【歐遊遊記 2018】獨遊瑞法德奧 童話小鎮仙境遊(三十六) 瑞士少女峰地區 DAY 13 (三) 上少女峰

是日第二個行程係上少女峰,正如前幾篇所講,少女峰我係見今日好天唔想嘥左先即興決定上去,點知上到去一陣後天氣差左好多 [sosad]。不過,都有成功睇到好天version既少女峰既,睇到既野真係同唔好天差幾遠下。[sosad]

講所有野之前想先講行前準備,最重要帶既係
太陽眼鏡、外套同防曬,
否則可能會雪盲、凍到震、不知不覺曬傷。
因為一片白色既雪景真係好殘眼,又因為海拔高,所以好凍(0度),我果時仲勁大風,
白色既雪地會反曬D陽光落平時太陽照唔到既位(特別下巴),一定要咩位都搽防曬,
除非你唔打算係雪地度hea。
至於怕唔怕高山反應洗唔洗食藥果D,我就無諗過呢個問題,亦無食藥既,
去到唔覺有咩唔妥,不過呢D人人反應唔同啦。
不過,太陽眼鏡、外套同防曬真係必備。


交通

去少女峰既車票並唔洗提早買,有half-fare card既我直接係火車站售票機買半價(小童)既車票,就等車到啦。

上少女峰既車程分兩段:
Grindelwald – Kleine Scheidegg (~30分鐘)
Kleine Scheidegg – Jungfraujoch (~30分鐘)

價錢非常貴,少女峰火車站來回Grindelwald,2019 正價價錢係:
春、秋: 190 CHF
夏:214 CHF
冬:164 CHF
如果你有Swiss Travel Pass有75折;
如果你有Half-fare card就半價。

更多景點價錢:
【歐遊遊記 資訊】獨遊瑞法德奧 童話小鎮仙境遊(三十)瑞士資訊 — 洗唔洗買PASS / 揀咩交通PASS好?—— 各種瑞士旅遊通票 景點、交通折扣等超詳細比較 + 攻略

當中其實我覺得Grindelwald – Kleine Scheidegg 呢段路係最靚,
上到少女峰反而無咩太大感覺。


買完個Lunch,我就出發上少女峰啦。我仲買左個yogurt做「乾糧」,結果好後悔,因為上到少女峰,好大可能係氣壓問題,而yogurt既包裝又比較弱,結果佢爆左,成個背囊都係⋯所以係度警世一下,千其唔好帶D液態又易爆既野上山。[sosad]

出發~火車上既景好靚首先又係好靚既Grindelwald全景:

睇黎有人係行上Kleine Scheidegg #like#

其實我都無必要加咩描述,直接睇相啦~

越黎越高啦

好型既雪山

火車相必影啦~

同The First 一樣,都係好多黃花仔。

到左 Kleine Scheidegg,我覺得呢度幾正,同 The First 又係唔同感覺,因為D雪山近D,睇落大座好多,真係壯觀D,即使對登少女峰無興趣,都可以黎Kleine Scheidegg 睇風景。

可惜我支鏡壞左而我唔知,D相變到勁奇怪。

不過我無係呢頭認真行過,因為緊接就有另一班火車。[sosad]

D相炒曬:-(

紅色既就係上少女峰鐵道火車~

上車啦,記住坐右邊~

不幸地我個位係無得開窗,人地D位有個頂窗仔。

越黎越近啦~

呢頭有個湖,有D人係黎呢度行山行去個湖,玩法同 The First 果D行山路線差唔多,有時間既話我都會想行下~

一入隧道就完全無景睇,再有野睇,就已經係落車既車站了。

由於我事前無research,一落車好 lost ,唔知要點行。
好彩之後發現,呢度有好多1,2,3,4,5,6…9,10,11,12,13既牌,
你落車後順住數字牌行曬D景點,就係玩完一個完整行程架啦。

室內觀景台,哇好白O:-)O:-)O:-)

