【歐遊遊記 2018】獨遊瑞法德奧 童話小鎮仙境遊(十九・一)Day 8 德國國王湖 Königssee 資訊 — 交通 時間預計 遊覽全攻略

atemplate19a國王湖風景優美,個個去到都讚不絕口!呢篇會講下國王湖既超詳細交通資訊、車費、遊覽攻略、時間預計、建議行程!如果想睇當日遊記,請看另一篇:【歐遊遊記 2018】獨遊瑞法德奧 童話小鎮仙境遊(十九)Day 8 德國國王湖 Königssee — 交通 遊覽全攻略 + 遊記


國王湖交通攻略

國王湖雖然位於德國,不過多數去國王湖既旅客都會係奧地利既Salzburg 薩爾斯堡落腳
因為係奧地利邊境既Salzburg去仲近過從其他德國大城市(eg 慕尼克)去,
所以好少人會從慕尼克去,因為一黎車程要3粒鐘,當中又要火車轉巴士,
一來一回都幾煩(全日會好趕,仲有萬一delay就打亂曬),
二黎個路線點都要經Salzburg,咁多數人就會覺得不如係Salzburg 留一晚,
順便玩埋呢個城市啦。
另外,都有人會直接係貝希特斯加登落腳既,
方便去埋呢度既另一個景點鷹巢。
而今次,我就係住奧地利既Salzburg既。


點樣去國王湖呢?如果唔住貝希特斯加登,可以住Salzburg。
以下係完整交通方法 回程掉返轉就係

  • 1. 前往Salzburg

Munich -不要即日來回國王湖

由Munich去Salzburg既交通係:
Munich -> Salzburg
方法:火車
車程: 1.5-1小時45分鐘
車種:M 或 RJ
票價:單程由19.9EUR起 (我買 19.9歐)/ Bayern邦票
時間表:上OBB / DB / trainline.com 搵
(仲要再由Salzburg搭1HR去國王湖!!!)
極不建議從Munich出發即日來回!!!!!!

從Munich去Salzburg或國王湖,
全程都係可以用Bayern Ticket(拜仁邦票),都係果句,
就係最貴都只係每人25歐、越多人越平既Day Pass,
詳情請睇另一篇:拜仁邦票資訊—— 慳錢必學!!

問:Salzburg唔係奧地利咩?點解可以用德國既交通Pass?
答:其實呢個係一個例外既情況黎,
相信因為從Munich前往國王湖最方便既公共交通就係點都要經Salzburg,
所以佢就同OBB預掂數,開放呢段路比張pass用埋,
方便遊客用佢黎去國王湖。
注意有時從Munich去Salzburg既車既終點可能係遠d既地方 eg Vienna, Budapest,
而用邦票係絕對唔可以搭到Salzburg打後既站既落車,
最盡先能搭到奧地利既Salzburg。
去到Salzburg,從Salzburg搭去國王湖既巴士全部都係可以用張pass既。

雖然一張邦票就搞掂,不過我因為當時plan左唔一定係一到Salzburg就去國王湖,
係視乎天氣既,天氣差我就翌日先去,
所以我果時買左預先買定既19.9歐火車票 + 10.2歐上車先買既巴士pass分開買,
而唔係25歐邦票,反正用邦票最多都只係慳5.1歐姐,好過計劃有變就又洗多左。

or 直達國王湖碼頭

Munich -直達-> Schönau am Königssee (國王湖碼頭 旅客中心)
方法:Flixbus
車程: 3小時10分鐘
票價:~8EUR起
時間表:通常08:00-11:10 但唔係日日有,上flixbus官網
極不建議從Munich出發即日來回

如果你係玩東歐四國既路線,最方便係由Vienna去Salzburg:

Vienna -不要即日來回國王湖

Vienna -> Salzburg
方法:火車
車程: 2小時20分鐘
車種:Flixtrain (Vienna Hütteldorf上) 或 RJX (Vienna Central Station上)
票價:單程由19EUR起
時間表:RJX上OBB / 兩種都可以係 trainline.com 搵

不過車程咁耐,當然係前一日transit去Salzburg,第2朝再玩國王湖啦,
即日來回Vienna就不了。

Hallstatt – 不要即日來回國王湖

至於Hallstatt去Salzburg都係要2粒半鐘,
方法可以係火車或巴士,路線太多,
呢度唔詳細寫,用google map就搵到架啦。


  • 2. 由Salzburg前往國王湖碼頭

Salzburg去國王湖係有兩程巴士要搭:

– 1 – Salzburg 薩爾斯堡 -> 貝希特斯加登 Berchtesgaden Hbf (Busbahnhof)

