【歐遊遊記 2018】獨遊瑞法德奧 童話小鎮仙境遊(二十四)Day 10 奧地利 因斯布魯克 Innsbruck —— book 錯酒店日期災難記 + Bludenz 住宿記

係講Innsbruck前,先講一講一件幾痴線既事。我係innsbruck呢日其實好好好難忘,因為我呢晚book左間有少少貴、似乎好舒服既酒店慰勞下呢個玩到一半旅程既自己——但難忘/痴線既位唔係呢度——呢日,正當我滿心期待咁去到Innsbruck間酒店check-in,我先發現原來我book錯左日子⋯⋯⋯⋯⋯⋯即係話呢晚我並無book任何酒店,再加上今晚全Innsbruck市既酒店基本上都已經full曬⋯⋯呢晚究竟有咩著落呢?呢篇純粹係紀錄同分享,無資訊、無景點,但不妨入黎食下花生哈哈。

Hotel Sailer Agoda 圖片 

是日滿心期待地黎到Innsbruck,因為正如上面所講,我book左一間似乎唔錯既酒店,叫Hotel Sailer,係我專登比近900蚊(連早餐)黎比自己一個好舒服咁住返晚既,所以好想快D到,睇下間酒店究竟係點既~而呢日同平時一樣,一到站我就向酒店出發~

網上酒店圖片係咁 

Agoda 圖片 
好似幾舒服咁 
好大好闊落既浴廁

去到酒店,見到呢度成班西裝佬參加完啲social event咁行出黎,更加感覺呢度似乎幾高級,同我backpacker咁既裝束真係格格不入,不過我的確(係果一刻#haha#dog )係準備入去check in 嘅!入到去我去到reception搞check in,但職員今次異常地搞得耐,但我明明book前book後都重睇左我啲酒店日子好多次,唔覺得會錯,不過,佢真係係咁揾都揾唔到我個名!! #oh# 我都開始淆,開個email黎睇…哇!!!今日係5號,我planner寫今日係旅程既day11⋯⋯而我…我因為check果時望住day11就book左11號!(仲要係無得free cancel既訂單….)!即係話,呢晚我無book到任何酒店。@_@:o)

呢啲咁既事,住過百幾二百間酒店既我真係第一次發生,我竟然可以check左勁多次都發現唔到呢個錯誤!!當個職員知道後,個樣都顯得非常同情,但又幫唔到我啲咩,因為今晚佢地都full曬,佢仲主動幫我打去市內其他酒店問,亦係無曬房…我無講D咩,但佢地都相當上心,仲揾埋佢啊姐黎同我講佢地都想幫我只係無能為力,我都feel到佢地真係盡曬人事(不過當然依然係無得free cancel,唉自己book錯日子,都預左無左舊錢)。我之後都揾曬啲酒店網…只有Innsbruck邊緣果啲好遠既酒店剩,仲要賣近2000蚊晚:~(,是咪傻左?:o)點解可以full到咁。

上星期先因為miss左火車搞左大半日,順順利利玩左一星期後,今日又有痴線事,今個旅程真係EQ大訓練,自己一個玩,如果有咩意外,就無人即時同你分擔,咩都要自己面對同拆掂佢(不過好開心今次呢單我有係香港既一個好朋友陪我揾~),相信呢樣都係好多試過一個人去長途旅行體會過既事。

話說揾唔到innsbruck既酒店其實真係幾煩,因為我第二日張超抵早鳥車票只需20歐,就可以由Innsbruck一路搭5粒鐘去到瑞士既沙夫豪森(Schaffhausen),呢個路線如果經瑞士國鐵/即時買,係要近800蚊!! #oh#  本來今晚訓個靚覺聽朝Innsbruck出發就好fit,而家竟然無得住Innsbruck。不過,我都唔可以浪費張車票,我唯有將張車票會經既站由innsbruck開始逐個search,盡量係沿路城市落左腳先,聽朝就可以用返張車票繼續搭。

我一路search,全部都係不知名地方,但近Innsbruck果幾個站竟然都要千幾二千蚊先得d位置/設備好衰既酒店!:o) 最後我揾到N個站後、近兩粒鐘車程以外既Bludenz先有正常價錢又位置唔錯既酒店,佢叫做Hotel Herzog Friedrich,600 HKD一晚一間連浴廁既單人房:P!不過,由Innsbruck搭過去既即日車票,都要29.6EUR[sosad]!仲貴過我一野搭去瑞士近50%!不過無計,係附近最平既選擇了,我揾到落腳地已經心滿意足⋯⋯[sosad]

結果,因為呢個失誤,成件事就要比多:
600(酒店)+  260(火車)= 860HKD [sosad]
損失左錢,仲無左住靚酒店既機會[sosad]
呢晚住宿成本一共用左我近2000蚊,嗚哇好貴!!呢個價可以住villa了[sosad]
不過,都有其他(不幸中既)好處既:
1)翌日搭少兩粒車,可以瞓多兩粒鐘
2)有機會去一個完全唔知係點既地方,相當刺激
3)又學到野(但好高學費)
4)有個幾特別既經歷,其實之後既發展都有唔少開心事,覺得幾有趣

但我最心痛既係白白比左成千蚊晚但住唔到既酒店錢,
而Agoda到今日都仲不時提醒我快啲寫呢間靚酒店既評價,成日noti度彈出黎問我滿唔滿意個住宿,叫我評分⋯⋯「分享一下在塞勒飯店 (Hotel Sailer)的住宿體驗吧!」瘋狂remind我無住到Hotel Sailer呢件傷心事⋯⋯#kill#
我評你個頭呀!!!!