上到黎,其實唔係行山或者keep住有靚景睇,更多時間係遊走係下面呢種通道果度。

頭先講左有13個「景點」,其實得3個係室外睇景,
其他我自己覺得係為整而整既野,令呢度多D野做咁,
不過個人就覺得並無特別有趣~絕對唔係重點。

其實上面已經係路過左3個check point,因為連個車站都計一個。
以下就係4號既Sphinx觀景台啦~

呢個係一個金屬觀景台

左邊果度咩黎呢?其實一粒柆果D係人黎架,果度係一陣會去既Snow Fun 樂園,有D雪上活動玩,可以行下雪地咁。

focus返個景先,眼前既就係呢度既重點啦,遠處係冰河,呢個時候都係好好天~

雪山都係用鏡zoom住影型D~

呢度勁多人,所以你要zip黎zip去咁影相

今日好大風,睇住D雲霧好快咁飄過

下面已經好多雲

飄~~~~~

又出返黎

我好鐘意既艾格峰,不過長期有舊唔走既雲

D雲開始湧上黎…

可能因為D團走左,少左好多人

少女峰~有D煙霞咁既仙氣版

過多幾秒座山就被淹沒左,無再出過黎 [sosad]唔係下圖,係一片白色果種。

事前有個大媽仲張開手咁樣想影合照,佢老公一想禁制影果下,
座山就被堆雲遮到無曬,
見到佢張相個背景得返白色一片,我笑左出聲[sosad]
仲被佢見到我笑[sosad]好彩佢笑埋一份[sosad]

果邊都淪陷了

睇完就去下個景點,老實講我覺得係唔錯既,D山係型,
但無好靚既感覺 [sosad] [sosad],個車票票價真係有6成都係打咭既價值黎。

之後我路經呢個玻璃球,係其中一個checkpoint黎

Alpine Sensation

幾得意

呢度既通道一路行會有D畫比你睇下呢個Top of Europe火車站既建造過程,行下行下我就去左Snow fun

夏天都可以玩雪~因為自己一個,我就無點玩,都係坐下居多

上面不時有尖叫聲傳出,因為有人係度玩Zip line ,我估應該會極貴了

果邊其實係D坐係個圈度sir出去既活動

有D人係會一直行山咁行過去,因為我覺得好凍,又著唔夠衫,我就唔行咁遠了。

我全程坐係度hea,其實幾歎~

再下一站~去左個叫冰宮既地方,就係好多冰雕

地下唔會太線,ok 的

好頹既冰雕哈哈哈 [sosad] [sosad]

點解影出黎變曬樣 [sosad] [sosad]

全場最靚就係呢個

最9唔搭8係呢個

最cute係呢個

入去~

呢度好細,好快就行完,有人係D冰地度扮moonwalk

再到下個站時真係凍到傻,真係勁大風,但呢個應該係最經典既打咭位,下圖係個門

去既係:

就係D人黎親都會mung住佢黎合照果支旗!!!
目測100米既距離,但大風到覺得自己爬珠峰咁 [sosad] [sosad] [sosad]

我用10秒既時間同支旗自拍左一千張就衝左返室內[sosad][sosad][sosad]

臨走見到咁既野

第11站其實係手信店,我用9.8CHF買左個磁石,一場黎到點都要係Top of Europe買返個~

第12站係Lindt 朱古力店,唔知點解D人係度掃貨,明明賣得特別貴咁 [sosad] [sosad]
幾袋幾袋咁買,真有米 [sosad]

第13站係餐廳,我都話佢D check point好多都好流[sosad][sosad]

之後就等火車落山啦O:-)
因為天氣變到好差,加上我發現個yogurt係背囊入面爆左,
忙住清理,所以我一張相都無影過[sosad][sosad]

少女峰行程完結啦~
我既結論係,少女峰地區係必黎,至於登少女峰,
如果你好鐘意打咭,咁一定要黎呢座名氣極大既雪山,
但如果你係想睇好靚既景,又旅費有限,
我就覺得你無必要比咁多錢上到黎,
因為我真係無咩大感覺,
上少女峰全程最靚既位其實係Grindelwald-Kleine Scheidegg果段路,
不過,當然係你要肯定你唔上去打咭都唔會後悔先啦~
否則既話,一場黎到咪上埋囉~O:-)O:-)
雖然全程凍得好折磨,亦貴得黎無咩好驚歎既景,
但我都無後悔上左黎既~

如果想睇更多歐洲遊記或問問行程資訊,歡迎Like Facebook Page  芒果豆腐花遊記 ~


【歐遊 2018】獨遊瑞法德奧17日童話小鎮仙境遊 路線行程 : https://wp.me/p8A312-14I
歡迎 Follow Facebook page 留意最新資訊同遊記: 芒果豆腐花遊記

Advertisements

Leave a Reply

This site uses Akismet to reduce spam. Learn how your comment data is processed.