方法:巴士 840號 ( 上車位置:一出Salzburg火車站正門向右邊行,H&M果邊
車程:約 45分鐘
票價:上車向司機買Bus One Day Ticket 10.2 EUR (呢架同接駁果架巴士既來回都包曬)
時間表:可以係巴士官網 http://www.rvo-bus.de/oberbayernbus/view/index.shtml 既底部Click “Fahrplandownload” 即係下載時間表既德文,就會去到一頁可以search巴士路線,打返840就搵到,記得留意頭班、尾班。

– 2 – Berchtesgaden Hbf (Busbahnhof) 貝希特斯加登 -> Königssee 國王湖

方法:巴士 841/842號 ( 落車位置就係上車位置,否則跟大隊,全世界都係去國王湖架啦)
車程:約10分鐘
票價:用Bus One Day Ticket
時間表:可以係巴士官網 http://www.rvo-bus.de/oberbayernbus/view/index.shtml 既底部Click “Fahrplandownload” 即係下載時間表既德文,就會去到一頁可以search巴士路線,打返841/ 842就搵到,記得留意頭班、尾班(預埋回程接駁840既尾班!)。
841個表好怪,係睇紅框呢一部分:
螢幕快照 2018-10-23 下午9.57.47

所以從Salzburg出發去國王湖,係只需1小時!

不過其實去到國王湖只係遊客中心同碼頭,想睇風景,係要遊船
遊船資訊下面會再講。


國王湖遊船 遊覽攻略

國王湖呢頭有兩個湖,但只有大d果個湖係可以搭船既,
最多靚景睇既上湖Obersee係要從起點Konigsee站搭到最近佢既碼頭Salet,
再行20分鐘平坦山路到達既,
湖果度既風景你可以沿住湖邊行住山咁觀賞;
而由中途會有個站叫做St. Bartholomä,上面有個紅蔥頭既教堂,幾可愛,
多數人係去上湖之前或之後都會去埋St. Bartholomä,因為船票包埋。

上面已經提到國王湖既3個觀光碼頭(Konigssee、St. Bartholomä、Salet),
先睇下呢3個碼頭既位置:

螢幕快照 2018-10-24 上午12.14.14
遊船官網圖。

最底:Konigssee站 (起點)
中間:St. Bartholomä站(紅蔥教堂站)
最上:Salet (行到去上湖既站)

完整路線:

架船係由起點Konigssee站 ,經停St. Bartholomä站,去到Salet站,
再經停St. Bartholomä站,返去Konigssee站

所以,國王湖既遊船有兩個基本玩法,再低d會有圖再講多d佢地分別有咩睇,

一:只去紅蔥教堂站(St. Bartholomä)—
路線 Königssee (上圖最底) – St. Bartholomä(上圖中間)
來回15歐
全年運行 除左12月24號 同 湖面結冰
單程:35分鐘

二:紅蔥教堂站(St. Bartholomä)+上湖(Obersee)站(Salet)—
路線Königssee(上圖最底) – Salet(上圖最頂)
來回18.5歐(中間可以係St. Bartholomä落船同上船)
冬天不運行 停運日期每年可能唔同 今年2018年10月15號-2019年4月18號停運
單程 St. Bartholomä – Salet :20分鐘
單程 Königssee – Salet :55分鐘

基本上黎得國王湖最重點一定係睇上湖,所以多數人都會係第2種玩法,
除非因為冬天黎被逼無得去埋。
個人就認為上湖好天會好鬼靚,
唔太好天既就都幾靚啦,但無想像咁靚(但我睇返相又覺得其實suppose好靚)。
總之係值得黎既程度 ,
不過我呢日天氣其實未去到最差, 起碼能見度好高,
d山睇到絕大部分,唔會被雲霧遮曬。
如果天氣差到d山都遮曬既,真係不如唔好黎,因為最有睇頭就係d山景同佢地既倒影。
至於紅蔥教堂果度就其實真係無咩野睇同做,好天既睇下hea下係幾靚幾爽既,
四圍都舒服,如果唔好天又剩係可以去到紅蔥教堂既我就覺得無咩必要黎。
至於遊船過程,好天就一定好睇同靚,
但好似我果日唔好天就覺得還好啦,四圍既山本來係好型,
但無光打落去真係爭緊d,難免會有點點失望,但唔好天的話,降低期望既就應該ok。

遊船詳細票價表:https://www.seenschifffahrt.de/fileadmin/user_upload/Preislisten/KS_prices.pdf

遊船詳細時間表 一定要注意尾班船!!
https://www.seenschifffahrt.de/en/koenigssee/timetable/timetable/

如果死link可以去船既官網:https://www.seenschifffahrt.de/en/koenigssee/


行程參考

我當日既路線係:

