全收唔到d回音既…[sosad]不過就見到佢做緊咩,吹緊咩。

入面開始靚d

對面位係睇呢d:

靚過呢邊更多[sosad]但終於埋岸時轉圈我有份影啦!其實見到個紅蔥心情好好多,因為真係好可愛,本來諗住無咩好睇,但實際見到又幾鐘意:P

埋岸,不過我無上岸,想襯仲有陽光去左重點既上湖先,而呢個決定都正確,因為上湖值得花多好多時間,同埋驚再晏dd雲會更多,變暗曬。

走lu,後面架船已經黎緊。其實都唔係差好遠。

呢頭既山真係好靚,如果4月黎可能四圍仲有好多雪山?

呢個係上船返去既果個碼頭,呢頭真係得草地。

呢度入去,就係Salet果頭。

有倒影既話,真係靚既,不過當日陰天就無咁鮮色啦,圖係靚過真實。

呢頭陽光,座山望落都唔同d

一睇就知左邊無陽光,右邊有陽光,真係兩個世界黎

就到啦

綠色既湖面,不過無陽光真係真係差d。

埋岸

呢度水面真係成塊玉咁~

呢度好幽靜,落船後,就係咩都無既,正如攻略所講,要行20分鐘,先會到上湖。

一落船,向左,跟人就到。

呢頭間中會有呢d門,唔知有咩用架呢,防止d牛唔知走曬去邊?

呢個時候竟然有幾陣陽光,所以心情都唔錯!

呢張同上面差唔多角度果張再次睇到陽光既分別

地圖一個

呢度係幾靚,求其搵個位坐成日都開心。

陽光陽光

其實呢20分鐘都係呢d平路,超級輕鬆。

山山水水,一路行要記得抬頭欣賞下四圍既山,我覺得最有睇頭係佢地啊。

呢d位好啱影相

哇好似好好天咁

呢棵樹好型

當進入下面呢d樹蔭位,代表就黎到個湖啦。你見到個個排曬係度睇呀盛。

我都做定心理準備。

唔…不過就有dd失望,因為唔夠陽光,d山既對比唔夠勁,無咁有氣勢。嗚哇點解我今日黎呢度要唔好天!!!

但等左陣,有一小範圍既陽光!

你會見到呢張同上面真係唔同架!!不過都唔係最靚我相信。因為始終無果度,哇痴線架…哇點解咁靚既感覺。因為我本來以為呢度會成塊鏡咁睇到d山既倒影,不過黎到見到唔知點解好似好少水咁,個倒影唔明顯。

其實左邊間屋仔外既橋仔路係keep住有人係果度影相,我身後都有唔少人係度同我一齊影緊個湖,所以面對呢個咁既環境,但四圍都係人聲,好似怪怪地。不過又靚又出名既地方就預左多人都係咁,無計,但你就預無得靜靜咁係度hea下,因為呢個位好細,個個都係黎睇呢個位,所以會幾熱鬧下。

我襯有陽光,就狂影多好多張好似一樣既相。高d既角度影好似會睇到明顯d既倒影。

陽光再勁左,再黎。呢張對面山果邊都有光。

我仲搵左個影相唔錯既人幫我用手機同相機影,唔錯唔錯,好少人地搵啱人影相!!

始終無果種倒影感。後來發現影到影黎講,呢個唔係好既位置,陣間果度先係。

好似無水咁

之後我影夠後,就決定行埋去對面。向呢個湖既右邊一直行就係,行唔洗一分鐘就會見到呢個位:

其實呢個位好似仲靚,起碼個感覺無咁乾塘先,但係我等左勁耐中間果兩條友都唔肯走

另一張相無咁明顯,所以成功p走左,byebye[sosad]

呢個位個湖雖然而全無倒影,但d色真係好正:D

繼續行,見到有倒影啦!

呢d先係倒影黎架嘛[bomb][bomb]

一路行過去對面岸,其實初頭都係好輕鬆,就係下面呢d少少向上斜既路。

左邊一路都係湖,不過就有樹檔住。間中會有d位無樹,就有湖睇。

一路行都無咩人。

睇黎好多人都係睇完頭先個位就走,但其實對面都值得去架。

呢種路行極都未完:) 間中有d驚喜,呢張可惜下面唔知點解有水波,唔係既話就係幾完美既鏡

之後就開始到左最難行既位:

唔好睇佢好似普通行山樓梯咁,佢每一級都係完全唔平坦,仲有有d級又會厚d,有d又薄d,整體上都係好厚既級,要好用大脾力咁上,之後每級又好長,你兩隻腳行一級就太窄太短,一隻腳一級呢又要跨得大步d,就更用力,仲有d位整唔到梯就鋪塊板算,勁有好易pk既 feel,全程一路行都企得唔太穩,但又無d卸到力既扶手,有時又要讓下路比人行上行落,總之就一路行會好攰,你又要勁專注咁行,因為你唔望地下行實好易差錯腳扭親,我途中都見到有鬼佬差錯腳趴左落地。你睇咁多碎石,一PK都好難唔損手爛腳 #bye#所以以我呢d完全唔行山既人都順利行完都算係咁。

不過上面張相我幾鐘意,因為個湖鏡面搞到呢個位好似係半山懸崖咁,但其實個水面都唔係離呢個位太遠#:)#dog#:)#dog

唔知點解呢個位睇d水又深色d

d山石係完美地被反射

但我一路行真係勁想知:完未啊:~(:~(

無乜陽光

無陽光,d水黑色咁:o)