不過Bludenz呢晚都幾開心既,下面講下。

Bludenz

網上圖片

Bludenz 係咁既,其實我黎之前原全無google佢,一到先知係咁,覺得呢度好靚,座山好型,我就係住係山腳既鎮度,不過我到果時係落微雨既,所有野都無咁翠綠,但山上就有唔少飄浮既雲霧,幾有仙氣。以下全部係手機相。

四圍都好有仙氣

見天氣咁差,一落車,就想買定晚餐,之後摺係房唔再出黎。不過呢個車站咩都無,得間唔知係咪D中東定東南亞人開既超市係開緊,入面只有佢地啲食物,完全買唔到野。

唔知係咪因為平時呢度唔會有我呢類亞洲人樣出現,一路行去酒店期間,每個人都望住我,街頭望到街尾,可能心諗點解我會係度出沒。

紅色果座就係酒店,係正市中心購物街隔離

又轉頭j下座山

入到去,Reception已經知我係今日臨時book酒店既人,好似係等緊我而我終於到咁既樣,我就順便問下附近有冇超市,佢話呢頭基本上都無,但行15分鐘左右就有好似羅騰堡果D outlet咁大既超市係火車站既另一邊,亦有m記,我當然就會去果頭醫肚啦!而個過程都好有驚喜。不過先講下間房先。

感覺好舒服既一間房~不過係民宿feel既舒服,唔係酒店果種舒服,但今晚都有咁既環境落腳,唔洗住hostel / 訓車站,已經好好了~

幾有趣,個「浴室」明明有位,但都要開放式咁將個企缸放係門隔離,不過自己一個住就開放式都無咩所謂既~同埋浴室果Part同房門之間有牆同門可以隔住。

廁所,我影得好衰搞到有公廁feel,其實真實唔覺,係正常既,個企缸都闊落,只係水力唔夠勁,唔差但可以再大力D。

出發!已經停雨了,個天仲開始藍!

經橋去對面就可以去超市果邊,呢個時候⋯⋯相好似勁唔明顯,但現實好明顯,有彩虹!!!!(下圖⋯⋯)

影相真係完全睇唔到⋯⋯框住果個位

不過重點係,睇到個天開始靚,仲出埋彩虹果下真係有啲感動,覺得好似個天係度安慰緊我,甚至係同我講最難既時間已經過左咁,好勵志哈哈。

到啦,見到M 記,向右邊行就有超市

已經好天到咁 

買左D包呀零食,我就返去了,好感動,餓左咁耐終於有野落肚。

返去前,四圍行下

市中心街,因為太冷清我又攰,無特登入去行。
下面呢間係市政廳,去開市政廳好古典既古城,呢間真係見過最平凡既Rathaus。

好型既山。好天下,佢地終於變綠色。

返黎Lu,呢度相信係個當地人既行山勝地 ,因為黎到呢度可以欣賞呢頭既大自然景色,所以上圖都見到座山係有纜車上山既。

順道再講埋翌日包埋既早餐。

比之前去開既酒店餐廳少人,畢竟唔係出名旅遊景點,不過就幾warm 

好靚好鬆脆既牛角包~

剩係芝士都有咁多種就知,呢度既早餐好有誠意!雖然歐式早餐黎黎去去都係呢D,但係有D酒店每種食材只會提供一款比你,而呢度新有唔少種類款式。

水果都有幾種!

佢仲整左隻蛋比我!好可愛!!!!好暖既蛋!!!

出發去瑞士啦,今日天氣又陰返了。

火車係小國列支敦士登Liechtenstein上橫過,進入瑞士,向沙夫豪森(Schaffhausen) 出發。

呢篇遊記純粹係紀錄同分享,無資訊、無風景,或者可以當係個反面教材,提醒大家check清楚啲酒店日子呀!
自此,我係planner都唔會再寫Day11咁樣,而係「第十一日」,廢時比D數字混淆曬自己…

如果想知更多歐遊資訊,歡迎Like我既 Facebook page  留意最新資訊同遊記: 芒果豆腐花遊記


【歐遊 2018】獨遊瑞法德奧17日童話小鎮仙境遊 路線行程 :
 https://wp.me/p8A312-14I
歡迎 Follow Facebook page 留意最新資訊同遊記: 芒果豆腐花遊記
詳細遊記及資料整合:https://mangotofufa.wordpress.com/ 


Advertisements

Leave a Reply

This site uses Akismet to reduce spam. Learn how your comment data is processed.