Königssee -> St. Bartholomä -> Salet

以下會有圖講下呢d站有咩睇。(呢個唔係遊記!!遊記請睇另一篇(click)

紅蔥教堂站(St. Bartholomä)呢度會見到:

WMF-0071.jpg
佢四圍就係一片草地。真係得咁多,基本上我黎到行完一圈影得幾張相,係岸邊坐下就去搭船返去。

可以比你去到上湖既Salet站一落船未有野睇,但四圍既山係型過教堂果邊好多:

WMF-0138.jpg
上圖見到當時有d陽光,所以我一落船覺得好正。
要行20分鐘幾平坦既山路,之後會見到一個無船既湖,叫做上湖:

最出名就係呢個屋仔景,但唔知點解好少水,我自己覺得最靚唔係呢個位。

WMF-0216.jpg

其實係行過少少見到呢度仲靚,但中間兩條友永世都唔走。
WMF-0277.jpg

之後就可以選擇行埋45分鐘 – 1粒鐘都幾崎嶇下既山路,去上圖對面既草地,
期間會見到下面d鏡景:

WMF-0279.jpg

去到對面會見到:(不過其實d水有d混濁)

WMF-0358.jpg

唔止呢d既,遊記會再講多d。
不過我自己最鐘意行完45分鐘山路黎到既呢度(上圖果度),
其實呢段路越行越覺得好chur,起初係輕鬆,去到後面哇痴線d梯級好大級同唔平坦,
要好小心同用力咁行,所以一定一定要著可以行山既鞋!
唔好著拖鞋、涼鞋
雖然辛苦,但沿途都影到唔少相,成塊境咁既景係果段路途中睇得最多,
反而係屋仔附近同呢個位都唔太明顯。
而黎到對面呢邊好舒服,又有牛奶飲,呢度有草地可以休息,
唔似得頭先屋仔果度剩係可以影張相打個咭,無咩位可以hea下。
屋仔果度係有好多人係個幾細既空間度影黎影去叫黎叫去既感覺,排隊影相咁;
而呢個位係周邊都靚同廣闊,可以係度求其坐低hea,
係有與世隔絕既感覺。
我覺得值得用咁多力行到過黎,但絕對要預多d時間,
因為一來一回都要行1粒半鐘架。


時間預計

所以想舒服地完成上面一個完整既國王湖行程
(最完整當然係行埋上山上面啦,但好似鬼佬先會咁做,一日都一定唔夠時間,預左要露營啦)
上船開始計:

55分鐘船去Salet+
20分鐘行去屋仔+
30分鐘影下相+
45分鐘行去對面岸+
1小時hea+
30-45分鐘(專心行 唔洗再影相)回程行到屋仔+
20分鐘行返去Salet碼頭+
20分鐘搭去紅蔥站+
30分鐘遊覽+
35分鐘回程船返到國王湖碼頭
=6小時

上面遊覽果d時間我都預得唔算鬆,個個人唔同既,
但我就完全無計你去到排隊買船票(超長龍,應該要等起碼半粒鐘),
買完仲要等你果班船(多人就有機會安排你去搭再下一班船,又要等),
每次上船既排隊時間,仲有行手信店既時間(Salzburg無國王湖既手信),
仲有坐底食LUNCH都無計!
所以除非你唔行到最入啦,唔係既你最好預一整日既行程——
即係7-8小時係國王湖呢頭,否則既就太chur太趕。
即係話最好你早上9-10點前黎到;玩到5點零鐘完
你仲一定要夾返回程尾班巴士時間,佢好疏架!
唔好玩完先發現無車走/趕唔切返去轉火車去其他城市啊
(我見同車幾個香港人差d就miss火車,但好彩之後架火車delay [sosad] [sosad])!


從Salzburg 站到國王湖碼頭坐船 實戰紀錄

我從Munich一到Salzburg車站(9am)就衝去搵車站locker
(其實今晚我stay Salzburg,但我趕住去搭巴士去國王湖,就唔去hotel住。)
竟然發現Salzburg車站 locker只係2歐就有一個!
我未見過咁良心既locker價[sosad]

WMM-0461-2

放好曬d野,我就出發啦 :)
一出車站,向右行,向住H&M果邊行,就會見到840既上車位置。

WMM-0464-2.jpg

出車站左邊果堆車站係市內電車同巴士黎,千其唔好去錯。今日我搭既840巴士係9:15AM既班次,上車後直接同司機買one day pass,盛惠10.2歐:)

WMM-0465-2

一黎到奧地利,d人好似冷酷d,德國職員往往好友善好親善,而奧地利既巴士司機就完全無表情同唔講野,望都唔望你,收錢、比票、找錢就完,呢下真係意識到自己離開左德國呢片大愛之地:~(:~(