頭先果種路一路向上可能都持續左15-20分鐘,咩力都無曬,終於都見到正常路。

之後就到落@_@@_@落都好辛苦,下下咁大級踩落去,你對腳同襪衰d既,你d腳趾都實生水泡 [sosad],滕頭都要受好多力。

平路啦:~( 光都無曬。

呢頭望過去係咁。呢下咁啱有dd陽光

不過唔知點解呢頭d水好多泡泡定細細粒既垃圾,總之睇落好似好污濁

最可惜就係對面座山唔見左個頂

下圖無咩光啦,你會見到個水面好多唔知咩,一達達。

又有光,呢度都有間屋,似乎有個名,叫牛奶小屋。

好似上面攻略果度講,我鐘意呢度多d,因為呢度比頭先果度廣闊好多,頭先果度根本就係係個樹蔭下影完屋仔張相就算,但呢頭係個大草地,上面有牛、有賣牛奶、食物既地方,你可以求其搵個位hea下,舒服好多,唔係剩係可以打咭同影相。

呢度好好太陽但對面d山一pat野咁。

呢度有草地,上面有牛,好多牛鈴聲。

我既目標係去前面呢間屋度買牛奶飲。佢既牛奶就感覺夠曬天然,叫做fresh milk,可能係呢度d乳牛度搾既[sosad],有兩種味,原味同牛油味牛奶(buttermilk)。

木欄同呢度既環境夠曬配合

fresh milk 2歐;butter milk 都係2歐。一場黎到,咁辛苦過到黎緊係要試曬兩種啦。

呢間屋仔都好可愛。佢其實係間餐廳,出面有張好長既枱,係度食野應該都好好feel

到手啦!佢係比個玻璃杯你,飲完比返佢。其實我一個人又要拎相機又要拎兩杯奶真係好浪狽。

兩杯奶表面睇落係完全無分別,不過飲落你一定分到。

我既建議係,千!萬!不!要!買!牛油奶!!好難飲,你簡直係好似飲緊溶左既酸牛油咁,好恐怖,感覺係壞左既奶咁,如果唔係比錢買既,我直頭覺得係飲完會肚痛果d。

而個fresh milk就好飲啦,濃濃既牛奶,質感會比平時既黏少少,心理作用上點都覺得呢度飲既fresh milk係正d既!:D特別係係呢個環境慢慢飲下奶,真係幾好feel。

而個牛油味既奶,我都試左好多次忍下睇下會唔會慣左就ok,係唔得架! :o) xx( 我最盡只係飲左2厘米都唔知有無既水位,但fresh milk我就飲曬。我拎返去果時都要鬼鬼祟祟,因為我覺得好似無飲過咁比返人好浪費[sosad][sosad][sosad]

頭先我就係落去坐住草地飲。

呢幾陣太陽完埋之後,個天就變左咁。

乜光都無,我回程啦 :o)

回程既路我剩係想快d完成段路,所以我一味行剩係影左呢張

一野飛到我我就行到碼頭啦

呢頭都幾好陽光。呢個時候條隊唔長唔短,大概係等一架船後下一班就到我上。

20分鐘左右既船,就到紅蔥頭呢度 St. Bartholomä

睇得出今晚一定好好天,d雲無曬(但聽日就一樣係唔好天[sosad])。

呢個教堂其實係船上影係最靚,上到岸反而又變得無咩野。

一舊舊圓形,係幾可愛既:D

有時間既,坐下呢度都會幾舒服。

基本上呢度就係得呢d同個餐廳。

教堂係由側面入。

好細既小聖堂,幾涼,行到攰係度坐下都唔錯 [sosad]

白雪雪

好快我就出返黎,之後直接去碼頭等船 [sosad]因為呢度真係無咩樣好做,所以我都建議一黎國王湖就玩左上湖先,之後過黎行個圈就走得。

排緊隊果時會路過一個印台,可以印印仔,我都印左個落張票度。佢話如果你想蓋個印就自己入1歐定唔知幾多落個箱度 [sosad]

呢度既船可以帶動物,有隻好大既狗:D

落船後,發現下班巴士係10分鐘內,於是我都無時間慢慢行手信店,直接向巴士站行,諗住返去Salzburg先買。不過原來salzburg係無國王湖既野買[sosad]

之後都係一直坐巴士返到去Salzburg同check in,關於酒店既野會係下篇再講 #yup# #yup#

國王湖完整遊記完啦#yup#呢度天氣唔錯既話,係值得黎既,我唔會話必黎,因為我未見過真係好天係咪好鬼靚,不過就算好似今日麻麻地既天氣,都係值得黎下既,有幾陣陽光果時都係幾靚,希望呢篇遊記幫到大家#yup#

想知國王湖資訊,請看攻略篇(click)

如果想知更多歐遊資訊,歡迎Like我既 Facebook page 留意最新資訊同遊記: 芒果豆腐花遊記


【歐遊 2018】獨遊瑞法德奧17日童話小鎮仙境遊 路線行程 : https://wp.me/p8A312-14I
歡迎 Follow Facebook page 留意最新資訊同遊記: 芒果豆腐花遊記
詳細遊記及資料整合:https://mangotofufa.wordpress.com/ 

Advertisements

Leave a Reply

This site uses Akismet to reduce spam. Learn how your comment data is processed.