【歐遊遊記 2018】【資訊】獨遊瑞法德奧 童話小鎮仙境遊(四十六)酒店報告 奧地利薩爾斯堡 SALZBURG — Pension Jahn 雅恩旅館 — 方便舒適既旅館

因為都有巴絲打問過 Salzburg 住宿,所以就補出返呢篇~本來呢篇係第 25 篇,但因為呢一章就黎(終於)完,如果完左先再出呢一篇好似怪怪地,就而家出埋啦~我係Salzburg住既呢兩晚,就係去左 Pension Jahn住,整體上都好滿意,位置靚,房又舒服又企理,雖然係shared bathroom,但係勁乾淨同闊,用落覺得仲正過某啲房內浴室哈哈~呢篇會報告下呢晚既體驗~

位置選擇

首先講下Salzburg既結構。

Salzburg 既火車站係市內既北邊,而巴士總站,係係正火車站出面你去市外既 Bertesgarten、國王湖、鷹巢等,都係要係度搭巴士上車,而佢堆景點,就離火車站有段距離,不過就集中曬係一堆(南面),而火車站既巴士站都有巴士直達堆景點既中心。

所以個人認為,夏天黎住Salzburg應該要近車站,而唔係景點。因為黎得Salzburg,應該係一/兩日玩市外(國王湖、鷹巢etc),另一日市內,而市內景點大半日係玩得曬,如果你住車站果頭,你只需預一日由車站搭去景點果頭,行住遊覽曬佢,玩完一日再搭返巴士返酒店就得,其他日子就可以輕鬆搭巴士/火車去市外玩,到埗同離開Salzburg亦都方便,加上車站內有個大型超市,買野食同物質都勁方便,所以我推薦住車站附近~。

Pension Jahn

價錢 333 HKD/ night

74歐兩晚,姐係333 HKD 左右一晚,單人房再加上佢位置黎講,都真係算好抵,雖然shared bathroom,但shared bathroom都好舒適,綜合下面會講既所有野,我覺得值。
位置 5/5

如下圖所見,個洒店離火車站只係四分鐘距離,真係勁近,行少少就到,多行李都唔會係問題,方便transit,去國王湖都係呢度上車既,搭車去遊古城又係呢度,一樣係好方便。

再加上,大型超市都係係火車站入面,所以近火車站真係最佳選擇。

環境、設備

呢個酒店唔係24小時reception,不過你正常時間黎都會有人理你。Reception我無影,直去樓梯,印象中無lift

走廊有啲似宿舍果種

單人房:

一個人既房黎講都住得舒服,同埋佢都企理,真正既佢比張相既感覺再闊DD,佢仲有洗手盆,呢樣對shared bathroom既房黎講好重要,因為如果下下洗手、洗面、刷牙果啲要出去就實在太煩,房內有就好好。

房入面既野都一眼睇曬,無風筒。

Shared bathroom

我就無影廁所,都係正常、乾淨既獨立廁所黎(唔係廁格果種),而浴室係同廁所分開既,我見到有兩種,都差幾遠:

細啲既(我影到再細左一個層次,其實應該對一個人黎講都好夠闊):

我就用左呢個:

呢個係外面望入去,影唔曬,其實入去佢係大好多,成個空間都係用黎沖涼,係個正方型咁濟既空間,你可以當入面係企到十幾個人,成部工厦lift咁大,你係入面跳住舞沖涼都得,我就最鐘意咁闊落既浴室,因為我好怕掂到屋企以外既浴廁既牆/玻璃。

所以呢個涼真係沖得勁爽~

其實呢篇主要都係吹奏呢個浴室,所以已經報告完。

講埋去完國王湖,我俾超市買左咩做晚餐

奧地利既超市都幾其他地方唔覺有既野飲,但都可能係因為我FD 講起,所以我有留意~

呢D好似係呢度既汽水,唔係可樂,係有啲似薑啤但又有果味,賣相可愛~

呢個好靚,但果時完全唔知咩黎,而家睇覺得係茶,
google落,原來Grüner Tee係Green Tea

仲有呢啲叫做matcha但好似汽水既飲品,好似好伏…

最後我試左個「薑啤」,仲有啲tapas,仲有沙律

粟米,車喱茄,有曬我最鐘意既沙律食物,有胡麻醬就完美,
不過佢比既醬都唔錯(唔記得咩味)
以上就係我既頹食晚餐分享,都食得幾開心~

如果想睇更多歐洲遊記或問問行程資訊,
歡迎Like Facebook Page  芒果豆腐花遊記 ~


【歐遊 2018】獨遊瑞法德奧17日童話小鎮仙境遊 路線行程 : https://wp.me/p8A312-14I
歡迎 Follow Facebook page 留意最新資訊同遊記: 芒果豆腐花遊記

 

Leave a Reply

This site uses Akismet to reduce spam. Learn how your comment data is processed.