架車搭左45分鐘,就到左 Berchtesgaden Hbf (Busbahnhof) 貝希特斯加登

WMF-0028.jpg

WMF-0029.jpg

係呢個巴士站落就係度上返車就得啦。

WMF-0030.jpg

呢個世界係沒有排隊既,不過好彩都唔算極多人,唔會爆到上唔到。

而家就去緊國王湖,呢十分鐘車越搭就越覺得四圍好有瑞士feel,Berchtesgaden呢頭有d位係青草同木屋,不過因為天陰陰,d山坡唔夠一層層咁,當然就仍然同瑞士差好遠啦。

WMM-7409

WMM-5.jpg

就到啦,呢頭原來除左個湖,仲有纜車果d比人上去睇景。其實黎Berchtesgaden住返一兩晚都唔錯,因為又有國王湖,又有鷹巢,呢頭似乎仲有得上下山睇景。不過由於時間唔夠,我今次就無去鷹巢啦,但我後來有朋友同我講覺得鷹巢靚過國王湖,搞到覺得都幾應該去睇下,不過我當時既天氣上到山實無野睇啦,而國王湖係個點都要去下既地方,唔會後悔。

WMF-0031.jpg

巴士站呢頭幾有規模,完全係旅遊區既樣。

WMF-0032.jpg

一落車跟大隊行,就會去到下面呢條街。不過都有堆人係向旅客中心行,因為佢地要去廁所[sosad],呢個廁所係免費既。下面就係手信街,唔太建議一黎就行街買野食,建議直接向前行去爭取前d既位置買船飛,我就係因為排住買野食,搞到行到前面先知排曬長龍。

WMF-0034.jpg

WMF-0036.jpg

附近既屋仔

WMF-0035.jpg

呢個時候間中都有d太陽。

WMF-0037.jpg

因為覺得入到湖就唔會有野食,我就醫肚先。

WMF-0038.jpg

WMF-0041.jpg

自製雪糕Crepes[sosad] Nutella Crepes就一定好味架啦,個雪糕就…係勁假又酸既士多啤利味。:o)

下圖係我排緊隊時影既,果邊係碼頭,幾好陽光,勁想快d出發。

WMF-0043.jpg

我後面條隊,其實好長,成條隊應該排左最少20分鐘,應該有半個鐘。

WMF-0044.jpg

到手啦終於,我見到前面好多人買既都係排到11:45定35左右班船既飛,但因為而家有隻就開既船有一個位剩,我就可以率先上船:P 果時覺得好好彩:P 。

WMF-0045.jpg

睇返時間,我諗我10:30左右到,行下食下應該搞左15分鐘,所以的確係排左30分鐘左右。

當全世界排緊隊等船,我就有個特快線比我直接上船[sosad] [sosad]好似買左特快證既VIP咁 #hehe#

WMF-0046.jpg

WMF-0047.jpg

全架船都坐好曬,我行到入去,全船望住我,我向入去,全部人就一直望 [sosad]  可能覺得好奇怪點解仲有人上船[sosad] 無幾耐,船長上場船就開船啦。

不過上到船就發現其實呢d 率先出發既機會都無乜好,最後一個上船即係你無得揀位:o) :o)我個位都幾爛,首先我坐船既左邊,而搭落我覺得多數既靚景都係右邊度,加上我個位個窗一開就要推開左係我隔離果個人果邊既窗位先,即係我唔可以自己想開窗就開,因為我一開,d風就吹埋佢,而當一開船全場都開窗睇景時,我就開啦,點知:o) :o)佢關返,話:it’s too cold :o) :o) :o) :o) 結果幾乎全程都隔住玻璃睇同影:o),不過好彩後來佢見到我咁影法佢都話如果你想影相你可以開一開黎影下[sosad] 唔…都好過無既。我對大家既忠告係:坐右邊!!

攻略就講到呢度,國王湖涉及既交通同玩法太多,所以攻略都講左勁大篇,
遊記係另一篇講啦 :【歐遊遊記 2018】獨遊瑞法德奧 童話小鎮仙境遊(十九)Day 8 德國國王湖 Königssee — 交通 遊覽全攻略 + 遊記

如果想知更多歐遊資訊,歡迎Like我既 Facebook page 留意最新資訊同遊記: 芒果豆腐花遊記


【歐遊 2018】獨遊瑞法德奧17日童話小鎮仙境遊 路線行程 : https://wp.me/p8A312-14I
歡迎 Follow Facebook page 留意最新資訊同遊記: 芒果豆腐花遊記
詳細遊記及資料整合:https://mangotofufa.wordpress.com/ 

Advertisements

Leave a Reply

This site uses Akismet to reduce spam. Learn how your comment data is processed.